2023ರಲ್ಲಿ ಯುವ ಬ್ಯಾಟರ್‌ ಶುಭಮನ ಗಿಲ್ ಮುಟ್ಟಿದ್ದೆಲ್ಲವೂ ಚಿನ್ನ. ಈ ವರ್ಷ ಎಲ್ಲಾ ಮಾದರಿಯ ಕ್ರಿಕೆಟ್‌ನಲ್ಲಿ ಶತಕ ಬಾರಿಸಿರುವ 23 ವರ್ಷದ ಯುವ ಬ್ಯಾಟರ್‌, ಇದೀಗ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲೂ ಶತಕದ ಖಾತೆ ತೆರೆದಿದ್ದಾರೆ. ಅಹ್ಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಅಬ್ಬರಿಸಿದ ಶುಭಮನ್ ಗಿಲ್, 58 ಎಸೆತಗಳಲ್ಲಿ 101 ರನ್‌ ಬಾರಿಸಿ ಮಿಂಚಿದರು.
ಇದರ ಬೆನ್ನಲ್ಲೇ ಗಿಲ್ ಆಟಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ಟೀಮ್ ಇಂಡಿಯಾ ಮತ್ತು ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಕೂಡ ಗುಣಗಾನ ಮಾಡಿದ್ದು, ಯುವ ತಾರೆಯ ಬ್ಯಾಟಿಂಗ್‌ ಸಾಮರ್ಥ್ಯವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ವಿರಾಟ್ ವಿಶೇಷ ಸಂದೇಶವನ್ನೂ ಬರೆದಿದ್ದಾರೆ.
ಸನ್‌ರೈಸರ್ಸ್‌ ವಿರುದ್ಧದ ಪಂದ್ಯದದಲ್ಲಿ ಗಿಲ್ ಬಾರಿಸಿದ ಶತಕದ ಬಲದಿಂದ ಟೈಟನ್ಸ್‌ 188/9 ರನ್‌ಗಳ ದೊಡ್ಡ ಮೊತ್ತ ದಾಖಲಿಸಿ, ನಂತರ ಎದುರಾಳಿಯನ್ನು 154/9 ರನ್‌ಗಳಿಗೆ ನಿಯಂತ್ರಿಸಿ ಜಯ ದಕ್ಕಿಸಿಕೊಂಡಿತು. ಈ ಮೂಲಕ ಅಂಕಪಟ್ಟಿಯಲ್ಲಿ 18 ಅಂಕ ಕಲೆಹಾಕಿ ಪ್ಲೇ ಆಫ್‌ ತಲುಪಿದ ಮೊದಲ ತಂಡ ಎನಿಸಿಕೊಂಡಿತು. ಇದರ ಬೆನ್ನಲ್ಲೇ ಗಿಲ್ ಆಟವನ್ನು ಕೊಹ್ಲಿ ಗುಣಗಾನ ಮಾಡಿದ್ದಾರೆ. “ಒಂದೆಡೆ ಪ್ರತಿಭಾನ್ವಿತ ಆಟಗಾರರು, ಮತ್ತೊಂದೆಡೆ ಶುಭಮನ್ ಗಿಲ್. ಇದೇ ರೀತಿ ಸಾಗಿ ಮುಂದಿನ ತಲೆಮಾರನ್ನು ಮುನ್ನಡೆಸಿ. ಶಭಮನ್ ಗಿಲ್ ನಿಮಗೆ ದೇವರ ಆಶೀವಾರ್ದ ಸದಾ ಇರಲಿ,” ಎಂದು ಕೊಹ್ಲಿ ತಮ್ಮ ಇನ್ಸ್ಟಾಗ್ರಾಮ್ ಗೋಡೆಯ ಮೇಲೆ ಬರೆದುಕೊಂಡಿದ್ದಾರೆ.
ವಿರಾಟ್ ಕೊಹ್ಲಿ ಅವರ ಈ ಪೋಸ್ಟ್‌, ಟೀಮ್ ಇಂಡಿಯಾ ಪರ ರನ್‌ ಹೊಳೆ ಹರಿಸುವ ಜವಾಬ್ದಾರಿಯನ್ನು ತಮ್ಮಿಂದ ಈಗ ಯುವ ಆಟಗಾರ ಶುಭಮನ್ ಗಿಲ್‌ಗೆ ಹಸ್ತಾಂತರಿಸುತ್ತಿರುವ ಸೂಚನೆಯಂತ್ತಿದೆ. ಮುಂದಿನ ತಲೆಮಾರಿನ ತಂಡಕ್ಕೆ ಗಿಲ್ ಸೂಕ್ತ ನಾಯಕ ಎಂಬ ಸಂದೇಶ ನೀಡಿದಂತ್ತಿದೆ. ಅಂದಹಾಗೆ ಗಿಲ್, ಈ ಶತಕದಬಲದಿಂದ ರೋಹಿತ್‌ ಶರ್ಮಾ, ವಿರಾಟ್ ಕೊಹ್ಲಿ, ಸುರೇಶ್‌ ರೈನಾ, ಕೆ.ಎಲ್‌ ರಾಹುಲ್ ಮತ್ತು ಸೂರ್ಯಕುಮಾರ್‌ ಯಾದವ್‌ ಇರುವ ವಿಶೇಷ ದಾಖಲೆ ಪಟ್ಟಿ ಸೇರಿದ್ದಾರೆ. ಟೆಸ್ಟ್, ಏಕದಿನ, ಟಿ20-ಐ ಮತ್ತು ಐಪಿಎಲ್‌ ಎಲ್ಲದದರಲ್ಲೂ ಶತಕ ಬಾರಿಸಿದ ಭಾರತದ 6ನೇ ಬ್ಯಾಟರ್‌ ಎಂಬ ಹೆಗ್ಗಳಿಕೆ ಪಡೆದುಕೊಂಡಿದ್ದಾರೆ.
