ಬಂಡಾಯ ಜನಪ್ರಿಯತೆಯ ಸಂಕೇತ? ಮತದಾನದ ಹೊತ್ತಿಗೆ ತಣ್ಣಗಾಗುತ್ತಾ? ಬಿಜೆಪಿ ಗೆಲ್ಲುತ್ತಾ?​

ಬೆಂಗಳೂರು: ರಾಜ್ಯ ಬಿಜೆಪಿಯಲ್ಲೀಗ ಬಂಡಾಯದ್ದೇ ಸುದ್ದಿ..! ಅದರಲ್ಲೂ ಬಿಜೆಪಿ ಅಭ್ಯರ್ಥಿಗಳ 2 ಪಟ್ಟಿಗಳು ಪ್ರಕಟವಾದ ಬಳಿಕ ರಾಜ್ಯದ ಹಲವು ಕ್ಷೇತ್ರಗಳ ಕೇಸರಿ ಪಾಳಯದಲ್ಲಿ ಬಂಡಾಯದ ಕಹಳೆ ಮೊಳಗಿದೆ. ಕೆಲವು ಕ್ಷೇತ್ರಗಳಲ್ಲಿ ಆಡಳಿತ ವಿರೋಧಿ ಅಲೆಯ ಬಿಸಿ ಎದುರಿಸುತ್ತಿದ್ದ ಬಿಜೆಪಿಗೆ ಇದೀಗ ಪಕ್ಷದೊಳಗೇ ಒಳೇಟಿನ ಭಯವೂ ಎದುರಾಗಿದೆ. ಬಿಜೆಪಿ ಟಿಕೆಟ್ ಘೋಷಣೆ ಆಗಿರುವ ಒಟ್ಟು 212 ಕ್ಷೇತ್ರಗಳ ಪೈಕಿ 20 ರಿಂದ 30 ಕ್ಷೇತ್ರಗಳಲ್ಲಿ ಬಂಡಾಯದ ಬಿಸಿ ತಟ್ಟಿದೆ.

ಆದ್ರೆ, ಬಂಡಾಯದ ಬಿಸಿ ಪಕ್ಷಕ್ಕೆ ಅಷ್ಟಾಗಿ ತಟ್ಟೋದಿಲ್ಲ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ. ಒಂದು ವೇಳೆ ಬಂಡಾಯದ ಬಿಸಿ ತಟ್ಟಿದರೂ ಅದು ಕೇವಲ 7 ರಿಂದ 8 ಕ್ಷೇತ್ರಗಳಿಗೆ ಮಾತ್ರ ಸೀಮಿತ ಆಗಲಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಒಂದು ವೇಳೆ ಬಂಡಾಯದ ಪರಿಣಾಮ ಬೀರಿದರೆ ಪಕ್ಷವು ರಾಜ್ಯದಲ್ಲಿ ಸರಳ ಬಹುಮತ ಸಾಧಿಸಲು ತೊಡಕಾಗಲಿದೆ.

ಶಾಸಕರು, ಪರಿಷತ್ ಸದಸ್ಯರು, ಮಾಜಿ ಶಾಸಕರಿಗೇ ಟಿಕೆಟ್ ಇಲ್ಲ!

ಬಿಜೆಪಿಯು ಈವರೆಗೆ 18 ಹಾಲಿ ಶಾಸಕರಿಗೆ ಟಿಕೆಟ್ ನಿರಾಕರಿಸಿದೆ. ಇಬ್ಬರು ವಿಧಾನ ಪರಿಷತ್ ಸದಸ್ಯರಿಗೂ ಟಿಕೆಟ್ ಕೊಟ್ಟಿಲ್ಲ. ಇದಲ್ಲದೆ 10ಕ್ಕೂ ಹೆಚ್ಚು ಮಾಜಿ ಶಾಸಕರೂ ಟಿಕೆಟ್‌ ವಂಚಿತರಾಗಿದ್ದಾರೆ. ಈ ಪೈಕಿ, ಲಕ್ಷ್ಮಣ ಸವದಿ, ಈಶ್ವರಪ್ಪ, ಎಂ. ಪಿ. ಕುಮಾರಸ್ವಾಮಿ, ಆರ್. ಶಂಕರ್, ನೆಹರೂ ಓಲೇಕಾರ್ ಸೇರಿದಂತೆ ಹಲವು ಪ್ರಮುಖರೇ ಇದ್ದಾರೆ.

ಈಶ್ವರಪ್ಪ ನಿರ್ಗಮನದ ಬಳಿಕ ಶಿವಮೊಗ್ಗದಿಂದ ಟಿಕೆಟ್ ಸಿಗಬಹುದು ಅನ್ನೋ ನಿರೀಕ್ಷೆಯಲ್ಲಿ ಈಶ್ವರಪ್ಪ ಪುತ್ರ ಕಾಂತೇಶ್ ಇದ್ದಾರೆ. ಇನ್ನೂ ಕೆಲವರು ಪಕ್ಷ ಬಿಡುವ ಮಾತನ್ನಾಡಿದ್ದಾರೆ. ಸವದಿ ಈಗಾಗಲೇ ಕಾಂಗ್ರೆಸ್ ಸೇರಿದ್ದಾರೆ. ಕೆಲವರು ಬಂಡಾಯ ಅಭ್ಯರ್ಥಿಗಳಾಗಿ ಸ್ಪರ್ಧಿಸುವ ಸಾಧ್ಯತೆಯೂ ಇದೆ. 2019ರಲ್ಲಿ ಕಾಂಗ್ರೆಸ್ – ಜೆಡಿಎಸ್ ತೊರೆದು ಬಿಜೆಪಿ ಸೇರ್ಪಡೆಗೊಂಡು ಕೇಸರಿ ಸರ್ಕಾರ ರಚನೆಗೆ ನೆರವಾದ ಶಾಸಕರಿಗೆ ಬಿಜೆಪಿ ಪ್ರಾಧಾನ್ಯತೆ ನೀಡುತ್ತಿದೆ ಅನ್ನೋದು ಬಹುತೇಕರ ಅಸಮಾಧಾನಕ್ಕೆ ಕಾರಣ.

ಪರಿಸ್ಥಿತಿಯ ಲಾಭ ಪಡೆಯಲು ಕಾಂಗ್ರೆಸ್ – ಜೆಡಿಎಸ್ ತಂತ್ರಗಾರಿಕೆ!

ಬಿಜೆಪಿಯಲ್ಲಿ ಬಂಡಾಯ ಹೆಚ್ಚಾದಷ್ಟೂ ಅದರ ಲಾಭ ಪಡೆಯಲು ವಿಪಕ್ಷಗಳಾದ ಕಾಂಗ್ರೆಸ್ ಹಾಗೂ ಜೆಡಿಎಸ್ ಮುಂದಾಗಿದೆ. ಈ ಪೈಕಿ ಲಕ್ಷ್ಮಣ ಸವದಿ ಈಗಾಗಲೇ ಕಾಂಗ್ರೆಸ್ ಸೇರಿದ್ದಾರೆ. ಇನ್ನು ಬಿಜೆಪಿಯ ಮತ ವಿಭಜನೆ ಆದರೆ ಕಾಂಗ್ರೆಸ್ ಹಾಗೂ ಜೆಡಿಎಸ್‌ಗೆ ಸಹಜವಾಗಿಯೇ ಲಾಭ ಆಗಲಿದೆ. ಕೆಲವು ಭಿನ್ನಮತೀಯರು ಬಹಿರಂಗವಾಗಿಯೇ ಪಕ್ಷದ ನಾಯಕತ್ವದ ವಿರುದ್ಧ ಅದರಲ್ಲೂ ಸಿಎಂ ಬಸವರಾಜ ಬೊಮ್ಮಾಯಿ ಅವರ ವಿರುದ್ಧ ತಮ್ಮ ಆಕ್ರೋಶ ಹೊರಹಾಕುತ್ತಿದ್ದಾರೆ.

ಹೊಸ ಮುಖಗಳಿಗೆ ಮಣೆ ಹಾಕಬೇಕು ಎನ್ನುತ್ತಿದೆ ಬಿಜೆಪಿ!

ಹಲವು ಬಾರಿ ಶಾಸಕರಾದವರು, ಹಿರಿಯರಿಗೆ ಮತ್ತೆ ಟಿಕೆಟ್ ಕೊಡುವ ಬದಲು ಹೊಸಬರಿಗೆ ಪ್ರಾಶಸ್ತ್ಯ ಕೊಡಬೇಕು ಅನ್ನೋದು ಬಿಜೆಪಿಯ ಕೆಲವು ನಾಯಕರ ವಾದ. ಆದ್ರೆ, ಪಕ್ಷ ನಮ್ಮನ್ನು ಸರಿಯಾಗಿ ನಡೆಸಿಕೊಳ್ಳುತ್ತಿಲ್ಲ ಅನ್ನೋದು ಹಿರಿಯರ ವಾದ. ಸೂಕ್ತವಾದ ತಂತ್ರಗಾರಿಕೆ, ಸಿದ್ದತೆ ಇಲ್ಲದೆ ಬಿಜೆಪಿ ನಾಯಕರು ಹೊಸಬರಿಗೆ ಮಣೆ ಹಾಕುವ ಯೋಜನೆ ಜಾರಿಗೆ ಮುಂದಾಗಿದ್ದಾರೆ ಅನ್ನೋ ಆರೋಪವನ್ನೂ ಕೆಲವರು ಮಾಡುತ್ತಿದ್ದಾರೆ. ಅದರಲ್ಲೂ ಜಗದೀಶ್ ಶೆಟ್ಟರ್, ಸವದಿ, ಈಶ್ವರಪ್ಪ ವಿಚಾರದಲ್ಲಿ ಈ ರೀತಿ ಪಕ್ಷ ತಪ್ಪು ಹೆಜ್ಜೆ ಇಟ್ಟಿದೆ ಅನ್ನೋದು ಕೆಲವರ ವಾದ. ಯಡಿಯೂರಪ್ಪ ವಿಚಾರದಲ್ಲೂ ಇದೇ ಪ್ರಮಾದ ಮಾಡಲಾಗಿದೆ ಅನ್ನೋ ಅಪವಾದವೂ ಇದೆ.

ಹಿರಿಯರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಿ!

ಬಿಜೆಪಿಯಲ್ಲಿ ಹಿರಿಯ ನಾಯಕರಿಗೆ ಟಿಕೆಟ್ ನಿರಾಕರಿಸುತ್ತಿರುವ ಕುರಿತಾಗಿ ಪ್ರತಿಕ್ರಿಯೆ ನೀಡಿದ ಹಿರಿಯ ನಾಯಕರೊಬ್ಬರು, ಟಿಕೆಟ್ ನಿರಾಕರಿಸುವ ಮುನ್ನ ಹಿರಿಯ ಟಿಕೆಟ್ ಆಕಾಂಕ್ಷಿಗಳ ಜೊತೆ ಪಕ್ಷದ ನಾಯಕರು ಮಾತನಾಡಬೇಕಿತ್ತು ಎನ್ನುತ್ತಾರೆ. ಟಿಕೆಟ್ ಘೋಷಣೆ ಮಾಡುವ ಕೊನೆಯ ಕ್ಷಣದಲ್ಲಿ ಮಾತನಾಡುವ ಬದಲು ಮೂರ್ನಾಲ್ಕು ತಿಂಗಳ ಮುನ್ನವೇ ಅವರೊಂದಿಗೆ ಸಮಾಲೋಚನೆ ನಡೆಸಬೇಕಿತ್ತು ಅನ್ನೋ ವಾದವೂ ಇದೆ. ಏಕೆಂದರೆ ಬಹುತೇಕ ಹಿರಿಯ ಶಾಸಕರು ಚುನಾವಣೆಗೆ ಸಿದ್ದತೆ ಮಾಡಿಕೊಂಡಿದ್ದರು. ತಮಗೇ ಟಿಕೆಟ್ ಸಿಗುತ್ತೆ ಅನ್ನೋ ವಿಶ್ವಾಸದಲ್ಲಿ ಸಂಘಟನೆಯಲ್ಲಿ ತೊಡಗಿದ್ದರು. ಈಗ ಅವರಿಗೆ ನಿರಾಸೆಯಾಗಿದೆ ಅನ್ನೋ ಮಾತುಗಳು ಕೇಳಿ ಬಂದಿವೆ.

ತಾನೇ ತಾನಾಗಿ ಕರಗುತ್ತಾ ಬಂಡಾಯ?

ಟಿಕೆಟ್ ಘೋಷಣೆ ಬಳಿಕ ಪಕ್ಷದಲ್ಲಿ ಎದ್ದಿರುವ ಬಂಡಾಯ ಶಮನ ಮಾಡುವ ಜವಾಬ್ದಾರಿಯನ್ನು ಸಿಎಂ ಬಸವರಾಜ ಬೊಮ್ಮಾಯಿ ಹಾಗೂ ಮಾಜಿ ಸಿಎಂ ಯಡಿಯೂರಪ್ಪ ಅವರಿಗೆ ನಿಡಲಾಗಿದೆ. ಈ ನಾಯಕರು ಬಂಡಾಯ ಶಮನಕ್ಕೆ ಸಾಕಷ್ಟು ಪ್ರಯತ್ನ ನಡೆಸುತ್ತಿದ್ದಾರೆ. ಜೊತೆಯಲ್ಲೇ ನಾಮಪತ್ರ ಸಲ್ಲಿಕೆಯ ಅವಧಿ ಮುಗಿಯುವ ಹೊತ್ತಿಗೆ ಬಂಡಾಯವೂ ಸಹಜವಾಗಿಯೇ ಕಡಿಮೆ ಆಗಲಿದೆ ಅನ್ನೋ ವಿಶ್ವಾಸದಲ್ಲಿದ್ದಾರೆ. ಇನ್ನು ಟಿಕೆಟ್ ಸಿಗದೆ ಬಂಡಾಯ ಎದ್ದವರ ಸಂಖ್ಯೆ ಹೆಚ್ಚಾಗಿದೆ ಅನ್ನೋದು ಪಕ್ಷದ ಜನಪ್ರಿಯತೆಯ ಸಂಕೇತ ಎಂಬ ಭಾವನೆಯೂ ನಾಯಕರಲ್ಲಿದೆ!

ಟಿಕೆಟ್ ಹಂಚಿಕೆ ವೇಳೆ ಬಿಜೆಪಿಯಂಥಾ ದೊಡ್ಡ ಪಕ್ಷಗಳಲ್ಲಿ ಬಂಡಾಯ ಸಹಜ. ನಮ್ಮದು ಕೇಡರ್ ಆಧಾರಿತ ಪಕ್ಷ. ಹೀಗಾಗಿ, ನಾವು ಅಭ್ಯರ್ಥಿಗಿಂತಾ ಹೆಚ್ಚಾಗಿ ಆಯಾ ಕ್ಷೇತ್ರಗಳ ಆಶೋತ್ತರಗಳತ್ತ ಗಮನ ಕೊಡುತ್ತೇವೆ. ಬಂಡಾಯದಿಂದಾಗಿ ನಮಗೆ ಕೆಲವು ಮತಗಳ ನಷ್ಟ ಆಗಬಹುದು. ಆದ್ರೆ, ನಮ್ಮ ಅಧಿಕೃತ ಅಭ್ಯರ್ಥಿ ಗೆದ್ದೇ ಗೆಲ್ಲುತ್ತಾರೆ ಅನ್ನೋ ವಿಶ್ವಾಸ ಬಿಜೆಪಿ ನಾಯಕರಲ್ಲಿದೆ.

ಸಹಜವಾಗಿ ಯಾವುದೇ ಪಕ್ಷದ ಟಿಕೆಟ್‌ಗಾಗಿ ಪ್ರತಿ ಕ್ಷೇತ್ರದಲ್ಲೂ ಹಲವು ಆಕಾಂಕ್ಷಿಗಳು ಇರುತ್ತಾರೆ. ತಮಗೆ ಟಿಕೆಟ್ ಸಿಕ್ಕಿಲ್ಲ ಎಂದು ಅಸಮಾಧಾನಗೊಂಡು ಪಕ್ಷ ಬಿಡೋದು ಅಥವಾ ಒಳಗೊಳಗೇ ಪಕ್ಷ ವಿರೋಧಿ ಚಟುವಟಿಕೆ ನಡೆಸೋದು ಸಹಜ. ಇದೀಗ ಬಿಜೆಪಿ ಕೂಡಾ ಇದೇ ರೀತಿಯ ಬಂಡಾಯದ ಬಿಸಿ ಎದುರಿಸುತ್ತಿದೆ. ಆದ್ರೆ, ಬಂಡಾಯದ ಪ್ರಮಾಣ ದೊಡ್ಡ ಮಟ್ಟದಲ್ಲಿ ಇದೆ ಅನ್ನೋದೇ ಗಮನಾರ್ಹ ಸಂಗತಿ.