ಕಾಸರಗೋಡು: ನೀರ್ಚಾಲು ಸಮೀಪದ ಮುಂಡಿತ್ತಡ್ಕದ ಪಳ್ಳದಲ್ಲಿರುವ ಮನೆಯೊಂದರಲ್ಲಿ ನಿಷೇಧಿತ 1000 ರೂಪಾಯಿ ಮುಖಬೆಲೆಯ ನೋಟಿನ ಜೆರಾಕ್ಸ್‌ ಪ್ರತಿಗಳ ಬೃಹತ್‌ ಸಂಗ್ರಹ ಬಚ್ಚಿಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದೆ.
ಮೂರು ಗೋಣಿ ಚೀಲಗಳಲ್ಲಿ ಈ ನಕಲಿ ನೋಟುಗಳು ಸಿಕ್ಕಿವೆ. ಬದಿಯಡ್ಕ ಎಸ್‌ಐ ಕೆ.ಪಿ.ವಿನೋದ್‌ ಕುಮಾರ್‌ ಅವರಿಗೆ ದೊರೆತ ಗೌಪ್ಯ ಮಾಹಿತಿ ಮೇರೆಗೆ ತನಿಖೆ ನಡೆಸಲಾಗಿದೆ. ಹೆಚ್ಚಿನ ತನಿಖೆಗಾಗಿ ಪೊಲೀಸರು ನೋಟುಗಳು ಪತ್ತೆಯಾದ ಮನೆಯ ಮಾಲೀಕ ಚೆರ್ಕಳ ನಿವಾಸಿ ಶಾಫಿ ಎಂಬಾತನನ್ನು ಠಾಣೆಗೆ ಕರೆಸಿ ವಿಚಾರಣೆ ನಡೆಸಿದ್ದಾರೆ.
ಚೀಲದಲ್ಲಿ ನಕಲಿ ನೋಟು ಸಂಗ್ರಹ
1434 ಕಟ್ಟುಗಳನ್ನಾಗಿಸಿ ನೋಟುಗಳನ್ನು ಪ್ಲಾಸ್ಟಿಕ್‌ ಚೀಲದಲ್ಲಿ ತುಂಬಿಸಿಡಲಾಗಿತ್ತು. ಕಟ್ಟುಗಳ ಹೊರ ಭಾಗದಲ್ಲಿ ಜೆರಾಕ್ಸ್‌ ಪ್ರತಿಯ ನೋಟುಗಳು ಅದರೊಳಗೆ ಸಾಮಾನ್ಯ ಕಾಗದಗಳನ್ನು ಇರಿಸಲಾಗಿದೆ. ಕೆಲವು ದಿನಗಳಿಂದ ಹಗಲು ರಾತ್ರಿ ವ್ಯತ್ಯಾಸವಿಲ್ಲದೆ ಜನವಾಸ ಇಲ್ಲದ ಮನೆಗೆ ಕಾರುಗಳ ಸಹಿತ ವಾಹನಗಳು ತಲುಪುತ್ತಿರುವುದನ್ನು ಕಂಡು ಸಂಶಯ ಮೂಡಿದ ನಾಗರಿಕರು ಪೊಲೀಸರಿಗೆ ಮಾಹಿತಿ ನೀಡಿರುವುದರಿಂದ ಈ ಬಗ್ಗೆ ತನಿಖೆ ನಡೆಸಿದಾಗ ಈ ಪ್ರಕರಣ ಬೆಳಕಿಗೆ ಬಂದಿದೆ.
ವಾಹನಗಳಲ್ಲಿ ಬಂದು ಅಪರಿಚಿತರು ಮನೆಯೊಳಗೆ ಪ್ರವೇಶಿಸಿದ ಬಳಿಕ ಒಳಗಿನಿಂದ ಬಾಗಿಲು ಮುಚ್ಚುವುದು ಕೂಡ ಗಮನಕ್ಕೆ ಬಂದಿರುವುದರಿಂದ ಸಂಶಯ ಹೆಚ್ಚಲು ಕಾರಣವಾಯಿತು. ನಿಷೇಧಿತ ನೋಟುಗಳ ಪ್ರತಿಯ ಬೃಹತ್‌ ಸಂಗ್ರಹವನ್ನು ಸಂಶಯಾಸ್ಪದ ರೀತಿಯಲ್ಲಿ ಯಾಕಾಗಿ ಈ ಮನೆಯಲ್ಲಿ ಸಂಗ್ರಹಿಸಿಡಲಾಗಿದೆ ಎಂಬ ಬಗ್ಗೆ ತನಿಖೆಯಿಂದ ತಿಳಿದು ಬರಬೇಕಿದೆ.
ಸಿನಿಮಾಗಾಗಿ ನಕಲಿ ನೋಟು ತಯಾರಿ
ಪೊಲೀಸ್‌ ಇಂಟಲಿಜೆನ್ಸ್‌ ಅಧಿಕಾರಿಗಳು ನಡೆಸಿದ ಪ್ರಾಥಮಿಕ ತನಿಖೆಯಲ್ಲಿ ಘಟನೆಯ ಹೊರ ರಾಜ್ಯದ ಹಾಗೂ ನೇಪಾಳದ ಕೆಲವರ ನಂಟಿರುವುದಾಗಿ ಶಂಕೆ ಇದೆ. ಹಲವು ವಂಚನಾ ತಂಡಗಳು ದೇಶದ ವಿವಿಧ ಭಾಗಗಳಲ್ಲಿ ಕಾರ್ಯಾಚರಿಸುತ್ತಿರುವುದಾಗಿ ಸೂಚನೆಯಿದ್ದು, ಮುಂಡ್ಯತ್ತಡ್ಕ, ಪಳ್ಳದ ಮನೆಯಿಂದ ವಶಪಡಿಸಿದ ಮುದ್ರಿತ ಪ್ರತಿ ನೋಟಿನ ಹಿಂದಿನ ನಿಗೂಢತೆ ಬಹಿರಂಗಗೊಳ್ಳಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಸಿನಿಮಾ ಚಿತ್ರೀಕರಣಕ್ಕಾಗಿ ನೋಟುಗಳನ್ನು ಬಳಸುತ್ತಿರುವುದಾಗಿ ಹೇಳಲಾಗುತ್ತಿದ್ದರೂ ಅದನ್ನು ಗುಪ್ತವಾಗಿರಿಸಿಕೊಂಡಿರುವುದು ಯಾಕಾಗಿ ಎಂಬುದು ನಿಗೂಢವಾಗಿದೆ.
ನಕಲಿ ನೋಟು ಪ್ರಕರಣದಲ್ಲಿ ಮಹಿಳಾ ಅಧಿಕಾರಿ ಬಂಧನ
ನಕಲಿ ನೋಟು ಪ್ರಕರಣದಲ್ಲಿಇತ್ತೀಚೆಗೆ ಕೇರಳದ ಆಲಪ್ಪುಳ ಜಿಲ್ಲೆಯಲ್ಲಿ ಮಹಿಳಾ ಕೃಷಿ ಅಧಿಕಾರಿಯನ್ನು ಬಂಧಿಸಲಾಗಿತ್ತು. ಆಲಪ್ಪುಳ ಜಿಲ್ಲೆಯಲ್ಲಿ ಕೃಷಿ ಅಧಿಕಾರಿಯಾಗಿ ಕಾರ‍್ಯನಿರ್ವಹಿಸುತ್ತಿದ್ದ ಜಿಶಾಮೋಲ್‌ ಬಂಧಿತರು. ಜಿಶಾಳ ವ್ಯಕ್ತಿತ್ವ ಅಷ್ಟು ಬೇಗ ಯಾರಿಗೂ ಅನುಮಾನ ಬರುವಂತಿರಲಿಲ್ಲ. ಆರ್ಥಿಕವಾಗಿ ಸದೃಢರಾಗಿರುವ 39ರ ಹರೆಯದ ಅವರು ವಿವಿಧ ಕ್ಷೇತ್ರಗಳಲ್ಲಿ ತನ್ನ ಅಸ್ತಿತ್ವವನ್ನು ತೋರಿಸಿದ್ದರು. ವಿಶೇಷವಾಗಿ ಮಾಡೆಲಿಂಗ್‌ ಮತ್ತು ಫ್ಯಾಷನ್‌ ಶೋಗಳಲ್ಲಿ ಸಕ್ರಿಯರಾಗಿದ್ದರು. ಫ್ಯಾಶನ್‌ ಶೋ ಮತ್ತು ಮಾಡೆಲಿಂಗ್‌ ಮೂಲಕ ಉತ್ತಮ ಆದಾಯವನ್ನು ಹೊಂದಿದ್ದರು. ಇದರೊಂದಿಗೆ ಕೃಷಿ ಅಧಿಕಾರಿಯ ಕೆಲಸ. ಜಿಶಾ ಮೋಳ್‌ ನೀಡಿದ 500 ರೂ. ನಕಲಿ ನೋಟುಗಳನ್ನು ಬೇರೊಬ್ಬರು ಬ್ಯಾಂಕ್‌ಗೆ ನೀಡಿದಾಗ ದೊಡ್ಡ ವಂಚನೆ ಹೊರಬಿದ್ದಿತ್ತು.
