ಎಲೆಕ್ಷನ್ ಹತ್ತಿರ ಬರ್ತಿದೆ. ಎಲ್ಲ ಪಕ್ಷಗಳ ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಕೆ ಮಾಡಿ ಮತ ಸಮರದ ಅಖಾಡಕ್ಕೆ ಇಳಿದಿದ್ದಾರೆ. ರಾಜ್ಯದ ಉದ್ದಗಲಕ್ಕೂ ಪ್ರಚಾರ ಭರಾಟೆ ಜೋರಾಗಿದೆ. ಈ ಪೈಕಿ ಹಳೇ ಮೈಸೂರು ಭಾಗ ವಿಶಿಷ್ಟ ಕಾರಣಗಳಿಂದಾಗಿ ಈ ಬಾರಿ ಗಮನ ಸೆಳೆದಿದೆ. ಹಳೇ ಮೈಸೂರು ಭಾಗದಲ್ಲಿ ಪ್ರತಿ ಚುನಾವಣೆಯಲ್ಲೂ ಕಾಂಗ್ರೆಸ್ – ಜೆಡಿಎಸ್ ಪಕ್ಷಗಳದ್ದೇ ಆರ್ಭಟ.. ಅದರಲ್ಲೂ ಹಳೇ ಮೈಸೂರಿನ ಹಲವು ಕ್ಷೇತ್ರಗಳು ಜೆಡಿಎಸ್‌ನ ಭದ್ರ ಕೋಟೆಗಳು.. ಇದೀಗ ಈ ಕೋಟೆಗಳನ್ನು ಗೆಲ್ಲಲು ಬಿಜೆಪಿ ಲಗ್ಗೆ ಇಟ್ಟಿದೆ. ಅದರಲ್ಲೂ ಪ್ರಧಾನಿ ಮೋದಿ ಹಳೇ ಮೈಸೂರು ಭಾಗವನ್ನೇ ಗುರಿಯಾಗಿಸಿ ಪ್ರಚಾರ ಕಣದಲ್ಲಿ ಅಬ್ಬರಿಸಲಿದ್ದಾರೆ..! ಈ ಭಾಗವನ್ನು ಗೆಲ್ಲಲು ಬಿಜೆಪಿ ಮಾಡಿರುವ ತಂತ್ರ ಏನು? ಕಾಂಗ್ರೆಸ್ – ಜೆಡಿಎಸ್‌ನ ಪ್ರತಿತಂತ್ರ ಏನು? ಇಲ್ಲಿದೆ ಸಮಗ್ರ ವಿವರ..
ಹಳೇ ಮೈಸೂರಿನಲ್ಲಿ ಅಬ್ಬರಿಸಲಿದ್ದಾರೆ ಪ್ರಧಾನಿ ಮೋದಿ!
ರಾಜ್ಯದಲ್ಲಿ ಚುನಾವಣೆ ಘೋಷಣೆಯಾಗುವ ಮುನ್ನವೇ ಹಳೇ ಮೈಸೂರು ಭಾಗದ ಮಂಡ್ಯ, ಮೈಸೂರು, ಚಾಮರಾಜ ನಗರ ಹಾಗೂ ಚಿಕ್ಕಬಳ್ಳಾಪುರ ಜಿಲ್ಲೆಗಳಿಗೆ ಪ್ರಧಾನಿ ಮೋದಿ ಬಂದು ಹೋಗಿದ್ದಾರೆ. ಆದ್ರೆ, ರಾಮನಗರ ಜಿಲ್ಲೆಗೆ ಮಾತ್ರ ಪ್ರಧಾನಿ ಕಾಲಿಟ್ಟಿರಲಿಲ್ಲ. ಇದೀಗ ಚುನಾವಣಾ ಪ್ರಚಾರಕ್ಕಾಗಿ ರಾಮನಗರಕ್ಕೆ ಪ್ರಧಾನಿ ಮೋದಿ ಕಾಲಿಡಲಿದ್ದಾರೆ. ಮೇ 3 ರಂದು ಪ್ರಧಾನಿ ಮೋದಿ ರಾಮನಗರಕ್ಕೆ ಎಂಟ್ರಿ ಕೊಡೋದು ಬಹುತೇಕ ಫಿಕ್ಸ್ ಆಗಿದೆ. ಚನ್ನಪಟ್ಟಣದಲ್ಲಿ ಪ್ರಧಾನಿ ಮೋದಿ ರೋಡ್ ಶೋ ಕೂಡಾ ನಡೆಸಲಿದ್ದಾರೆ ಅನ್ನೋ ಮಾಹಿತಿ ಸಿಕ್ಕಿದೆ. ಜೊತೆಯಲ್ಲೇ ರಾಜೀವ್ ಗಾಂಧಿ ಆರೋಗ್ಯ ವಿವಿ ಕಾಮಗಾರಿ ಪರಿಶೀಲನೆ, ರಾಮ ದೇವಾಲಯ ನಿರ್ಮಾಣದ ಬಗ್ಗೆ ಚರ್ಚೆ ಕೂಡಾ ನಡೆಯಲಿದೆ. ಈ ಮೂಲಕ ಅಭಿವೃದ್ದಿ ಹಾಗೂ ಹಿಂದುತ್ವ ಜಪ ಈ ಭಾಗದಲ್ಲಿ ಆಗಲಿದೆ. ಈಗಾಗಲೇ ಬೆಂಗಳೂರು – ಮೈಸೂರು ಎಕ್ಸ್‌ಪ್ರೆಸ್ ವೇ ಉದ್ಘಾಟನೆ ಮಾಡಿರುವ ಪ್ರಧಾನಿ ಮೋದಿ, ಈ ಭಾಗದಲ್ಲಿ ಬಿಜೆಪಿಗೆ ಮತ್ತಷ್ಟು ಬೂಸ್ಟ್‌ ಕೊಡೋದಕ್ಕೆ ಮುಂದಾಗಿದ್ದಾರೆ.
ಚನ್ನಪಟ್ಟಣದಲ್ಲಿ ಪ್ರಧಾನಿ ಮೋದಿ ರೋಡ್ ಶೋ ನಡೆಸಿದರೆ ಇದರಿಂದ ಇಲ್ಲಿ ಬಿಜೆಪಿ ಅಭ್ಯರ್ಥಿ ಸಿ. ಪಿ. ಯೋಗೇಶ್ವರ್‌ಗೆ ಬಲ ತುಂಬಿದಂತೆ ಆಗುತ್ತೆ. ಜೆಡಿಎಸ್ ನಾಯಕ ಎಚ್. ಡಿ. ಕುಮಾರಸ್ವಾಮಿ ವಿರುದ್ಧ ಸ್ಪರ್ಧೆ ಮಾಡಿರುವ ಯೋಗೇಶ್ವರ್‌ಗೆ ಅತಿ ದೊಡ್ಡ ಪ್ಲಸ್‌ ಪಾಯಿಂಟ್ ಆಗಲಿದೆ. ಚನ್ನಪಟ್ಟಣದಲ್ಲಿ ಸಿ. ಪಿ. ಯೋಗೇಶ್ವರ್ ಹಾಗೂ ಕುಮಾರಸ್ವಾಮಿ ನಡುವಣ ಜಟಾಪಟಿ ಇದೇ ಮೊದಲೇನಲ್ಲ. ಈ ಬಾರಿ ಯೋಗೇಶ್ವರ್‌ಗೆ ಮೋದಿ ಪ್ರಚಾರ ಬಲವೂ ಸಿಕ್ಕರೆ ಕಮಲಕ್ಕೆ ಶಕ್ತಿ ತುಂಬಿದಂತೆ ಆಗುತ್ತೆ ಅನ್ನೋ ವಿಶ್ಲೇಷಣೆಗಳು ಕೇಳಿ ಬರ್ತಿದೆ. ಇನ್ನೊಂದೆಡೆ ಕನಕಪುರದಲ್ಲಿ ಈ ಬಾರಿ ಡಿಕೆ ಶಿವಕುಮಾರ್ ಅವರಿಗೆ ಸಚಿವ ಆರ್. ಅಶೋಕ್ ಮುಖಾಮುಖಿಯಾಗಿದ್ದಾರೆ. ರಾಮನಗರ ಜಿಲ್ಲೆಯಲ್ಲಿ ನಡೆಯುವ ಮೋದಿ ರೋಡ್ ಶೋ ಎಫೆಕ್ಟ್‌ ಕನಕಪುರಕ್ಕೂ ತಟ್ಟದೇ ಇರೋದಿಲ್ಲ. ಮೋದಿ ಆಗಮನ ಹಿನ್ನೆಲೆಯಲ್ಲಿ ಎಸ್‌ಪಿಜಿ ತಂಡ ಕೆಲವೇ ದಿನಗಳಲ್ಲಿ ರಾಮನಗರದಲ್ಲಿ ಸ್ಥಳ ಪರಿಶೀಲನೆ ನಡೆಸೋಕೆ ಬರಲಿದೆ ಅನ್ನೋ ಮಾಹಿತಿಯೂ ಸಿಕ್ಕಿದೆ. ಈ ಮೂಲಕ ರಾಮನಗರ ಅಖಾಡ ರಂಗೇರುವ ಸುಳಿವು ಸಿಕ್ಕಿದೆ.
ಹಳೇ ಮೈಸೂರು ಬಿಜೆಪಿಗೆ ಏಕೆ ಮುಖ್ಯ?
ಬಿಜೆಪಿ ಈ ಹಿಂದೆಯೇ ಮಿಷನ್ 150 ಯೋಜನೆ ಹಾಕಿಕೊಂಡಿದೆ. ರಾಜ್ಯದ 224 ಕ್ಷೇತ್ರಗಳ ಪೈಕಿ ಕನಿಷ್ಟ 150 ಸ್ಥಾನಗಳನ್ನಾದ್ರೂ ಗೆಲ್ಲಲೇ ಬೇಕು ಅನ್ನೋದು ಬಿಜೆಪಿ ಪ್ಲಾನ್. ಆದ್ರೆ, ಚುನಾವಣಾ ಪೂರ್ವ ಸಮೀಕ್ಷೆಗಳು ಬಿಜೆಪಿಯ ಈ ಪ್ಲಾನ್‌ಗೆ ಪೂರಕವಾದ ರೀತಿಯಲ್ಲಿ ಉತ್ತರ ಕೊಟ್ಟಿಲ್ಲ. ಬಿಜೆಪಿ ಸರಳ ಬಹುಮತದ ಬಳಿ ಸುಳಿಯೋದಕ್ಕೂ ಕಷ್ಟ ಪಡಬೇಕು ಅನ್ನೋ ಅಂದಾಜುಗಳನ್ನ ಸಮೀಕ್ಷೆ ಮಾಡ್ತಿದೆ. ಈ ಹಂತದಲ್ಲಿ ಕರಾವಳಿ ಕರ್ನಾಟಕ, ಮಧ್ಯ ಕರ್ನಾಟಕ ಹಾಗೂ ಉತ್ತರ ಕರ್ನಾಟಕ ಭಾಗದಲ್ಲಿ ಬಿಜೆಪಿ ತನ್ನದೇ ಆದ ರೀತಿಯಲ್ಲಿ ತಂತ್ರಗಾರಿಕೆ ಮಾಡಿದೆ. ಆದ್ರೆ, ಬಿಜೆಪಿಗೆ ನಿಜಕ್ಕೂ ಸವಾಲಾಗಿರೋದು ಹಳೇ ಮೈಸೂರು ಭಾಗ. ಏಕೆಂದರೆ ಈ ಭಾಗದ 9 ಜಿಲ್ಲೆಗಳ ಒಟ್ಟು 57 ಸ್ಥಾನಗಳ ಪೈಕಿ ಬಹುತೇಕ ಕ್ಷೇತ್ರಗಳಲ್ಲಿ ಜೆಡಿಎಸ್ ಹಾಗೂ ಕಾಂಗ್ರೆಸ್ ಪ್ರಾಬಲ್ಯವಿದೆ. ಮಂಡ್ಯ, ರಾಮನಗರ, ಹಾಸನ ಭಾಗಗಳಲ್ಲಂತೂ ಜೆಡಿಎಸ್‌ನದ್ದೇ ಆರ್ಭಟ. 2018ರ ಚುನಾವಣೆಯಲ್ಲೂ ಜೆಡಿಎಸ್ ಪ್ರಾಬಲ್ಯ ಸಾಬೀತಾಗಿತ್ತು. ಹಳೇ ಮೈಸೂರು ಭಾಗದ 57 ಕ್ಷೇತ್ರಗಳ ಪೈಕಿ 2018ರ ಚುನಾವಣೆಯಲ್ಲಿ ಜೆಡಿಎಸ್ 26 ಸ್ಥಾನಗಳನ್ನು ಗೆದ್ದಿತ್ತು. ಕಾಂಗ್ರೆಸ್ 17 ಹಾಗೂ ಬಿಜೆಪಿ 12 ಸ್ಥಾನಗಳನ್ನು ತನ್ನದಾಗಿಸಿಕೊಂಡಿತ್ತು. ಈ ಪೈಕಿ ಮಂಡ್ಯದಲ್ಲಿ 7ಕ್ಕೆ 7 ಸ್ಥಾನ ಹಾಗೂ ಹಾಸನದಲ್ಲಿ 7ರ ಪೈಕಿ 6 ಕ್ಷೇತ್ರಗಳು ಜೆಡಿಎಸ್ ಕೈವಶ ಆಗಿತ್ತು. ರಾಮನಗರದಲ್ಲೂ ಒಟ್ಟು 4 ಕ್ಷೇತ್ರಗಳ ಪೈಕಿ 3 ಕ್ಷೇತ್ರ ಜೆಡಿಎಸ್ ಪಾಲಾಗಿತ್ತು. ಈ ಬಾರಿಯ ಚುನಾವಣೆಯಲ್ಲಿ ಜೆಡಿಎಸ್‌ನ ಈ ಮೂರು ಭದ್ರ ಕೋಟೆಗಳೇ ಬಿಜೆಪಿಯ ಪ್ರಮುಖ ಟಾರ್ಗೆಟ್!
ಅಭಿವೃದ್ಧಿ, ಹಿಂದುತ್ವ.. ಯಾವುದು ವರ್ಕೌಟ್ ಆಗುತ್ತೆ?
ಜೆಡಿಎಸ್ ಹಾಗೂ ಕಾಂಗ್ರೆಸ್ ವಿರುದ್ಧ ಹಳೇ ಮೈಸೂರು ಭಾಗದಲ್ಲಿ ಕಹಳೆ ಊದಿರುವ ಬಿಜೆಪಿ ಅಭಿವೃದ್ಧಿಯ ಜೊತೆಯಲ್ಲೇ ಹಿಂದುತ್ವ ಅಸ್ತ್ರವನ್ನೂ ಪ್ರಯೋಗಿಸಿದೆ. ಆದ್ರೆ, ಅಭಿವೃದ್ಧಿ ಮಾತೇ ಒಂದು ಕೈ ಹೆಚ್ಚು ಎನ್ನಬಹುದು. ಬೆಂಗಳೂರು ಮೈಸೂರು ಎಕ್ಸ್‌ಪ್ರೆಸ್ ವೇ, ಬೆಂಗಳೂರಿನಲ್ಲಿ ಕೆಂಪೇಗೌಡರ ಪ್ರತಿಮೆ ಅನಾವರಣ, ಚಿಕ್ಕಬಳ್ಳಾಪುರದಲ್ಲಿ ಸತ್ಯ ಸಾಯಿ ಆಸ್ಪತ್ರೆ.. ಹೀಗೆ ಹಲವು ಅಭಿವೃದ್ಧಿ ಕಾರ್ಯಗಳ ಉದ್ಘಾಟನೆಗೆ ಆಗಮಿಸಿದ್ದ ಪ್ರಧಾನಿ ಮೋದಿ, ಈ ಭಾಗದ ಜನರಿಗೆ ಅಭಿವೃದ್ಧಿಯ ಸಂದೇಶ ಕೊಟ್ಟಿದ್ದಾರೆ. ಮೈಸೂರು – ಕುಶಾಲ ನಗರ ಹೆದ್ದಾರಿ ಕಾಮಗಾರಿ ನಡೀತಿದೆ. ಇದರ ಜೊತೆಗೆ ಹಳೇ ಮೈಸೂರಿನ ಪ್ರಮುಖ ಯೋಜನೆಯಾದ ಮೇಕೆದಾಟು ಯೋಜನೆ ಸಂಬಂಧ ಬಿಜೆಪಿ ನಾಯಕರಿಂದ ಹೊಸ ಘೋಷಣೆ ಏನಾದ್ರೂ ಹೊರಬೀಳಬಹುದಾ? ಇತ್ತೀಚೆಗೆ ಸದ್ದು ಮಾಡಿದ ನಂದಿನಿ – ಅಮುಲ್ ವಿವಾದದ ಕುರಿತಾಗಿ ಸ್ಪಷ್ಟನೆ ಕೊಡಬಹುದಾ? ಹೀಗೆ ಹಲವು ನಿರೀಕ್ಷೆಗಳಿವೆ.. ರಾಷ್ಟ್ರೀಯ ನಾಯಕರು ಪ್ರಚಾರ ಕಣದಲ್ಲಿ ಉರುಳಿಸಬಹುದಾದ ಹೊಸ ದಾಳಗಳೇನು ಅನ್ನೋ ಕುತೂಹಲ ಎಲ್ಲರಲ್ಲೂ ಇದ್ದೇ ಇದೆ. ಬಿಜೆಪಿ ನಾಯಕರು ರಾಮನಗರದಲ್ಲಿ ರಾಮ ದೇಗುಲ ನಿರ್ಮಾಣದ ವಿಚಾರವನ್ನ ಮತ್ತೆ ಪ್ರಸ್ತಾಪಿಸಿ ಹಿಂದುತ್ವ ಅಸ್ತ್ರ ಪ್ರಯೋಗ ಮಾಡುವ ಸಾಧ್ಯತೆಯಂತೂ ಇದ್ದೇ ಇದೆ..
ಹಳೇ ಮೈಸೂರಿನಲ್ಲಿ ಜೆಡಿಎಸ್ – ಕಾಂಗ್ರೆಸ್ ಬಲವೇನು?
ಜೆಡಿಎಸ್ ಹಾಗೂ ಕಾಂಗ್ರೆಸ್ ಪಕ್ಷಕ್ಕೆ ಹಳೇ ಮೈಸೂರು ಭಾಗದಲ್ಲಿ ಬೇರು ಮಟ್ಟದಲ್ಲಿ ಕಾರ್ಯಕರ್ತರ ಪಡೆ ಇದೆ. ಒಕ್ಕಲಿಗರೇ ಪ್ರಾಬಲ್ಯ ಹೊಂದಿರುವ ಈ ಜಿಲ್ಲೆಗಳಲ್ಲಿ ಜಾತಿ ಸಮೀಕರಣ ಕೂಡಾ ಜೆಡಿಎಸ್‌ಗೆ ಪೂರಕವಾಗಿದೆ. ಹೀಗಾಗಿ, ತೆನೆ ಪಕ್ಷದ ವೋಟ್‌ ಬ್ಯಾಂಕ್ ಭೇದಿಸಿ ಕಮಲ ಅರಳಿಸೋದು ಸುಲಭದ ಕೆಲಸವಲ್ಲ. ಜೊತೆಗೆ ಜೆಡಿಎಸ್ ಹೆಚ್ಚು ಕ್ಷೇತ್ರಗಳನ್ನು ಗೆದ್ದಷ್ಟೂ ರಾಜ್ಯದಲ್ಲಿ ಸಮ್ಮಿಶ್ರ ಸರ್ಕಾರ ರಚನೆಯ ಸಾಧ್ಯತೆ ಹೆಚ್ಚಾಗುತ್ತದೆ. ಹೀಗಾಗಿ ಹಳೇ ಮೈಸೂರು ಭಾಗದಲ್ಲಿ ಜೆಡಿಎಸ್ ಪಕ್ಷವನ್ನು ಕಟ್ಟಿಹಾಕುವ ಜೊತೆಯಲ್ಲೇ ಬಿಜೆಪಿ ಬಲವರ್ಧನೆಗೆ ಮುಂದಾಗಲು ಮೋದಿ, ಯೋಗಿಯಂಥಾ ವರ್ಚಸ್ವಿ ನಾಯಕರ ಅಬ್ಬರದ ಪ್ರಚಾರ ಕೇಸರಿ ಪಕ್ಷಕ್ಕೆ ಅತ್ಯಗತ್ಯವಾಗಿದೆ.
