ಬೆಳಗಾವಿ: ಕಾಂಗ್ರೆಸ್‌ ಪಾಳೆಯದಲ್ಲಿ ಪ್ರತಿಸ್ಪರ್ಧಿಗಳ ಪೈಪೋಟಿಗೂ ಮುನ್ನವೇ ಬಂಡಾಯದ ಸವಾಲು ಎದುರಾಗಿದೆ. ಎರಡನೇ ಪಟ್ಟಿಯಲ್ಲಿ ಘೋಷಣೆ ಮಾಡಿರುವ ಜಿಲ್ಲೆಯ ನಾಲ್ಕೂ ವಿಧಾನಸಭಾ ಕ್ಷೇತ್ರಗಳಲ್ಲಿ ಟಿಕೆಟ್‌ ವಂಚಿತರು ಸಿಡಿದೆದ್ದಿದ್ದಾರೆ.
ಏ.6ರಂದು ಕಾಂಗ್ರೆಸ್‌ ಪಕ್ಷ ಪ್ರಕಟಿಸಿರುವ ಎರಡನೇ ಹಂತದ ಪಕ್ಷದ ಅಭ್ಯರ್ಥಿಗಳ ಪಟ್ಟಿಯಲ್ಲಿಅವಕಾಶ ಕಳೆದುಕೊಂಡಿರುವ ಆಕಾಂಕ್ಷಿ ಅಭ್ಯರ್ಥಿಗಳು ಈಗ ಅಸಮಾಧಾನಗೊಂಡಿದ್ದಾರೆ. ಹೆಸರು ಘೋಷಣೆಯಾಗುತ್ತಿದ್ದಂತೆ ಬೀದಿಗಿಳಿದಿರುವ ಆಕಾಂಕ್ಷಿ ಪರ ಅಭಿಮಾನಿಗಳು ಪ್ರತಿಭಟನೆ ಮೂಲಕ ಪಕ್ಷದ ವರಿಷ್ಠರನ್ನು ಎಚ್ಚರಿಸುವ ಪ್ರಯತ್ನ ಮಾಡಿದ್ದಾರೆ. ನಾಮಪತ್ರ ಸಲ್ಲಿಕೆಗೂ ಮುಂಚೆ ಅಭ್ಯರ್ಥಿಗಳ ಹೆಸರು ಬದಲಿಸದಿದ್ದರೆ ಸವದತ್ತಿ, ಗೋಕಾಕ್‌, ಚನ್ನಮ್ಮನ ಕಿತ್ತೂರು ಮತ್ತು ನಿಪ್ಪಾಣಿ ನಾಲ್ಕೂ ಕ್ಷೇತ್ರಗಳಲ್ಲಿ ಬಂಡಾಯ ಖಚಿತ ಎನ್ನುವ ಮುನ್ಸೂಚನೆ ನೀಡಿದ್ದಾರೆ.
ಸವದತ್ತಿಯಲ್ಲಿ ಬಿಸಿ:
ಸವದತ್ತಿ ಯಲ್ಲಮ್ಮ ವಿಧಾನಸಭಾ ಕ್ಷೇತ್ರದಲ್ಲಿ ಬಂಡಾಯದ ಬಿಸಿ ಹೆಚ್ಚಿಸಿದ್ದು, ಟಿಕೆಟ್‌ ವಂಚಿತ ಸೌರಭ್‌ ಚೋಪ್ರಾ, ಪಂಚನಗೌಡ ದ್ಯಾಮನಗೌಡರ ಬೆಂಬಲಿಗರು ತಮ್ಮ ನಾಯಕರಿಗೆ ಟಿಕೆಟ್‌ ಕೊಡಿ ಎಂದು ಪ್ರತಿಭಟನೆ ಆರಂಭಿಸಿದ್ದಾರೆ. ಟಿಕೆಟ್‌ ಬದಲಾಯಿಸದಿದ್ದರೆ ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಪಕ್ಷವನ್ನು ಮೂರನೇ ಸ್ಥಾನಕ್ಕೆ ತಳ್ಳುತ್ತೇವೆ ಎನ್ನುವ ಮೂಲಕ ಬಂಡಾಯ ಸ್ಪರ್ಧೆಯ ಸ್ಪಷ್ಟ ಸೂಚನೆ ರವಾನಿಸಿದ್ದಾರೆ.
ಇಲ್ಲಿಈ ಸಲವೂ ಟಿಕೆಟ್‌ ಪಡೆದಿರುವ ವಿಶ್ವಾಸ್‌ ವೈದ್ಯ 2018ರ ಚುನಾವಣೆಯಲ್ಲಿ 32 ಸಾವಿರಕ್ಕೂ ಅಧಿಕ ಮತಗಳಿಂದ ಸೋಲು ಕಂಡಿದ್ದರು. ಆಕಾಂಕ್ಷಿ ಸೌರಭ ಚೋಪ್ರಾ ಅವರ ತಂದೆ ಆನಂದ ಚೋಪ್ರಾ ಪಕ್ಷೇತರರಾಗಿ ಸ್ಪರ್ಧಿಸಿ ಬಿಜೆಪಿಗೆ ತೀವ್ರ ಪೈಪೋಟಿ ಕೊಟ್ಟು, ಕೇವಲ 6 ಸಾವಿರ ಮತಗಳ ಅಂತರದಿಂದ ಸೋತಿದ್ದರು. ಇನ್ನು, 2013ರ ಚುನಾವಣೆಯಲ್ಲಿ ಕಾಂಗ್ರೆಸ್‌ ಟಿಕೆಟ್‌ ತಪ್ಪಿದಾಗ ಪಂಚನಗೌಡ ದ್ಯಾಮನಗೌಡರ ಜೆಡಿಎಸ್‌ನಿಂದ ಸ್ಪರ್ಧಿಸಿ 36 ಸಾವಿರ ಮತಗಳಿಂದ ಸೋಲು ಕಂಡಿದ್ದರು.
ಮಾತು ಮರೆತವರು:
ಮೂರು ಬಾರಿ ಜೆಡಿಎಸ್‌ನಿಂದ, ಒಂದು ಬಾರಿ ಬಿಜೆಪಿಯಿಂದ ಸ್ಪರ್ಧಿಸಿರುವ ಅಶೋಕ ಪೂಜಾರಿಗೆ ಈ ಬಾರಿಯೂ ಗೋಕಾಕ್‌ ಟಿಕೆಟ್‌ ಕೈ ತಪ್ಪಿರುವುದು ಬೆಂಬಲಿಗರಲ್ಲಿಅಸಮಾಧಾನ ಹೆಚ್ಚಿಸಿದೆ. ”2023ರ ಚುನಾವಣೆಯಲ್ಲಿಅವಕಾಶ ನೀಡುತ್ತೇವೆ ಎನ್ನುವ ಭರವಸೆಯೊಂದಿಗೆ ಪಕ್ಷಕ್ಕೆ ಸೇರ್ಪಡೆ ಮಾಡಿಕೊಂಡಿದ್ದರು. ಈಗ ಕೊನೆ ಗಳಿಗೆಯಲ್ಲಿ ಮಾತು ಮರೆತಿದ್ದಾರೆ. ಕ್ಷೇತ್ರ ಮತ್ತು ಪಕ್ಷಕ್ಕೆ ಪರಿಚಯವೇ ಇಲ್ಲದ ಮುಖಕ್ಕೆ ಮಣೆ ಹಾಕಿರುವುದು ತೀವ್ರ ನೋವು ತಂದಿದೆ”, ಎಂದಿರುವ ಅಶೋಕ ಪೂಜಾರಿ, ”ಬೆಂಬಲಿಗರ ನಿರ್ಧಾರದಂತೆ ಮುನ್ನಡೆಯುವೆ”, ಎನ್ನುವ ಮೂಲಕ ಬಂಡಾಯ ಸ್ಪರ್ಧೆಯ ಸೂಚನೆ ನೀಡಿದ್ದಾರೆ.
ರಾಜೀನಾಮೆ ನಿರ್ಧಾರ:
1983ರಿಂದ ನಡೆದ ಒಂಬತ್ತು ಚುನಾವಣೆಗಳಲ್ಲಿ ಸ್ಪರ್ಧಿಸಿ, ಐದು ಬಾರಿ ಗೆದ್ದಿರುವ ಡಿ.ಬಿ.ಇನಾಮದಾರ ಎರಡು ಬಾರಿ ಜನತಾ ಪಕ್ಷ, ಮೂರು ಬಾರಿ ಕಾಂಗ್ರೆಸ್‌ನಿಂದ ಗೆದ್ದವರು. ಚುನಾವಣೆ ಹೊಸ್ತಿಲಲ್ಲಿಅನಾರೋಗ್ಯಕ್ಕೆ ತುತ್ತಾಗಿರುವ ಅವರನ್ನು ಮತ್ತು ಅವರ ಕುಟುಂಬದ ಸದಸ್ಯರನ್ನು ಕಾಂಗ್ರೆಸ್‌ ಪಕ್ಷ ಕಡೆಗಣಿಸಿರುವುದು ಕುಟುಂಬದವರಷ್ಟೇ ಅಲ್ಲದೆ ಬೆಂಬಲಿಗರನ್ನೂ ಕೆರಳಿಸಿದೆ. ಈಗಾಗಲೇ ಪಕ್ಷದ ಸದಸ್ಯತ್ವಕ್ಕೆ ರಾಜೀನಾಮೆ ಘೋಷಿಸಿರುವ ಡಿ.ಬಿ. ಸೊಸೆ, ಟಿಕೆಟ್‌ ಆಕಾಂಕ್ಷಿ ಲಕ್ಷಿತ್ರ್ಮ ಇನಾಮದಾರ ಏ.11ರ ಹೊತ್ತಿಗೆ ಚುನಾವಣೆ ಸ್ಪರ್ಧೆಯ ಕುರಿತು ಸ್ಪಷ್ಟ ನಿರ್ಧಾರ ಕೈಗೊಳ್ಳುವ ಸಂದೇಶ ರವಾನಿಸಿದ್ದಾರೆ. ಹೀಗಾಗಿ, ಕಿತ್ತೂರು ಕ್ಷೇತ್ರದಲ್ಲೂ ಬಂಡಾಯದ ಸಾಧ್ಯತೆ ಹೆಚ್ಚಾಗಿದೆ.
ರಮೇಶ್‌ ಸಹವಾಸವೇ ಮುಳುವಾಯಿತಾ?
ಕಾಂಗ್ರೆಸ್‌ ಪಕ್ಷದ ಟಿಕೆಟ್‌ ಮಾಜಿ ಶಾಸಕ ಕಾಕಾಸಾಹೇಬ್‌ ಪಾಟೀಲ್‌ ಪಾಲಾಗಿರುವುದರಿಂದ ‘ರಮೇಶ್‌ ಜಾರಕಿಹೊಳಿ ಸಹವಾಸವೇ ಉತ್ತಮ ಪಾಟೀಲರ ಟಿಕೆಟ್‌ಗೆ ಮುಳುವಾಯಿತಾ?’ ಎನ್ನುವ ಮಾತು ನಿಪ್ಪಾಣಿ ಕ್ಷೇತ್ರದಲ್ಲಿ ಹರಿದಾಡುತ್ತಿದೆ. ”ಈ ಸಲ ನನ್ನನ್ನು ಬೆಂಬಲಿಸಿ, ಮುಂದಿನ ಸಲ ಉತ್ತಮ ಪಾಟೀಲರಿಗೆ ಅವಕಾಶ ಕೊಡೋಣ’ ಎಂದು ಸ್ವತಃ ಕಾಕಾಸಾಹೇಬ್‌ ಪಾಟೀಲ್‌ ಸೇರಿದಂತೆ ಪಕ್ಷದ ವರಿಷ್ಠರು ಕಳೆದ ಬಾರಿ ಮಾತು ಕೊಟ್ಟಿದ್ದರು.
ರಮೇಶ್‌ ಜಾರಕಿಹೊಳಿ ಕಾಂಗ್ರೆಸ್‌ನಲ್ಲಿದ್ದಾಗ ಅವರ ಬೆಂಬಲಿಗನಾಗಿದ್ದೆ ಎನ್ನುವ ಕಾರಣದಿಂದ ನನ್ನನ್ನೂ ದೂರವಿಟ್ಟಿದ್ದಾರೆ”, ಎಂದು ಉತ್ತಮ ಪಾಟೀಲ್‌ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅವರೀಗ ಇನ್ನೆರಡು ದಿನಗಳಲ್ಲಿ ಮುಂದಿನ ನಿರ್ಧಾರ ಪ್ರಕಟಿಸಿರುವುದಾಗಿ ಹೇಳಿದ್ದರಿಂದ ನಿಪ್ಪಾಣಿಯಲ್ಲಿಈ ಬಾರಿ ತ್ರಿಕೋನ ಸ್ಪರ್ಧೆಯ ಚಿತ್ರಣ ಮೂಡುತ್ತಿದೆ.
