ಸ್ಯಾಂಡಲ್‌ವುಡ್ ನಟ ಡಾಲಿ ಧನಂಜಯ ನಟನೆಯ ಝೀಬ್ರ ಸಿನಿಮಾ ಬಾಕ್ಸ್ ಆಫೀಸ್ ನಲ್ಲಿ ಸದ್ದು ಮಾಡುತ್ತಿದೆ. ತೆಲುಗು ಮತ್ತು ಕನ್ನಡ ಎರಡು ಭಾಷೆಯಲ್ಲೂ ರಿಲೀಸ್ ಆಗಿರುವ ಝೀಬ್ರ ಸಿನಿಮಾದಲ್ಲಿ ಡಾಲಿ ನಟನೆ ನೋಡಿ ಅಭಿಮಾನಿಗಳು ಫುಲ್ ಥ್ರಿಲ್ ಆಗಿದ್ದಾರೆ. ತೆಲುಗು ಪ್ರೇಕ್ಷಕರು ಧನಂಜಯ ಅವರ ನಟನೆಗೆ ಫಿದಾ ಆಗಿದ್ದು ಟಾಲಿವುಡ್ ನಿಂದ ಡಾಲಿಗೆ ಭರ್ಜರಿ ಆಫರ್ ಬರೋಕೆ ಶುರುವಾಗಿದೆ.
ಝೀಬ್ರ ಸಿನಿಮಾ ರಿಲೀಸ್ ಆಗಿ ಸಕ್ಸಸ್ ಕಾಣುತ್ತಿದ್ದಂತೆ ತೆಲುಗಿನಲ್ಲಿ ಡಾಲಿಗೆ ಡಿಮ್ಯಾಂಡ್ ಜಾಸ್ತಿಯಾಗಿದೆ. ಈ ಮೊದಲು ವಿಲನ್ ಪಾತ್ರಗಳಿಗೆ ಹೆಚ್ಚು ಬೇಡಿಕೆ ಇತ್ತು. ಆದರೀಗ ಝೀಬ್ರ ರಿಲೀಸ್ ಆಗುತ್ತಿದ್ದಂತೆ ಹೀರೋ ಪಾತ್ರಗಳಿಗೆ ಆಫರ್ ಹೆಚ್ಚಾಗಿದೆ. ಝೀಬ್ರ ಸಿನಿಮಾದಲ್ಲಿ ಡಾಲಿ ನಟನೆ, ಸ್ಟೈಲ್‌ಗೆ ಪ್ರೇಕ್ಷಕರು ಮಾತ್ರವಲ್ಲದೇ ತೆಲುಗು ಸಿನಿಮಾ ಇಂಡಸ್ಟ್ರಿ ಕೂಡ ಫಿದಾ ಆಗಿದೆ. ಹಾಗಾಗಿಯೇ ಡಾಲಿ ತೆಲುಗು ಇಂಡಸ್ಟ್ರಿಯಲ್ಲಿ ಇರಲಿ, ತೆಲುಗು ಪ್ರೇಕ್ಷಕರನ್ನು ರಂಜಿಸಲಿ ಎನ್ನುವ ಕಾರಣಕ್ಕೆ ತೆಲುಗಿನ ದೊಡ್ಡ ದೊಡ್ಡ ನಿರ್ಮಾಣ ಸಂಸ್ಥೆಗಳು ಡಾಲಿ ಹಿಂದೆ ಬಿದ್ದಿವೆ ಎನ್ನಲಾಗುತ್ತಿದೆ.
ಈಗಾಗಲೇ ಪೀಪಲ್ ಮೀಡಿಯಾ ಫ್ಯಾಕ್ಟರಿ, ಹಯಾಗ್ರೀವ ಕ್ರಿಯೇಷನ್, ಪ್ರೈಮ್ ಶೋ ಎಂಟಟೈನ್‌ಮೆಂಟ್, ಸತ್ಯ ಜ್ಯೋತಿ ಫಿಲ್ಮ್ ಸೇರಿದಂತೆ ತೆಲುಗಿನ ಅನೇಕ ದೊಡ್ಡ ಬ್ಯಾನರ್‌ಗಳು ಡಾಲಿ ಜೊತೆ ಸಿನಿಮಾ ಮಾಡಲು ಕಾಯುತ್ತಿದ್ದಾರೆ. ಈಗಾಗಲೇ ಧನಂಜಯ ಅವರ ಕಾಲ್‌ಶೀಟ್‌ಗಾಗಿ ಈ ಬ್ಯಾನರ್‌ಗಳು ಎದುರು ನೋಡುತ್ತಿವೆ. ಒಂದು ವೇಳೆ ಡಾಲಿ ಕಡೆಯಿಂದ ಎಲ್ಲಾ ಬ್ಯಾನರ್‌ಗಳಿಗೆ ಗ್ರೀನ್ ಸಿಗ್ನಲ್ ಸಿಕ್ಕರೇ ತೆಲುಗಿನಲ್ಲೇ ಫಿಕ್ಸ್ ಆಗುವುದು ಬಹುತೇಕ ಖಚಿತ.
ಝೀಬ್ರ ಪ್ರೀ ರಿಲೀಸ್ ಈವೆಂಟ್ ನಲ್ಲಿ ತೆಲುಗು ಮೆಗಾಸ್ಟಾರ್ ಚಿರಂಜೀವಿ ಅವರು ಕೂಡ ಡಾಲಿ ಅವರನ್ನು ಹಾಡಿಹೊಗಳಿದ್ದರು. ಧನಂಜಯ ತೆಲುಗಿನಲ್ಲಿ ಸ್ಟಾರ್ ಆಗಿ ಸೆಟಲ್ ಆಗಲಿದ್ದಾರೆ, ಮುಂದಿನ ಸ್ಟಾರ್ ಎಂದು ಭವಿಷ್ಯ ನುಡಿದಿದ್ದರು. ಅದರಂತೆ ಇದೀಗ ಡಾಲಿಗೆ ಆಫರ್‌ಗಳು ಹೆಚ್ಚಾಗಿದೆ. ಆದರೆ ಡಾಲಿಯ ಮುಂದಿನ ನಡೆ ಏನು ಎನ್ನವುದು ಈಗ ಕುತೂಹಲ ಮೂಡಿಸಿದೆ. ಈ ಮಧ್ಯೆ ಇತ್ತೀಚೆಗೆ ನಿಶ್ಚಿತಾರ್ಥ ಮಾಡಿಕೊಂಡಿರುವ ಡಾಲಿ ಮದುವೆ ಸಂಭ್ರಮದಲ್ಲಿದ್ದಾರೆ.
