ಹುಬ್ಬಳ್ಳಿ: ಬಹು ನಿರೀಕ್ಷೆಯ ಧಾರವಾಡ-ಬೆಂಗಳೂರು ಮಧ್ಯೆ ವಂದೇ ಭಾರತ್ ರೈಲಿನ ಸೇವೆ ಇನ್ನು ಕೆಲವೇ ದಿನಗಳಲ್ಲಿ ವಿದ್ಯುಕ್ತವಾಗಿ ಆರಂಭವಾಗಲಿದೆ. ದೆಹಲಿಯಲ್ಲಿ ಕೇಂದ್ರ ರೈಲ್ವೇ ಮಂತ್ರಿ ಅವರನ್ನು ಭೇಟಿ ಮಾಡಿ ಈ ಕುರಿತು ಚರ್ಚೆ ನಡೆಸಿದ್ದು, ರೈಲು ಸೇವೆಯ ಆರಂಭಕ್ಕೆ ಅಗತ್ಯವಿರುವ ಎಲ್ಲಾ ಸಿದ್ಧತೆಗಳು ಪೂರ್ಣಗೊಂಡಿವೆ. ಜುಲೈ ವೇಳೆಗೆ ರಾಜ್ಯದ ಎರಡನೇ ವಂದೇ ಭಾರತ್ ರೈಲಿಗೆ ಚಾಲನೆ ನೀಡುವ ಭರವಸೆಯನ್ನು ಸಚಿವರು ನೀಡಿದ್ದಾರೆ ಎಂದು ಕೇಂದ್ರ ಸಚಿವ ಪ್ರಲ್ಹಾದ ಜೋಶಿಯವರು ತಿಳಿಸಿದ್ದಾರೆ.
ಹುಬ್ಬಳ್ಳಿ ಧಾರವಾಡ ಅವಳಿ ನಗರದ ಜನರ ಬಹು ನಿರೀಕ್ಷಿತ ಈ ಉತ್ಕಷ್ಟ ರೈಲಿನ ಪ್ರಯಾಣದ ಅನುಭವವನ್ನು ಶೀಘ್ರದಲ್ಲಿಯೇ ಆಸ್ವಾದಿಸಬಹುದಾಗಿದೆ ಎಂದೂ ಜೋಶಿ ಹೇಳಿದ್ದಾರೆ. ದೇಶದ ಅತಿ ವೇಗದ ರೈಲು ಇದಾಗಿದ್ದು, ಗಂಟೆಗೆ ಗರಿಷ್ಠ 160 ಕಿ.ಮೀ. ವೇಗದದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿದೆ. ಐಶಾರಾಮಿ ವ್ಯವಸ್ಥೆ, ಸೀಟುಗಳನ್ನು ವಿಮಾನದ ರೀತಿ ನಿರ್ಮಿಸಲಾಗಿದ್ದು, ಇದು ವಿಶ್ವದರ್ಜೆಯ ಪ್ರಯಾಣಿಕರ ಸೌಕರ್ಯಗಳನ್ನು ಹೊಂದಿದೆ. ಹವಾನಿಯಂತ್ರಿತ, ಎಕಾನಮಿ ಮತ್ತು ಪ್ರೀಮಿಯಂ ಕ್ಲಾಸ್‌ಗಳನ್ನು ಈ ರೈಲು ಹೊಂದಿದೆ. ವಂದೇ ಭಾರತ್ ರೈಲಿನಲ್ಲಿ ಆನ್‌ಬೋರ್ಡ್‌ ಉಪಾಹಾರದ ವ್ಯವಸ್ಥೆ ಇದೆ. ರೀಡಿಂಗ್‌ ಲೈಟ್‌ ವ್ಯವಸ್ಥೆ, ಸ್ವಯಂ ಚಾಲಿತ ಬಾಗಿಲು, ವೈಫೈ, ಮಾಹಿತಿ ವ್ಯವಸ್ಥೆ, ಚಾರ್ಜಿಂಗ್‌ ಪಾಯಿಂಟ್‌, ಸಿಸಿ ಟಿವಿ, ಬಯೋ ಶೌಚಾಲಯ ವ್ಯವಸ್ಥೆ ಇದೆ
ಜನಸ್ನೇಹಿಯಾದ ನೈರುತ್ಯ ರೈಲ್ವೆ-8,071 ಕೋಟಿ ಆದಾಯ
ಹುಬ್ಬಳ್ಳಿಯ ಜನಸ್ನೇಹಿ ಚಿಂತನೆಯಿಂದ ನೈರುತ್ಯ ರೈಲ್ವೆ ವಲಯವು ಸರಕು ಸಾಗಣೆಯಲ್ಲಿ ವಿಶ್ವಾಸಾರ್ಹ ಸೇವೆ ಸಲ್ಲಿಸುತ್ತಿದೆ. 2022-23ನೇ ಸಾಲಿನಲ್ಲಿ ಸರಕು ಸಾಗಣೆ, ನಾನಾ ಸೇವೆಗಳ ಮೂಲಕ ಒಟ್ಟು 8,071ಕೋಟಿ ರೂ. ಆದಾಯ ಗಳಿಕೆ ಹಾಗೂ 150.34 ದಶಲಕ್ಷ ಪ್ರಯಾಣಿಕರೂ ಸಂಚರಿಸಿದ್ದು ದಾಖಲೆಯಾಗಿದೆ.
ಆದಾಯ ಗಳಿಕೆ ಮೂಲಗಳು
2,756 ಕೋಟಿ ರೂ-ರೈಲ್ವೆ ಪ್ರಯಾಣಿಕರು
4,696 ಕೋಟಿ ರೂ-ಸರಕು ಸಾಗಣೆ
348 ಕೋಟಿ ರೂ-ವಿವಿಧ ಮೂಲಗಳು
271 ಕೋಟಿ ರೂ-ಇತರೆ ಮೂಲಗಗಳು
ಇದೇ ಮೊದಲು
ನೈರುತ್ಯ ರೈಲ್ವೆ ವಲಯ ಪ್ರಾರಂಭದ ನಂತರ ಇದೇ ಮೊದಲ ಬಾರಿಗೆ 8 ಸಾವಿರ ಕೋಟಿ ರೂ.ಆದಾಯ ದಾಟಿದೆ. 2022-23ರಲ್ಲಿನ ಒಟ್ಟು ಆದಾಯವು 2021-22ರಲ್ಲಿ ದಾಖಲಾದ ಶೇ.30ಕ್ಕಿಂತ ಹೆಚ್ಚಾಗಿದೆ.
ಆಯ್ಕೆಯ ಸಾರಿಗೆ
‘‘ಆಟೋಮೊಬೈಲ್‌ ಉದ್ಯಮಿಗಳಿಗೆ ರೈಲ್ವೆಯು ಸುರಕ್ಷಿತ, ಸಕಾಲಿಕ, ಹಾನಿ ರಹಿತ, ವಿಶ್ವಾಸಾರ್ಹ ಮತ್ತು ಪರಿಸರ ಸ್ನೇಹಿ ‘ಆಯ್ಕೆಯ ಸಾರಿಗೆ’ ಆಗಿ ಹೊರಹೊಮ್ಮಿದೆ. ಕಳೆದ ವರ್ಷ 238 ರೇಕ್‌, 2022-23ರಲ್ಲಿ 509 ರೇಕ್‌ಗಳಲ್ಲಿ ಆಟೋಮೊಬೈಲ್‌ಗಳಿಗೆ ಸಂಬಂಧಿಸಿದ ವಸ್ತುಗಳನ್ನು ಸಾಗಿಸಿದೆ.
ಹೆಚ್ಚಿನ ಪ್ರಮಾಣ ಲೋಡಿಂಗ್‌(ಮೆಟ್ರಿಕ್‌ ಟನ್‌ಗಳಲ್ಲಿ)
ಖನಿಜ ತೈಲ-2.05
ಸಿಮೆಂಟ್‌-1.07 ಮೆಟ್ರಿಕ್‌ ಟನ್‌
ಸಕ್ಕರೆ -1.45 ಮೆಟ್ರಿಕ್‌ ಟನ್‌
ಪ್ರಯಾಣಿಕರ ಬೇಡಿಕೆಗೂ ಮನ್ನಣೆ
‘‘ಹಬ್ಬ-ಹರಿದಿನ, ರಜಾದಿನ ಮತ್ತು ಇತರ ಸಂದರ್ಭಗಳಲ್ಲಿ253 ಹೆಚ್ಚುವರಿ ಬೋಗಿಗಳನ್ನು ಶಾಶ್ವತ ಮತ್ತು 224 ಬೋಗಿಗಳನ್ನು ತಾತ್ಕಾಲಿಕ ಆಧಾರದ ಮೇಲೆ ಜೋಡಿಸಲಾಗಿದೆ.
ಪ್ರಯಾಣಿಕರಿಗಾಗಿ ಬೋಗಿಗಳು
ಟಿಕೆಟ್‌ ಕಾಯ್ದಿರಿಸಿದ ಪ್ರಯಾಣಿಕರ ಅನುಕೂಲಕ್ಕಾಗಿ ವರ್ಷದಲ್ಲಿ2,335 ಹೆಚ್ಚುವರಿ ಬೋಗಿಗಳನ್ನು ಒದಗಿಸಿದೆ. ಪ್ರಯಾಣಿಕರ ಸುರಕ್ಷತೆ ಹಾಗೂ ಸೌಕರ್ಯ ಒದಗಿಸುವ ಸಲುವಾಗಿ 10 ರೈಲುಗಳನ್ನು ಸಾಂಪ್ರದಾಯಿಕ ಐಸಿಎಫ್‌ ಬೋಗಿಗಳಿಂದ ಎಲ್‌ಎಚ್‌ಬಿ ಬೋಗಿಗಳಾಗಿ ಮಾರ್ಪಡಿಸಲಾಗಿದೆ. ಪ್ರಯಾಣಿಕರ ವಿನಂತಿ ಮೇರೆಗೆ ಒಟ್ಟು 13 ಎಫ್‌ಟಿಆರ್‌ ರೈಲು ಸೇವೆಗಳು (ಒಪ್ಪಂದದ ಮೇರೆಗೆ ರೈಲು ಸೇವೆ), ವಿಶೇಷ ರೈಲುಗಳಿಗೆ 49 ಎಫ್‌ಟಿಆರ್‌ ಬೋಗಿಗಳನ್ನು ಜೋಡಿಸಲಾಗಿದೆ.
2,816 ನಿಮಿಷ ಉಳಿತಾಯ
116 ರೈಲುಗಳ ವೇಗ ಹೆಚ್ಚಿಸುವ ಮೂಲಕ 2,816 ನಿಮಿಷಗಳ ಪ್ರಯಾಣದ ಸಮಯ ಉಳಿಸಿದಂತಾಗಿದೆ. 6 ಜೋಡಿ ರೈಲುಗಳನ್ನು ಸೂಪರ್‌ಫಾಸ್ಟ್‌ ಎಕ್ಸ್‌ಪ್ರೆಸ್‌ ರೈಲುಗಳಾಗಿ ಮೇಲ್ದರ್ಜೆಗೇರಿಸಲಾಗಿದೆ. ನಾಲ್ಕು ಹೊಸ ರೈಲು, ಎರಡು ರೈಲುಗಳ ವಿಸ್ತರಣೆ ಹಾಗೂ ಎರಡು ರೈಲುಗಳ ಸೇವೆಯನ್ನು ಆವರ್ತನೆಗೆ(ಫ್ರಿಕ್ವೇನ್ಸಿ) ಹೆಚ್ಚಿಸಲಾಯಿತು.
150.34 ದಶಲಕ್ಷ ಪ್ರಯಾಣ
‘‘2022-23ರ ಆರ್ಥಿಕ ವರ್ಷದಲ್ಲಿ ಒಟ್ಟು 150.34 ದಶಲಕ್ಷ ಪ್ರಯಾಣಿಕರನ್ನು ಸಾಗಿಸಲಾಗಿದ್ದು, ಇದು ವಲಯ ಪ್ರಾರಂಭ ಆದಾಗಿನಿಂದ ಇಲ್ಲಿವರೆಗಿನ ಅತ್ಯಧಿಕ ದಾಖಲೆಯಾಗಿದೆ.
