ಫ್ಲೋರಿಡಾ (ಅಮೆರಿಕ): ವೆಸ್ಟ್ ಇಂಡೀಸ್‌ ವಿರುದ್ಧದ 5 ಪಂದ್ಯಗಳ ಟಿ20 ಕ್ರಿಕೆಟ್‌ ಸರಣಿ ಇದೀಗ ಕುತೂಹಲದ ಘಟ್ಟದಲ್ಲಿದೆ. ಮೊದಲ ಎರಡು ಪಂದ್ಯ ಸೋತು ಸರಣಿ ಸೋಲಿನ ಭೀತಿಯಲ್ಲಿದ್ದ ಟೀಮ್ ಇಂಡಿಯಾ, ಬಳಿಕ ಭರ್ಜರಿ ಕಮ್‌ಬ್ಯಾಕ್‌ ಮಾಡಿದೆ. ಮೂರನೇ ಪಂದ್ಯದಲ್ಲಿ 7 ವಿಕೆಟ್‌ಗಳ ಜಯ ದಾಖಲಿಸಿರುವ ಹಾರ್ದಿಕ್‌ ಪಾಂಡ್ಯ ಬಳಗ ಇದೀಗ ಫ್ಲೊರಿಡಾದ ಲೌಡರ್ಹಿಲ್ ಸೆಂಟ್ರಲ್‌ ಬ್ರೊವಾರ್ಡ್‌ ಸ್ಟೇಡಿಯಂನಲ್ಲಿ ಇಂದು ಶನಿವಾರ ನಡೆಯಲಿರುವ ಪಂದ್ಯದಲ್ಲಿ ಆತಿಥೇಯರ ಸದ್ದಡಗಿಸಿ 2-2 ಅಂತರದ ಸಮಬಲ ತಂದುಕೊಳ್ಳುವ ಲೆಕ್ಕಾಚಾರ ಮಾಡಿದೆ. ಅಂದಹಾಗೆ ಈ ಕ್ರೀಡಾಂಗಣದಲ್ಲಿ ಭಾರತ ತಂಡ ಈವರೆಗೆ ಆಡಿರುವ 6 ಪಂದ್ಯಗಳಲ್ಲಿ 4 ಜಯ ದಾಖಲಿಸಿ ಉತ್ತಮ ರೆಕಾರ್ಡ್ ಹೊಂದಿದೆ.
ಈ ಮಹತ್ವದ ಪಂದ್ಯದಲ್ಲಿ ಭಾರತ ಗೆದ್ದರೆ ಸರಣಿ ಸಮಬಲಕ್ಕೆ ಬರಲಿದೆ. ಒಂದು ವೇಳೆ ವೆಸ್ಟ್ ಇಂಡೀಸ್‌ ತಿರುಗೇಟು ನೀಡಿದರೆ 3-1 ಅಂತರದಲ್ಲಿ ಇನ್ನೊಂದು ಪಂದ್ಯ ಬಾಕಿ ಇರುವಾಗಲೇ ಸರಣಿ ವಶಕ್ಕೆ ಪಡೆಯಲಿದೆ. ಇನ್ನು ಲೌಡರ್ಹಿಲ್ ಕ್ರೀಡಾಂಗಣದಲ್ಲಿ ವೆಸ್ಟ್ ಇಂಡೀಸ್‌ ಈವರೆಗೆ ಆಡಿರುವ 10 ಪಂದ್ಯಗಳಲ್ಲಿ 6 ಸೋಲುಂಡಿದೆ. ಇದು ಟೀಮ್ ಇಂಡಿಯಾದ ಆತ್ಮವಿಶ್ವಾಸ ಹೆಚ್ಚಿಸಬಹುದು. ಜೊತೆಗೆ 2016ರ ಬಳಿಕ ಈ ಕ್ರೀಡಾಂಗಣದಲ್ಲಿ ವೆಸ್ಟ್ ಇಂಡೀಸ್‌ ಒಂದು ಪಂದ್ಯವನ್ನೂ ಗೆದ್ದಿಲ್ಲ.
ಪಿಚ್ ವರದಿ
ಫ್ಲೊರಿಡಾದ ಲೌಡರ್ಹಿಲ್ ಸೆಂಟ್ರಲ್‌ ಬ್ರೊವಾರ್ಡ್‌ ಸ್ಟೇಡಿಯಂನಲ್ಲಿ ಮೊದಲು ಬ್ಯಾಟ್‌ ಮಾಡಿದ ತಂಡಗಳೇ ಹೆಚ್ಚು ಪಂದ್ಯಗಳನ್ನು ಗೆದ್ದಿವೆ. ಆದರೆ, ಟಾಸ್‌ ಗೆದ್ದ ತಂಡ ಇಲ್ಲಿ ಬೌಲಿಂಗ್‌ ಆಯ್ಕೆ ಮಾಡಿಕೊಳ್ಳುವ ಸಾಧ್ಯತೆ ಹೆಚ್ಚು. ಏಕೆಂದರೆ ಇಲ್ಲಿನ ವಾತಾವರಣ ಮತ್ತು ಪಿಚ್ ಆರಂಭದಲ್ಲಿ ವೇಗದ ಬೌಲರ್‌ಗಳಿಗೆ ನೆರವಾಗುತ್ತದೆ. ಒಟ್ಟಾರೆ ದೊಡ್ಡ ಸ್ಕೋರ್‌ನ ಪಂದ್ಯವನ್ನು ಎದುರು ನೋಡಬಹುದಾಗಿದೆ.
ಟೀಮ್ ಇಂಡಿಯಾ ಸಂಭಾವ್ಯ ಪ್ಲೇಯಿಂಗ್ 11 ಹೀಗಿದೆ
01. ಶುಭಮನ್ ಗಿಲ್‌ (ಓಪನರ್‌)
02. ಯಶಸ್ವಿ ಜೈಸ್ವಾಲ್‌ (ಓಪನರ್‌)
03. ಸೂರ್ಯಕುಮಾರ್‌ ಯಾದವ್‌ (ಬ್ಯಾಟರ್‌)
04. ತಿಲಕ್ ವರ್ಮಾ (ಬ್ಯಾಟರ್‌)
05. ಹಾರ್ದಿಕ್‌ ಪಾಂಡ್ಯ (ನಾಯಕ/ ಆಲ್ರೌಂಡರ್)
06. ಸಂಜು ಸ್ಯಾಮ್ಸನ್‌ (ವಿಕೆಟ್‌ಕೀಪರ್‌/ಬ್ಯಾಟ್ಸ್‌ಮನ್‌)
- ಅಕ್ಷರ್‌ ಪಟೇಲ್‌ (ಆಲ್ರೌಂಡರ್)
08. ಕುಲ್ದೀಪ್‌ ಯಾದವ್‌ (ಚೈನಾಮನ್ ಸ್ಪಿನ್ನರ್)
09. ಅರ್ಷದೀಪ್ ಸಿಂಗ್‌ (ಎಡಗೈ ವೇಗದ ಬೌಲರ್‌)
10. ಮುಖೇಶ್‌ ಕುಮಾರ್‌ (ಬಲಗೈ ವೇಗಿದ ಬೌಲರ್‌)
11. ಯುಜ್ವೇಂದ್ರ ಚಹಲ್‌ (ಲೆಗ್‌ ಸ್ಪಿನ್ನರ್)
