ಕೆ.ಆರ್.ಪುರ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿ ನಿರೀಕ್ಷೆ ಮೀರಿ ಬಿಜೆಪಿ ಅಭ್ಯರ್ಥಿ ಸಚಿವ ಭೈರತಿ ಬಸವರಾಜ್ ಪರ ಅಲೆ ಹೆಚ್ಚಾಗಿದೆ. ಎಲ್ಲೆಡೆ ಭವ್ಯ ಸ್ವಾಗತದೊಂದಿಗೆ ಗೆಲುವಿನ ವಿಶ್ವಾಸ ಇಮ್ಮಡಿಯಾಗಲು ಕಾರಣವಾಗಿದೆ.
ಇಂದು ರಾಮಮೂರ್ತಿನಗರ ಮತ್ತು ವಿಜಿನಾಪುರದ ವಾರ್ಡ್ ನ ಪ್ರಮುಖ ಬೀದಿಗಳಲ್ಲಿ ಬಿಜೆಪಿ ಮುಖಂಡ ದುಶಾಂತ್ ಹಾಗೂ ಪ್ರಶಾಂತ್ ನೇತ್ರತ್ವದಲ್ಲಿ ನೂರಾರು ಜನ ರೋಡ್ ಶೋ ದಲ್ಲಿ ಪಾಲ್ಗೊಂಡು ಸಚಿವ ಭೈರತಿ ಬಸವರಾಜ್ ಗೆ ಜೈಕಾರ ಕೂಗಿದರು.
ನಂತರ ಬಿಜೆಪಿ ಹಿರಿಯ ಮುಖಂಡ ಬಾಕ್ಸರ್ ನಾಗರಾಜ್ ಅವರ ನೇತ್ರತ್ವದಲ್ಲಿ ಸಾವಿರಾರು ಕಾರ್ಯಕರ್ತರೊಂದಿಗೆ ಸಾಗಿದ ಪ್ರಚಾರ ಒಂದೊಂದು ಬಡವಾಣೆ, ಗ್ರಾಮಗಳಿಗೆ ಸಾಗಿದಾಗ ನೂರಾರು ಬೆಂಬಲಿಗರು ಜೊತೆಯಾಗಿ ಹೂವಿನ ಸುರಿಮಳೆಯ ಮೂಲಕ ಸ್ವಾಗತಿಸಿದರು.
ಮೆರೆವಣಿಗೆ ವೇಳೆ ಪುಷ್ಪವೃಷ್ಟಿ:
ಇದಲ್ಲದೆ, ಪ್ರಮುಖ ರಸ್ತೆಗಳಲ್ಲಿ ಮೆರವಣಿಗೆಯನ್ನೂ ನಡೆಸಿರುವ ಸಚಿವ ಭೈರತಿ ಬಸವರಾಜ್ ಅವರಿಗೆ ಜನರಿಂದ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದ್ದು, ಪುಷ್ಪವೃಷ್ಟಿ ಸುರಿಸಿದ್ದಾರೆ. ತಮಟೆ ವಾದ್ಯದೊಂದಿಗೆ ಕ್ಷೇತ್ರದಲ್ಲಿ ಬಿಜೆಪಿ ಕಾರ್ಯಕರ್ತರೊಂದಿಗೆ ಮೆರವಣಿಗೆ ನಡೆಸಿದ್ದಾರೆ. ರಸ್ತೆಯುದ್ದಕ್ಕೂ ಕೇಸರಿ ಬಾವುಟಗಳು ರಾರಾಜಿಸುತ್ತಿದ್ದವು. ಬಿಜೆಪಿ, ಭೈರತಿ ಬಸವರಾಜ್ ಹಾಗೂ ಪ್ರಧಾನಿ ನರೇಂದ್ರ ಮೋದಿ ಪರ ಜಯಘೋಷಗಳು ಮೊಳಗಿದವು.
ಗಲ್ಲಿ ಗಲ್ಲಿಗಳಲ್ಲಿ ಬೃಹತ್ ಗಾತ್ರದ ಹಾರಗಳಿಂದ ಸ್ವಾಗತ:
ಇಂದು ಹೊರಮಾವು,ರಾಮಮೂರ್ತಿನಗರ,ವಿಜಿನಾಪುರ ವಾರ್ಡ್ ಗಳಲ್ಲಿ ಕೈಗೊಂಡ ಪ್ರಚಾರದಲ್ಲಿ ಪ್ರತಿ ಗಲ್ಲಿ ಗಲ್ಲಿಗಳಲ್ಲಿ ನೂರಾರು ಬೆಂಬಲಿಗರಿಂದ ಅಭೂತಪೂರ್ವ ಸ್ವಾಗತ, ಕ್ರೈನ್ ಗಳ ಮೂಲಕ ದೊಡ್ಡ ದೊಡ್ಡ ಹಾರ,ಮಹಿಳೆಯರಿಂದ ಆರತಿ,ಪಟಾಕಿ ಸೌಡ್, ತಮಟೆ ವಾದ್ಯಗಳನ್ನ ನೋಡಿದ ಸಚಿವ ಭೈರತಿ ಬಸವರಾಜ್ ಅವರಿಗೆ ಗೆಲುವು ಸಾಧಿಸಿದಷ್ಟೆ ಸಂತೋಷ ಆಗಿದೆ
ನಂತರ ಮಾತನಾಡಿದ ಸಚಿವ ಭೈರತಿ ಬಸವರಾಜ್, ಕ್ಷೇತ್ರದ ಜನರಿಂದ ಪ್ರೀತಿಯ ಸ್ವಾಗತ ಸಿಗುತ್ತಿದ್ದು, ಉತ್ತಮ ಸ್ಪಂದನೆ ದೊರೆತಿದೆ. ಅಲ್ಲದೆ, ಬಿಸಿಲು ಹಾಗೂ ಮಳೆಯಲ್ಲೂ ಮತದಾರರು ಅತ್ಯುತ್ಸಾಹದಿಂದ ನಮ್ಮನ್ನು ಬರಮಾಡಿಕೊಂಡು ಬೆಂಬಲ ಸೂಚಿಸುತ್ತಿದ್ದಾರೆ.
ಕಷ್ಟಕಾಲದಲ್ಲಿ ಸ್ಪಂದಿಸಿದ್ದೀರಿ, ನಿಮಗೆ ನಮ್ಮ ಮತ ಎನ್ನುತ್ತಿದ್ದಾರೆ. ಬೃಹತ್ ಅಂತರದಿಂದ ಗೆಲ್ಲುವ ವಿಶ್ವಾಸ ಮೂಡುತ್ತಿದೆ. ಹತ್ತು ವರ್ಷಗಳಿಂದ ಕ್ಷೇತ್ರದಲ್ಲಿ ಕೈಗೊಂಡ ಅಭಿವೃದ್ಧಿ ಕೆಲಸಗಳೇ ನನಗೆ ಶ್ರೀರಕ್ಷೆ ಎಂದು ತಿಳಿಸಿದರು.ಮುಂದಿನ ದಿನಗಳಲ್ಲಿ ಮತ್ತಷ್ಟು ಅಭಿವೃದ್ಧಿ ಕೆಲಸ ಮಾಡಿ ನಿಮ್ಮ ಋಣವನ್ನ ತೀರಿಸುವ ಕೆಲಸ ಮಾಡಲಾಗುವುದು ಎಂದು ಭರವಸೆ ನೀಡಿದರು.
