ರಾಮನಗರ: ನನ್ನ ನಾಮಪತ್ರದ ಬಗ್ಗೆ ನಮ್ಮ ಕುಟುಂಬದಲ್ಲಿ ಇನ್ನೂ ಚರ್ಚೆಯಾಗಿಲ್ಲ. ತಾತನವರಾದ ದೇವೇಗೌಡರ ಜೊತೆಗೆ ಚರ್ಚಿಸಿ ಆನಂತರ ನನ್ನ ನಾಮಪತ್ರ ಸಲ್ಲಿಕೆಯ ದಿನಾಂಕವನ್ನು ನಿಗದಿ ಮಾಡುತ್ತೇವೆ. ದೇವೇಗೌಡರು ಹೇಳಿದ ದಿನಾಂಕದಂದೇ ನಾನು ನನ್ನ ನಾಮಪತ್ರ ಸಲ್ಲಿಸುತ್ತೇನೆ’’ ಎಂದು ಜೆಡಿಎಸ್ ಪಕ್ಷದ, ಜೆಡಿಎಸ್ ಯುವ ಘಟಕದ ರಾಜ್ಯಾಧ್ಯಕ್ಷ ನಿಖಿಲ್ ಕುಮಾರಸ್ವಾಮಿ ಹೇಳಿದ್ದಾರೆ.
ರಾಮನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “ರಾಮನಗರದಲ್ಲಿ ಹೇಳಿಕೆ. ಕುಮಾರಸ್ವಾಮಿ ಅವರು ಹೇಳಿದ ಮೇಲೆ ನನಗೆ ನಾಮಪತ್ರ ಸಲ್ಲಿಕೆ ವಿಚಾರ ಗೊತ್ತಾಗಿದ್ದು. ದೇವೇಗೌಡರ ಬಳಿ ಚರ್ಚೆ ಮಾಡಿ ಸೂಕ್ತವಾದ ದಿನಾಂಕ ನಿಗದಿ ಮಾಡುತ್ತೇವೆ ಎಂದು ಅವರು ಹೇಳಿದರು.
ಇನ್ನು, ನಾಮಪತ್ರ ಸಲ್ಲಿಸುವಾಗ ದೇವೇಗೌಡರು ನಿಮ್ಮೊಂದಿಗೆ ಬರುತ್ತಾರಾ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ನಾಮಪತ್ರ ಸಲ್ಲಿಕೆ ದಿನ ದೇವೇಗೌಡರು ಬರುವ ಬಗ್ಗೆ ಚರ್ಚೆ ಆಗಿಲ್ಲ. ದೇವೆಗೌಡರಿಗೆ ವಯಸ್ಸಿನ ಕಾರಣ ಆರೋಗ್ಯದಲ್ಲಿ ಏರುಪೇರಿದೆ. ಅವರಿಗೆ ಈ ಸಮಯದಲ್ಲಿ ಒತ್ತಡ ಏರುವಂತಹದ್ದು ಸರಿಯಲ್ಲ. ಆದರೆ, ನಾನು ಇತ್ತೀಚೆಗೆ ಭೇಟಿಯಾಗಿದ್ದಾಗ ಅವರು, “ರಾಮನಗರ ತಂದೆ ತಾಯಿಯರ ಆಶೀರ್ವಾದಕ್ಕಾಗಿ ಒಮ್ಮೆ ಬರಬೇಕು” ಅಂತ ಹೇಳಿದ್ದರು. ಪಕ್ಷ ಕಟ್ಟುವಲ್ಲಿ ಅವರಿಗೆ ಇರುವ ಉತ್ಸಾಹ ನಮ್ಮ ಯುವಕರಲ್ಲಿರುವ ಉತ್ಸಾಹಕ್ಕಿಂತ ದೊಡ್ಡದು. ಬಹುಶಃ ಆರೋಗ್ಯ ಸರಿಯಿದ್ದರೆ ಅವರು ಮುಂದಿನ ದಿನಗಳಲ್ಲಿ ದೇವೇಗೌಡರು ಪಕ್ಷ ಸಂಘಟನೆಯಲ್ಲಿ ಭಾಗಿಯಾಗುತ್ತಾರೆ ಎಂದು ಹೇಳಿದರು.
ಕುತಂತ್ರ ನಡೆಸಲು ಸಾಧ್ಯವಿಲ್ಲ
ಚನ್ನಪಟ್ಟಣದಲ್ಲಿ ಕುಮಾರಸ್ವಾಮಿ ಅವರ ವಿರುದ್ಧ ಯಾರೂ ಕುತಂತ್ರ ನಡೆಸಲು ಆಗುವುದಿಲ್ಲ ಎಂದು ಇದೇ ವೇಳೆ ನಿಖಿಲ್ ಗುಡುಗಿದರು. “ಕುಮಾರಸ್ವಾಮಿ ಅವರು ಒಬ್ಬರೇ ರಾಜ್ಯದ ಜನರಿಗಾಗಿ ಹೋರಾಟ ಮಾಡುತ್ತಿದ್ದಾರೆ. ನಾನು ಸೇರಿದಂತೆ ತಾಲೂಕಿನ ಮುಖಂಡರು ಎಲ್ಲರು ಕುಮಾರಸ್ವಾಮಿ ಅವರ ಪರವಾಗಿದ್ದಾರೆ. ರಾಮನಗರದಂತೆ ಚನ್ನಪಟ್ಟಣಕ್ಕೂ ಕೂಡ ಸಾಕಷ್ಟು ಅಭಿವೃದ್ಧಿ ಮಾಡಿದ್ದಾರೆ. ಚನ್ನಪಟ್ಟಣ ಕ್ಷೇತ್ರಕ್ಕೂ ಹಣ ಬಿಡುಗಡೆ ಮಾಡಿಸಿ ಕೆಲಸ ಮಾಡಿಸಿದ್ದಾರೆ. ಹೀಗಾಗಿ ಕುಮಾರಸ್ವಾಮಿ ಅವರನ್ನು ಕ್ಷೇತ್ರದ ಜನತೆ ಕೈ ಹಿಡಿಯುತ್ತಾರೆ’’ ಎಂದು ಹೇಳಿದರು.
