ವಿಶ್ವದ ಶ್ರೀಮಂತ ವ್ಯಕ್ತಿ ಮುಖೇಶ್ ಅಂಬಾನಿ ಹಾಗೂ ನೀತಾ ಅಂಬಾನಿ ಕಿರಿಯ ಪುತ್ರ ಅನಂತ್ ಅಂಬಾನಿ ಹಾಗೂ ರಾಧಿಕಾ ಅದ್ದೂರಿಯಾಗಿ ಮದುವೆಯಾಗಿದ್ದಾರೆ.ಈ ಬೆನ್ನಲ್ಲೇ ವಿವಾದಾತ್ಮಕ ಹೇಳಿಕೆಗಳ ಮೂಲಕವೇ ಸದ್ದು ಮಾಡುವ ನಟ ಕಮಾಲ್ ಆರ್ ಖಾನ್ ಹೇಳಿಕೆಯೊಂದು ವೈರಲ್ ಆಗಿದೆ.
ನಟ ಜಾವೇದ್ ಜಾಫ್ರಿ ಮಗ ಮೀಜನ್ ಜಾವೇದ್ ಅವರು ರಾಧಿಕಾರನ್ನು ಅನಂತ್ ಅಂಬಾನಿಗೆ ಪರಿಚಯಿಸಿದ್ದರು. ಅದಕ್ಕಾಗಿಯೇ ಅಂಬಾನಿ ಕುಟುಂಬ ಸುಮಾರು 30 ಕೋಟಿ ರೂ. ಮೌಲ್ಯದ ಅಪಾರ್ಟ್ಮೆಂಟ್ ಅನ್ನು ಮೀಜನ್ ಜಾವೇದ್‌ಗೆ ಉಡುಗೊರೆಯಾಗಿ ಕೊಟ್ಟಿದ್ದಾರೆ ಎಂದು ಟ್ವೀಟ್ ಮೂಲಕ ಆರೋಪಿಸಿದ್ದಾರೆ. ಇದೀಗ ಈ ಬಗ್ಗೆ ನಟ ಜಾವೇದ್ ಜಾಫ್ರಿ ಹೇಳಿಕೆಯನ್ನು ತಳ್ಳಿ ಹಾಕಿದ್ದಾರೆ.
ಕಮಾಲ್ ಆರ್ ಖಾನ್ ತಮ್ಮ ಎಕ್ಸ್‌ ಹ್ಯಾಂಡಲ್‌ನಲ್ಲಿ, ʻʻನಟ ಜಾವೇದ್ ಜಾಫ್ರಿ ಮಗ ಮೀಜನ್ ಜಾವೇದ್ ಜಾಫ್ರಿ ಮುಂಬೈನ ಸಂಧು ಪ್ಯಾಲೆಸ್‌ನಲ್ಲಿ ತಂಗಿದ್ದಾರೆ, ಏಕೆಂದರೆ ಮುಕೇಶ್‌ ಅಂಬಾನಿ ಅವರಿಗೆ ₹ 30 ಕೋಟಿ ಮೌಲ್ಯದ ಅಪಾರ್ಟ್ಮೆಂಟ್ ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ. ವಾಸ್ತವವಾಗಿ ಮೀಜಾನ್ ಅವರು ರಾಧಿಕಾ ಮರ್ಚೆಂಟ್ ಅವರನ್ನು ಅನಂತ್ ಅಂಬಾನಿಗೆ ಪರಿಚಯಿಸಿದರುʼʼಎಂದು ಬರೆದುಕೊಂಡಿದ್ದಾರೆ. ಈ ಹೇಳಿಕೆಯನ್ನು ಜಾವೇದ್ ಜಾಫ್ರಿ ತಳ್ಳಿ ಹಾಕಿದ್ದಾರೆ. ಜಾವೇದ್ ಅವರು ಕಮಾಲ್ ಅವರ ಟ್ವೀಟ್ ಅನ್ನು ರೀ ಪೋಸ್ಟ್ ಮಾಡಿ ಏನು ಬೇಕಾದರೂ ಬೇಕಾ ಬಿಟ್ಟಿ ಮಾತನಾಡುತ್ತಾರೆ ಎಂಬರ್ಥದಲ್ಲಿ ಟ್ವೀಟ್ ಮಾಡಿದ್ದಾರೆ . ನೆಟ್ಟಿಗರು ಕೂಡ ʻಕೆಆರ್‌ಕೆ ಇನ್ನೂ ವಾಟ್ಸಾಪ್ ಫಾರ್ವರ್ಡ್‌ಗಳನ್ನು ನಂಬುತ್ತಾರೆʼಎಂದು ಕಮೆಂಟ್‌ ಮಾಡಿದ್ದಾರೆ.
ಮೀಜನ್ ಜಾವೇದ್ ಹಾಗೂ ಅನಂತ್ ಅಂಬಾನಿ ಆತ್ಮೀಯ ಸ್ನೇಹಿತರು. ಮೀಜನ್ ಜಾವೇದ್ ಎಲ್ಲಾ ಮದುವೆಯ ಹಬ್ಬಗಳಲ್ಲಿ ಭಾಗವಹಿಸುತ್ತಿದ್ದರು. ಮೀಜಾನ್ ಅವರು ʻಪದ್ಮಾವತ್ʼ, ʻಬಾಜಿರಾವ್ ಮಸ್ತಾನಿʼ ಮತ್ತು ʻಗಂಗೂಬಾಯಿ ಕಥಿವಾಡಿʼಯಲ್ಲಿ ಸಂಜಯ್ ಲೀಲಾ ಬನ್ಸಾಲಿ ಅವರಿಗೆ ಸಹಾಯಕ ನಿರ್ದೇಶಕರಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಅವರು ಬನ್ಸಾಲಿಯವರ 2019 ರ ನಿರ್ಮಾಣದ ಮಲಾಲ್‌ನಲ್ಲಿ ಚಲನಚಿತ್ರ ನಿರ್ಮಾಪಕರ ಸೋದರ ಸೊಸೆ ಶರ್ಮಿನ್ ಸೆಗಲ್ ಎದುರು ನಾಯಕನಾಗಿ ನಟಿಸಿದ್ದಾರೆ.
