ಬೆಂಗಳೂರು: ಅಮೂಲ್ ಜೊತೆಗೆ ನಂದಿನಿ ಸಂಸ್ಥೆ ವ್ಯಾಪಾರ ಮಾಡಲು ಒಪ್ಪಿಗೆ ನೀಡಿ ಪತ್ರವನ್ನು ಈಗಾಗಲೇ 2021ರಲ್ಲೇ ನೀಡಲಾಗಿದ್ದು,ಈ ಪತ್ರವನ್ನು ಬಹಿರಂಗ ಪಡಿಸಿ ಎಂದು ಕಾಂಗ್ರೆಸ್ ವಕ್ತಾರ ಎಂ ಲಕ್ಷ್ಮಣ್ ರಾಜ್ಯ ಸರ್ಕಾರಕ್ಕೆ ಸವಾಲು ಹಾಕಿದರು.
ಕೆಪಿಸಿಸಿ ಕಚೇರಿಯಲ್ಲಿ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಕಳೆದ ಒಂದು ವಾರದಿಂದ ಅಮೂಲ್ ಹಾಗೂ ನಂದಿನಿ ವಿಲೀನ ವಿರೋಧಿಸಿ ಸಾಕಷ್ಟು ಹೋರಾಟ ನಡೆಸುತ್ತಿದ್ದಾರೆ. ಕಳೆದ 3 ವರ್ಷಗಳಿಂದ ನಂದಿನಿಯನ್ನು ಅಮೂಲ್ ಜತೆ ವಿಲೀನ ಮಾಡಲು ಪ್ರಯತ್ನ ಮಾಡುತ್ತಿದ್ದು, ಅಮೂಲ್ ಜತೆ ವ್ಯಾಪಾರ ಮಾಡಲು ನಂದಿನಿ ಸಂಸ್ಥೆ ಒಪ್ಪಿಗೆ ನೀಡಿರುವ ಪತ್ರವನ್ನು ಅವರಿಗೆ ಈಗಾಗಲೇ 2021ರಲ್ಲೇ ನೀಡಲಾಗಿದೆ. ಈ ಪತ್ರವನ್ನು ಇವರು ಬಹಿರಂಗಪಡಿಸುತ್ತಿಲ್ಲ. ಇದೆಲ್ಲ ಆದ ನಂತರವಷ್ಟೇ ಅವರು ರಾಜ್ಯಕ್ಕೆ ಲಗ್ಗೆ ಇಡುತ್ತಿದ್ದಾರೆ ಎಂದರು.
ನಂದಿನಿ ಮುಳುಗಿಸಲು ಹುನ್ನಾರ
ನಂದಿನಿ ಸಂಸ್ಥೆಯನ್ನು ಮುಳುಗಿಸಿ ಅಮೂಲ್ ಇದನ್ನು ವಶಪಡಿಸಿಕೊಳ್ಳಲು ಹುನ್ನಾರ ಮಾಡಲಾಗುತ್ತಿದೆ. ಇವರು ನಮ್ಮ ರಾಜ್ಯದ ಮೂರು ಬ್ಯಾಂಕುಗಳನ್ನು ವಿಲೀನ ಮಾಡುವ ಸಂದರ್ಭದಲ್ಲಿ ಈ ಬ್ಯಾಂಕ್ ಆರಂಭಿಸಿದ ಕುಟುಂಬದ ಸದಸ್ಯರನ್ನಾಗಲಿ, ಆ ಬ್ಯಾಂಕಿನ ಟ್ರಸ್ಟ್ ಸದಸ್ಯರನ್ನಾಗಲಿ ಕೇಳಿದ್ದರಾ ಎಂದು ಪ್ರಶ್ನಿಸಿದರು.
ಸಂಸತ್ತಿನಲ್ಲೂ ಚರ್ಚೆ ಮಾಡದೇ ಸುಗ್ರೀವಾಜ್ಞೆ ಮೂಲಕ ಲಾಭದಾಯಕ ಬ್ಯಾಂಕ್ ಗಳಾದ ಎಸ್ ಬಿಎಂ, ಸಿಂಡಿಕೇಟ್ ಬ್ಯಾಂಕ್ ಹಾಗೂ ವಿಜಯಾ ಬ್ಯಾಂಕ್ ಗಳನ್ನು ವಿಲೀನ ಮಾಡಿದರು. ಈ ಬ್ಯಾಂಕ್ ಗಳು 21 ಲಕ್ಷ ಕೋಟಿ ರೂ. ಮೌಲ್ಯಗಳ ಬ್ಯಾಂಕ್ ಗಳಾಗಿದ್ದವು. ಇವೆಲ್ಲವನ್ನೂ ಬ್ಯಾಂಕ್ ಆಫ್ ಬರೋಡಾ ಹಾಗೂ ಇತರೆ ಬ್ಯಾಂಕುಗಳಿಗೆ ವಿಲೀನ ಮಾಡಿದರು ಎಂದು ಆರೋಪಿಸಿದರು.
