ಲಂಡನ್‌: ಅತ್ಯಂತ ರೋಚಕವಾಗಿ ಮೂಡಿಬಂದ 2023ರ ಸಾಲಿನ ಪ್ರತಿಷ್ಠಿತ ದಿ ಆಷಸ್‌ ಟೆಸ್ಟ್ ಕ್ರಿಕೆಟ್‌ ಸರಣಿಯು ಇದೀಗ ಕ್ಲೈ-ಮ್ಯಾಕ್ಸ್‌ ತಲುಪಿದೆ. ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ಸೋತು ಸೊರಗಿದ್ದ ಆತಿಥೇಯ ಇಂಗ್ಲೆಂಡ್‌ ಬಳಿಕ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿತು. ಮೂರನೇ ಟೆಸ್ಟ್‌ನಲ್ಲಿ ಸಿಕ್ಕ ರೋಚಕ ಜಯದ ಬಳಿಕ ನಾಲ್ಕನೇ ಟೆಸ್ಟ್‌ನಲ್ಲೂ ಗೆಲುವಿನತ್ತ ದಾಪುಗಾಲಿಟ್ಟಿತ್ತು. ಆದರೆ, ಬಿಡದೇ ಸುರಿದ ಮಳೆ ಕಾರಣ ಅಂತಿಮ ದಿನದಾಟ ರದ್ದಾದ್ದಿಂದ ಇಂಗ್ಲೆಂಡ್‌ ಡ್ರಾ ಫಲಿತಾಂಶದ ನಿರಾಶೆಗೊಳಗಾಯಿತು. ಹೀಗಾಗಿ ಸರಣಿ ಸೋಲಿನ ಆಘಾತ ತಪ್ಪಿಸಿಕೊಳ್ಳಲು ಕೆನಿಂಗ್ಟನ್‌ ಓವಲ್‌ನಲ್ಲಿ ಜುಲೈ 27ರಿಂದ 31ರವರೆಗೆ ನಡೆಯಲಿರುವ 5ನೇ ಹಾಗೂ ಅಂತಿಮ ಟೆಸ್ಟ್ ಗೆಲ್ಲಲೇ ಬೇಕಾದ ಒತ್ತಡಕ್ಕೆ ಸಿಲುಕಿದೆ.
2002ರ ಬಳಿಕ ತಾಯ್ನಾಡಿನಲ್ಲಿ ಆಸೀಸ್‌ ಎದುರು ಇಂಗ್ಲೆಂಡ್‌ ತಂಡ ಆಷಸ್‌ ಸರಣಿ ಸೋತಿಲ್ಲ. ಈ ಬಾರಿ ಸೋಲಿನ ದವಡೆಗೆ ಸಿಲುಕಿದೆಯಾದರೂ, ಅಂತಿಮ ಟೆಸ್ಟ್ ಗೆದ್ದು ಮರ್ಮಾಘಾತ ತಪ್ಪಿಸಿಕೊಳ್ಳುವ ಲೆಕ್ಕಾಚಾರ ಹೊಂದಿದೆ. ಈ ಸಲುವಾಗಿ 15 ಆಟಗಾರರ ತಂಡವನ್ನು ಮಂಗಳವಾರ ಪ್ರಕಟ ಮಾಡಿದೆ. ಮ್ಯಾಂಚೆಸ್ಟರ್‌ ಟೆಸ್ಟ್‌ಗೆ ಆಯ್ಕೆ ಮಾಡಲಾಗಿದ್ದ ಆಟಗಾರರನ್ನೇ ಉಳಿಸಿಕೊಳ್ಳಲಾಗಿದ್ದು, ಕಳಪೆ ಲಯದ ಹೊರಗಾಇಯೂ ಅನುಭವಿ ವೇಗಿ ಜೇಮ್ಸ್‌ ಆಂಡನ್ಸನ್‌ ಅವರನ್ನು ತಂಡದಲ್ಲಿ ಉಳಿಸಿಕೊಳ್ಳಲಾಗಿದೆ. 41 ವರ್ಷದ ಹಿರಿಯ ವೇಗದ ಬೌಲರ್‌ಗೆ ಬಹುಶಃ ಇದು ಕಟ್ಟ ಕಡೆಯ ಟೆಸ್ಟ್ ಪಂದ್ಯವಾಗಲಿದ್ದು, ಆಡುವ 11ರ ಬಳಗದಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ. ಮ್ಯಾಂಚೆಸ್ಟರ್‌ ಟೆಸ್ಟ್‌ನಲ್ಲಿ ಜಿಮ್ಮಿ ಕೇವಲ 1 ವಿಕೆಟ್‌ ಮಾತ್ರವೇ ಪಡೆದರು.
ಐದನೇ ಹಾಗೂ ಅಂತಿಮ ಟೆಸ್ಟ್‌ಗೆ ಇಂಗ್ಲೆಂಡ್‌ ತಂಡ ಹೀಗಿದೆ
ಬೆನ್‌ ಸ್ಟೋಕ್ಸ್‌ (ನಾಯಕ), ಮೊಯೀನ್ ಅಲಿ, ಜೇಮ್ಸ್‌ ಆಂಡರ್ಸನ್‌, ಜಾನಿ ಬೈರ್‌ಸ್ಟೋವ್‌ (ವಿಕೆಟ್‌ಕೀಪರ್‌), ಸ್ಟುವರ್ಡ್‌ ಬ್ರಾಡ್‌, ಹ್ಯಾರಿ ಬ್ರೂಕ್‌, ಝ್ಯಾಕ್‌ ಕ್ರಾವ್ಲಿ, ಡ್ಯಾನ್‌ ಲಾರೆನ್ಸ್‌, ಓಲ್ಲೀ ರಾಬಿನ್ಸನ್‌, ಜೋ ರೂಟ್‌, ಜಾಶ್‌ ಟಂಗ್‌, ಕ್ರಿಸ್‌ ವೋಕ್ಸ್‌, ಮಾರ್ಕ್‌ ವುಡ್‌.
