ಸಿದ್ದರಾಮಯ್ಯ ವಿರುದ್ಧ ಈ ಪ್ರಬಲ ನಾಯಕರನ್ನು ನಿಲ್ಲಿಸಲು ಬಿಜೆಪಿ ಪ್ಲ್ಯಾನ್!

ಮೈಸೂರು: ವರುಣಾ ಚುನಾವಣಾ ಕಣದಲ್ಲಿ ಸಿದ್ದರಾಮಯ್ಯನವರ ಎದುರಿಗೆ ಬಿಜೆಪಿ ವತಿಯಿಂದ ಯಾರು ನಿಲ್ತಾರೆ ಎಂಬುದು ಇನ್ನೂ ಕುತೂಹಲದ ಸಂಗತಿಯಾಗಿಯೇ ಉಳಿದಿದೆ. ಯಡಿಯೂರಪ್ಪನವರ ಪುತ್ರ ಬಿ.ವೈ. ವಿಜಯೇಂದ್ರ ಅವರೇ ಸಿದ್ದರಾಮಯ್ಯನವರ ಎದುರು ಬಿಜೆಪಿಯಿಂದ ಕಣಕ್ಕಿಳಿಯುತ್ತಾರೆ ಎಂದು ಹೇಳಲಾಗಿತ್ತು. ಆದರೆ, ಖುದ್ದು ಯಡಿಯೂರಪ್ಪನವರೇ ಅದನ್ನು ನಿರಾಕರಿಸಿದ್ದಾರೆ. ಅಲ್ಲಿಗೆ, ವರುಣಾದಲ್ಲಿ ಬಿಜೆಪಿಯ ಹುರಿಯಾಳು ಯಾರು ಎಂಬುದು ಮತ್ತಷ್ಟು ನಿಗೂಢವಾಗಿದೆ. ಅದು ಬಿಜೆಪಿಯ ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ ಮಾಡಿದ ನಂತರವಷ್ಟೇ ಗೊತ್ತಾಗಲಿದೆ. ಬಿಜೆಪಿಯ ಲಿಸ್ಟ್ ಏ. 8 ಅಥವಾ 9ರಂದು ಬಿಡುಗಡೆಯಾಗುವ ಸಾಧ್ಯತೆಗಳಿವೆ. ಸಿಎಂ ಬೊಮ್ಮಾಯಿ ಕೂಡ ಆ ಎರಡು ದಿನಗಳಲ್ಲೇ ಬಿಜೆಪಿ ಲಿಸ್ಟ್ ಬಿಡುಗಡೆಯಾಗುತ್ತದೆ ಎಂದು ಹೇಳಿದ್ದಾರೆ. ಅದರ ನಡುವೆಯೇ, ಈಗ ಈ ಪ್ರಬಲ ವ್ಯಕ್ತಿಯೊಬ್ಬರನ್ನು ನಿಲ್ಲಿಸಲು ಬಿಜೆಪಿ ಹೈಕಮಾಂಡ್ ಸಿದ್ಧತೆ ನಡೆಸಿದೆ ಎಂದು ಹೇಳಲಾಗಿದೆ. ಅವರು ಯಾರು, ಅವರನ್ನು ಏಕೆ ಬಿಜೆಪಿ ಆರಿಸಲು ಚಿಂತನೆ ನಡೆಸುತ್ತಿದೆ ಎಂಬುದಕ್ಕೆ ಇಲ್ಲಿದೆ ಉತ್ತರ.

​ವರುಣಾದಲ್ಲಿ ಲಿಂಗಾಯತರೇ ನಿರ್ಣಾಯಕ

ವರುಣಾ ಕ್ಷೇತ್ರದಲ್ಲಿ ಲಿಂಗಾಯತ ಮತದಾರರ ಸಂಖ್ಯೆ 55 ಸಾವಿರದಷ್ಟಿದೆ. ಅವರನ್ನು ಬಿಟ್ಟರೆ, ಕುರುಬರು 35 ಸಾವಿರದಷ್ಟಿದ್ದಾರೆ. ದಲಿತರು (ಎಡಗೈ- ಬಲಗೈ ಸೇರಿ) 43 ಸಾವಿರದಷ್ಟಿದ್ದಾರೆ. ಇನ್ನು, ನಾಯಕರ ಸಮುದಾಯದವರು 23 ಸಾವಿರ, ಒಕ್ಕಲಿಗರು 12 ಸಾವಿರ, ಇತರ ಹಿಂದುಳಿದ ವರ್ಗಗಳ ಸಮುದಾಯದವರು ಒಟ್ಟು 12 ಸಾವಿರದಷ್ಟು ಇದ್ದಾರೆ. ಇವರಲ್ಲಿ ಲಿಂಗಾಯತ ಮತಗಳು ಯಾವತ್ತೂ ಬಿಜೆಪಿಯ ಬೆನ್ನಿಗೆ ಇದ್ದೇ ಇರುತ್ತದೆ. ಹಾಗಾಗಿ, ಇಲ್ಲಿ ಅತಿ ಹೆಚ್ಚು ಮತದಾರರಿರುವ ಲಿಂಗಾಯತ ಸಮುದಾಯಕ್ಕೆ ಸೇರಿದ ವ್ಯಕ್ತಿಯನ್ನೇ ಅಭ್ಯರ್ಥಿಯನ್ನಾಗಿಸುವ ಲೆಕ್ಕಾಚಾರವಿದೆ.

​ಇತರ ಬಲಗಳ ಒಲವಿನ ಕಡೆಗೆ ಬಿಜೆಪಿ ಲೆಕ್ಕಾಚಾರ

ಲಿಂಗಾಯತರ ಬೆಂಬಲ ಯಾವತ್ತೂ ಬಿಜೆಪಿಗೆ ಹೇಗಿರುತ್ತೋ ಹಾಗೆಯೇ, ಒಕ್ಕಲಿಗರ ಬೆಂಬಲವೂ ಬಿಜೆಪಿಗೆ ಹಿಂದಿನಿಂದಲೂ ಇದೆ. ಅದರ ಜೊತೆಗೆ, ಇತ್ತೀಚೆಗೆ ಒಕ್ಕಲಿಗರಿಗೆ ಇತರೆ ಹಿಂದುಳಿದ ವರ್ಗಗಳ ಅಡಿಯಲ್ಲಿ (ಒಬಿಸಿ) ಮೀಸಲಾತಿ ಕಲ್ಪಿಸಲಾಗಿದೆ. ಹಾಗಾಗಿ, ಒಕ್ಕಲಿಗರ ಒಲವು ತಮ್ಮ ಪಕ್ಷಕ್ಕೆ ಕಟ್ಟಿಟ್ಟ ಬುತ್ತಿ ಎಂದು ಬಿಜೆಪಿ ತಿಳಿದಿದೆ. ಇದರ ಜೊತೆಗೆ, ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡದ ಮೀಸಲಾತಿಯನ್ನು ಹೆಚ್ಚಿಸಿರುವುದರಿಂದ, ಒಳಮೀಸಲಾತಿಯ ಪ್ರಮಾಣವನ್ನು ಹೆಚ್ಚಿಸಿರುವುದರಿಂದ ಎಸ್ಸಿ, ಎಸ್ಟಿ, ದಲಿತ ಸಮುದಾಯಗಳ ಮತಗಳಲ್ಲಿ ಶೇ. 75ರಷ್ಟಾದರೂ ತಮ್ಮ ಪಾಲಿಗೆ ಬರುತ್ತವೆ ಎಂಬ ಲೆಕ್ಕಾಚಾರ ಬಿಜೆಪಿಯದ್ದು. ಹೀಗಾಗಿ, ಲಿಂಗಾಯಿತ ಅಭ್ಯರ್ಥಿಯನ್ನು ಕಣಕ್ಕಿಳಿಸಿದರೆ, ಕ್ಷೇತ್ರದಲ್ಲಿರುವ ಪ್ರಬಲ ಜಾತಿಯ ಮತಗಳು ಖಾತ್ರಿಯಾಗಿ, ಅದರ ಜೊತೆಗೆ ದಲಿತ, ಹಿಂದುಳಿದ ವರ್ಗಗಳ ಮತಗಳೂ ಸಿಗಬಹುದು ಎಂಬುದು ಬಿಜೆಪಿಯ ಲೆಕ್ಕಾಚಾರವಾಗಿದೆ.

​ಸೋಮಣ್ಣನವರನ್ನು ಕಣಕ್ಕಿಳಿಸಲು ಚಿಂತನೆ

ಈ ಬಾರಿಯ ಚುನಾವಣೆಯಲ್ಲಿ, ಸಿದ್ದರಾಮಯ್ಯನವರ ವಿರುದ್ಧ ಕಣಕ್ಕಿಳಿಸಲು ಬೆಂಗಳೂರಿನ ಗೋವಿಂದರಾಜ ನಗರ ಕ್ಷೇತ್ರದ ಶಾಸಕ ವಿ. ಸೋಮಣ್ಣ ಅವರನ್ನು ಕಣಕ್ಕಿಳಿಸಲು ಬಿಜೆಪಿ ಹೈಕಮಾಂಡ್ ಚಿಂತನೆ ನಡೆಸುತ್ತಿದೆ ಎನ್ನಲಾಗಿದೆ. ಸೋಮಣ್ಣನವರೇ ಏಕೆ ಎಂಬ ಪ್ರಶ್ನೆಗೆ ಪ್ರಬಲವಾದ ಅವರು ಲಿಂಗಾಯತ ಸಮುದಾಯಕ್ಕೆ ಸೇರಿದವರು ಎಂಬುದು. ವರುಣಾ ಕ್ಷೇತ್ರದಲ್ಲಿ ಲಿಂಗಾಯತ ಸಮುದಾಯದವರು ಹೆಚ್ಚಾಗಿ ಇರುವುದರಿಂದ, ಬಿಜೆಪಿಯೂ ಲಿಂಗಾಯತ ವ್ಯಕ್ತಿಯನ್ನೇ ಕಣಕ್ಕಿಳಿಸಲು ನಿರ್ಧರಿಸಿರುವುದರಿಂದ ಸೋಮಣ್ಣನವರೇ ಸೂಕ್ತ ಎನ್ನಲಾಗುತ್ತಿದೆ. ಲಿಂಗಾಯತರು 55 ಸಾವಿರ, ಒಕ್ಕಲಿಗರು 12 ಸಾವಿರ ಮತದಾರರು ಇರುವ ವರುಣಾದಲ್ಲಿ ದಲಿತರ ಮತಗಳೂ ಬಂದರೆ ಇನ್ನೂ ಅನುಕೂಲ ಎಂದು ಹೇಳಲಾಗುತ್ತಿದೆ.

​ಸೋಮಣ್ಣರನ್ನು ಕಣಕ್ಕಿಳಿಸುವ ಲೆಕ್ಕಾಚಾರದ ಹಿಂದೆ ಈ ಕಾರಣಗಳೂ ಇವೆ!

ಸೋಮಣ್ಣನವರನ್ನು ಇಳಿಸಲು ನಡೆಸಲಾಗುತ್ತಿರುವ ಚಿಂತನೆಯಲ್ಲಿ ಮತ್ತಷ್ಟು ಕಾರಣಗಳೂ ಇವೆ. ಸೋಮಣ್ಣ, ಬೇರುಮಟ್ಟದ ರಾಜಕೀಯವನ್ನು ಬಲ್ಲಂಥ ರಾಜಕಾರಣಿ. ಇನ್ನು ಎರಡನೇ ಕಾರಣ, ಸೋಮಣ್ಣನವರು ಮೊದಲು ಕಾಂಗ್ರೆಸ್ ನಲ್ಲಿ ಇದ್ದವರೇ. ಹಾಗಾಗಿ, ಅವರಿಗೆ ಕಾಂಗ್ರೆಸ್ಸಿನ ಒಳರಾಜಕಾರಣ, ಚುನಾವಣಾ ಪಟ್ಟುಗಳು ಗೊತ್ತು. ಹಾಗಾಗಿ, ಅವರೇ ಅಲ್ಲಿಗೆ ಸೂಕ್ತ ಎಂದು ಹೈಕಮಾಂಡ್ ಲೆಕ್ಕಾಚಾರ ಹಾಕುತ್ತಿದೆ. ಮೂರನೆಯದ್ದಾಗಿ, 2019ರಲ್ಲಿ ಬಿಜೆಪಿಯು ಅಧಿಕಾರಕ್ಕೆ ಬಂದಾಗ, ಸೋಮಣ್ಣನವರು ಮೈಸೂರು ಜಿಲ್ಲಾ ಉಸ್ತುವಾರಿ ಸಚಿವರಾಗಿ ಕೆಲಸ ಮಾಡಿದ್ದಾರೆ. ಅವರಿಗೆ ಆ ಜಿಲ್ಲೆಯ ರಾಜಕೀಯದ ಅರಿವಿದೆ. ಆ ಕಾರಣಕ್ಕಾಗಿಯೂ ಸೋಮಣ್ಣನವರನ್ನು ಅಲ್ಲಿ ಕಣಕ್ಕಿಳಿಸಲು ಚಿಂತನೆ ನಡೆಸಲಾಗುತ್ತಿದೆ ಎನ್ನಲಾಗಿದೆ.

Sudeep @ Politics: ಸುದೀಪ್ ಬಂದ್ರೆ BJP ಪಕ್ಷಕ್ಕೆ ಲಾಭ ಆಗುತ್ತೆ: ಶ್ರೀರಾಮುಲು

ವರುಣಾದಿಂದ ವಿಜಯೇಂದ್ರ ಸ್ಪರ್ಧೆ ಬಹುತೇಕ ಇಲ್ಲ!

ಮಾಜಿ ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪನವರ ಪುತ್ರ ಬಿ.ವೈ. ವಿಜಯೇಂದ್ರ ಅವರನ್ನು ಸಿದ್ದರಾಮಯ್ಯನವರ ವಿರುದ್ಧ ವರುಣಾದಲ್ಲಿ ಕಣಕ್ಕಿಳಿಸುವ ಬಗ್ಗೆ ವದಂತಿಗಳು ಹರಡಿದ್ದವು. ಮಾಧ್ಯಮಗಳಲ್ಲೂ ಈ ವಿಚಾರ ವರದಿಯಾಗಿತ್ತು. ಆದರೆ, ಖುದ್ದು ಬಿಎಸ್ ವೈ ಅವರೇ, ವಿಜಯೇಂದ್ರ ಅವರು ಶಿಕಾರಿಪುರದಿಂದಲೇ ಸ್ಪರ್ಧಿಸುತ್ತಾರೆ. ಯಾವುದೇ ಕಾರಣಕ್ಕೂ ವರುಣಾದಿಂದ ಸ್ಪರ್ಧಿಸಲು ಬಿಡುವುದಿಲ್ಲ ಎಂದಿದ್ದರು. ಅತ್ತ, ಯಡಿಯೂರಪ್ಪನವರ ಮತ್ತೊಬ್ಬ ಪುತ್ರ, ಶಿವಮೊಗ್ಗ ಸಂಸದ ಬಿ.ವೈ. ರಾಘವೇಂದ್ರ ಕೂಡ ಇದನ್ನೇ ಹೇಳಿದ್ದರು. ಅಲ್ಲಿಗೆ, ವಿಜಯೇಂದ್ರ ಅವರನ್ನು ವರುಣಾದಲ್ಲಿ ಕಣಕ್ಕಿಳಿಸುವ ವಿಚಾರ ಅಲ್ಲಿಗೆ ನೆನೆಗುದಿಗೆ ಬಿದ್ದಂತಾಗಿತ್ತು. ಆದರೆ, ಅದರ ಬೆನ್ನಲ್ಲೇ ಬಿಜೆಪಿಯಿಂದ ಯಾರು ಕಣಕ್ಕಿಳಿಯುತ್ತಾರೆ ಎಂಬ ಪ್ರಶ್ನೆಯೂ ಎದ್ದಿತ್ತು. ಈಗಾಗಲೇ ಸಿದ್ದರಾಮಯ್ಯನವರ ಸ್ಪರ್ಧೆಯ ವಿಚಾರದಿಂದಾಗಿ ಪ್ರತಿಷ್ಠೆಯ ಕಣವಾಗಿರುವ ವರುಣಾದಲ್ಲಿ ಯಾರನ್ನು ಕಣಕ್ಕಿಳಿಸಬೇಕು ಎಂದು ಬಿಜೆಪಿ ಕೂಡ ಗಂಭೀರವಾಗಿ ಚಿಂತನೆ ನಡೆಸುವಂತಾಗಿತ್ತು

​ಸೋಮಣ್ಣ ವರುಣಾಕ್ಕೆ ಹೋದರೆ ಪ್ರಿಯಾಕೃಷ್ಣಗೆ ಅನುಕೂಲ?

ಸದ್ಯಕ್ಕೆ ಸೋಮಣ್ಣನವರು ಗೋವಿಂದರಾಜ ನಗರದ ಶಾಸಕ. 2018ರಲ್ಲಿ ನಡೆದ ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಅವರು ಕಾಂಗ್ರೆಸ್ಸಿನ ಪ್ರಿಯಾ ಕೃಷ್ಣ ವಿರುದ್ಧ ಗೆಲುವು ಸಾಧಿಸಿದ್ದರು. ಈ ಬಾರಿಯ ಚುನಾವಣೆಯಲ್ಲೂ ಅವರು ಗೋವಿಂದರಾದ ನಗರ ವಿಧಾನಸಭಾ ಕ್ಷೇತ್ರದಿಂದಲೇ ಸ್ಪರ್ಧಿಸಲು ಪ್ರಯತ್ನಿಸಿದ್ದಾರೆ. ಅವರು ಬಿಜೆಪಿಯಿಂದ ಸ್ಪರ್ಧಿಸಿದರೆ ಅದು ಮತ್ತೆ ಈಗಾಗಲೇ ಈ ಕ್ಷೇತ್ರದಲ್ಲಿ ಕಾಂಗ್ರೆಸ್ ಟಿಕೆಟ್ ಪಡೆದಿರುವ ಪ್ರಿಯಾಕೃಷ್ಣರಿಗೆ ದೊಡ್ಡ ಸವಾಲಾಗುತ್ತದೆ. ಹಾಗಾಗಿ, ಸೋಮಣ್ಣ ಅವರೇನಾದರೂ ಕ್ಷೇತ್ರ ಬದಲಿಸಿ, ವರುಣಾಕ್ಕೆ ಶಿಫ್ಟ್ ಆದರೆ ಪ್ರಿಯಾಕೃಷ್ಣರಿಗೆ ಶುಭ ಸುದ್ದಿಯಾಗಲಿದ್ದು, ಈ ಬಾರಿಯ ಚುನಾವಣೆಯಲ್ಲಿ ಅವರಿಗೆ ಗೆಲುವು ಅನಾಯಾಸವಾಗಬಹುದು.