ಬೆಂಗಳೂರು : ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ರಾಜ್ಯದ 224 ವಿಧಾನಸಭಾ ಕ್ಷೇತ್ರಗಳ ಪೈಕಿ 16 ವಿಧಾನಸಭಾ ಕ್ಷೇತ್ರಗಳಲ್ಲಿ ಮಾತ್ರವೇ ಈ ಬಾರಿಯ ಎರಡು ಮತಚಲಾವಣೆ ಯಂತ್ರಗಳನ್ನು( ವೋಟಿಂಗ್‌ ಬ್ಯಾಲೆಟ್‌ ಮಷಿನ್‌) ಇಡಲಾಗುತ್ತಿದೆ. ಈ ಮೂಲಕ ಈ 16 ವಿಧಾನಸಭಾ ಕ್ಷೇತ್ರಗಳು ವಿಶೇಷತೆ ಪಡೆದಿವೆ.
ಹೌದು, ರಾಜಧಾನಿ ಬೆಂಗಳೂರಿನ ರಾಜಾಜಿನಗರ, ಬ್ಯಾಟರಾಯನಪುರ ಹಾಗೂ ಯಲಹಂಕ ವಿಧಾನಸಭಾ ಕ್ಷೇತ್ರಗಳು, ಬೆಂಗಳೂರು ಗ್ರಾಮಾಂತರದ ಹೊಸಕೋಟೆ, ಬಳ್ಳಾರಿ ನಗರ, ಚಾಮರಾಜನಗರ ಜಿಲ್ಲೆಯ ಹನೂರು, ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು, ಚಿಕ್ಕಮಗಳೂರು, ಚಿತ್ರದುರ್ಗ, ಹುಬ್ಬಳ್ಳಿ-ಧಾರವಾಡ ಕೇಂದ್ರ, ಕೋಲಾರ, ಕೊಪ್ಪಳ ಜಿಲ್ಲೆಯ ಗಂಗಾವತಿ, ಮಂಡ್ಯ ಜಿಲ್ಲೆಯ ಶ್ರೀರಂಗಪಟ್ಟಣ, ಮೈಸೂರು ಜಿಲ್ಲೆಯ ಕೃಷ್ಣರಾಜ, ನರಸಿಂಹರಾಜ ಹಾಗೂ ರಾಯಚೂರು ವಿಧಾನಸಭಾ ಕ್ಷೇತ್ರಗಳು ಈ ಬಾರಿ ಎರಡು ವೋಟಿಂಗ್‌ ಬ್ಯಾಲೆಟ್‌ ಯಂತ್ರಗಳನ್ನು ಹೊಂದಿರಲಿವೆ.
ಎರಡು ವೋಟಿಂಗ್‌ ಯಂತ್ರವಿಡಲು ಕಾರಣವೇನು?
ಭಾರತೀಯ ಚುನಾವಣಾ ಆಯೋಗವು ಸದ್ಯ ಚುನಾವಣೆಗೆ ಮತ ಚಲಾಯಿಸಲು ಬಳಸುತ್ತಿರುವ ಒಂದು ವೋಟಿಂಗ್‌ ಬ್ಯಾಲೆಟ್‌ ಯೂನಿಟ್‌ ಒಟ್ಟು 15 ಅಭ್ಯರ್ಥಿಗಳು ಹಾಗೂ ಒಂದು ನೋಟಾ ಸೇರಿ 16 ಆಯ್ಕೆಗಳನ್ನು ಮಾತ್ರ ಹೊಂದಿರುತ್ತದೆ. ಯಾವುದೇ ಕ್ಷೇತ್ರದಲ್ಲಿ 15ಕ್ಕಿಂತ ಹೆಚ್ಚಿನ ಅಭ್ಯರ್ಥಿ ಸ್ಪರ್ಧಿಸಿದ್ದರೆ ಆ ಕ್ಷೇತ್ರಗಳಲ್ಲಿ ಎರಡು ವೋಟಿಂಗ್‌ ಬ್ಯಾಲೆಟ್‌ ಮಷಿನ್‌ ಬಳಸುವುದು ಅನಿವಾರ್ಯವಾಗಿರುತ್ತದೆ. ಹೀಗಾಗಿಯೇ ರಾಜ್ಯದ 16 ವಿಧಾಸಭಾ ಕ್ಷೇತ್ರದಲ್ಲಿ ಈ ಬಾರಿ ಎರಡು ಬ್ಯಾಲೆಟ್‌ ಮಷಿನ್‌ ಬಳಸಲು ಸಿದ್ಧತೆ ಮಾಡಿಕೊಂಡಿದೆ.
ಒಂದೇ ಕಂಟ್ರೋಲ್‌ ಯೂನಿಟ್‌
ಈ 16 ವಿಧಾನಸಭಾ ಕ್ಷೇತ್ರಗಳಲ್ಲಿ ಎರಡು ವೋಟಿಂಗ್‌ ಬ್ಯಾಲೆಟ್‌ ಮಿಷನ್‌ ಬಳಸಿದರೂ ಕೂಡಾ ಮತ ಕ್ರೋಢೀಕರಣ ಯಂತ್ರ (ಕಂಟ್ರೋಲ್‌ ಯೂನಿಟ್‌) ಹಾಗೂ ವಿವಿ ಪ್ಯಾಟ್‌ (ಬ್ಯಾಲೆಟ್‌ ಪೇಪರ್‌ ಸಂಗ್ರಹ ಯಂತ್ರ) ಮಾತ್ರ ಒಂದೇ ಇರುತ್ತದೆ. ಎರಡೂ ವೋಟಿಂಗ್‌ ಬ್ಯಾಲೆಟ್‌ಗಳಲ್ಲಿ ಮತದಾರ ಚಲಾಯಿಸುವ ಮತವು ಈ ಒಂದೇ ಕಂಟ್ರೋಲ್‌ ಯುನಿಟ್‌ಗೆ ಸೇರಿ ಫಲಿತಾಂಶ ನೀಡುತ್ತದೆ.
16 ಕ್ಷೇತ್ರದ ಎಲ್ಲಾ ಮತಕೇಂದ್ರಗಳಲ್ಲಿಯೂ ಡಬಲ್‌ ವೋಟಿಂಗ್‌ ಮಿಷನ್‌
1,200 ಮತಗಳಿಗೆ ಒಂದು ಮತಕೇಂದ್ರವನ್ನು ರಚನೆ ಮಾಡಲಾಗಿರುತ್ತದೆ. ಆಯಾ ವಿಧಾನಸಭಾ ಕ್ಷೇತ್ರದ ಜನ ಸಂಖ್ಯೆ ಆಧಾರದಲ್ಲಿ ಮತಕೇಂದ್ರಗಳನ್ನು ಸ್ಥಾಪಿಸಲಾಗಿರುತ್ತದೆ. 15ಕ್ಕಿಂತ ಅಭ್ಯರ್ಥಿಗಳು ಹೆಚ್ಚಿರುವ ರಾಜ್ಯದ 16 ವಿಧಾನಸಭಾ ಕ್ಷೇತ್ರದಲ್ಲಿ ಬರುವ ಎಲ್ಲಾ ಮತಕೇಂದ್ರಗಳಲ್ಲಿಯೂ ಎರಡು ವೋಟಿಂಗ್‌ ಮಷಿನ್‌ ಕಡ್ಡಾಯ ಬಳಸಲಾಗುತ್ತಿದೆ ಎಂದು ಚುನಾವಣಾ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
15 ಕ್ಕಿಂತ ಹೆಚ್ಚು ಮಂದಿ ಸ್ಪರ್ಧೆ ಮಾಡಿರುವ ಕ್ಷೇತ್ರ ಮತ್ತು ಸ್ಪರ್ಧಿಸಿರುವ ಅಭ್ಯರ್ಥಿಗಳ ಸಂಖ್ಯೆ
ವಿಧಾನಸಭಾ ಕ್ಷೇತ್ರಗಳ – ಸ್ಪರ್ಧಿಸಿರುವ ಅಭ್ಯರ್ಥಿಗಳ ಸಂಖ್ಯೆ
- ಬಳ್ಳಾರಿ ನಗರ – 24
- ಹೊಸಕೋಟೆ-23
- ಚಿತ್ರದುರ್ಗ -21
- ಯಲಹಂಕ -20
- ಗಂಗಾವತಿ – 19
- ರಾಯಚೂರು – 18
- ಹನೂರು – 18
- ಕೋಲಾರ -18
- ಗೌರಿಬಿದನೂರು -18
- ರಾಜಾಜಿನಗರ – 18
- ಬ್ಯಾಟರಾಯನಪುರ -17
- ಶ್ರೀರಂಗಪಟ್ಟಣ – 17
- ಕೃಷ್ಣರಾಜ -17
- ನರಸಿಂಹರಾಜ – 17
- ಹುಬ್ಬಳ್ಳಿ ಧಾರವಾಡ ಕೇಂದ್ರ – 16
- ಚಿಕ್ಕಮಗಳೂರು – 16
