ಬ್ರೆಜಿಲ್ (ದಕ್ಷಿಣ ಅಮೆರಿಕ): ಒಂದೇ ವರ್ಷದಲ್ಲಿ ಬರೋಬ್ಬರಿ 45 ಕೆ. ಜಿ. ತೂಕ ಇಳಿಸಿಕೊಂಡು ಗಮನ ಸೆಳೆದಿದ್ದ ಬ್ರೆಜಿಲ್ ದೇಶದ ಫಿಟ್ನೆಸ್ ಹಾಗೂ ಆರೋಗ್ಯ ಇನ್ಫ್ಲ್ಯುಯೆನ್ಸರ್ ಅಡ್ರಿಯಾನಾ ಥೈಸೆನ್ ಅವರು ನಿಗೂಢ ರೋಗಕ್ಕೆ ಬಲಿಯಾಗಿದ್ದಾರೆ. ಅಡ್ರಿಯಾನಾ ಥೈಸೆನ್ ಅವರಿಗೆ 49 ವರ್ಷ ವಯಸ್ಸಾಗಿತ್ತು. ಅಡ್ರಿಯಾನಾ ಅವರ ಸಾವಿಗೆ ನಿಖರ ಕಾರಣ ತಿಳಿದು ಬಂದಿಲ್ಲ ಎಂದು ನ್ಯೂಯಾರ್ಕ್‌ ಪೋಸ್ಟ್‌ ವರದಿ ಮಾಡಿದೆ.
ಬ್ರೆಜಿಲ್ ರಾಜಧಾನಿ ಸಾವೋ ಪೌಲೋದಲ್ಲಿ ಇರುವ ಉಬೆರ್‌ಲ್ಯಾಂಡಿಯಾ ಎಂಬ ಅಪಾರ್ಟ್‌ಮೆಂಟ್‌ನ ಫ್ಲಾಟ್ ಒಂದರಲ್ಲಿ ಅಡ್ರಿಯಾನಾ ಥೈಸೆನ್ ನೆಲೆಸಿದ್ದರು. ಇದೇ ಫ್ಲಾಟ್‌ನಲ್ಲಿ ಅವರ ಮೃತ ದೇಹ ಪತ್ತೆಯಾಗಿತ್ತು. ಆಕೆಯ ಸಾವಿಗೆ ನಿಖರ ಕಾರಣ ತಿಳಿದು ಬಂದಿಲ್ಲ. ಆಕೆಯ ಕುಟುಂಬಸ್ಥರೂ ಕೂಡಾ ತಮ್ಮ ಮಗಳ ಸಾವಿನ ಕಾರಣನನ್ನು ಬಹಿರಂಗಪಡಿಸಿಲ್ಲ.
ಸಾಮಾಜಿಕ ಜಾಲತಾಣಗಳಲ್ಲಿ ಡ್ರಿಕಾ ಎಂದೇ ಚಿರಪರಿಚಿತರಾಗಿದ್ದ ಅಡ್ರಿಯಾನಾ ಥೈಸೆನ್, ಫಿಟ್ನೆಸ್ ಎಕ್ಸ್‌ಪರ್ಟ್‌ ಆಗಿದ್ದರು. ದೈಹಿಕ ಹಾಗೂ ಮಾನಸಿಕವಾಗಿ ಉತ್ತಮ ಆರೋಗ್ಯ ಕಾಪಾಡಿಕೊಳ್ಳುವ ಬಗ್ಗೆ ಹಾಗೂ ದೇಹದ ತೂಕ ಕಡಿಮೆ ಮಾಡಿಕೊಳ್ಳೋದು ಹೇಗೆ ಎಂಬುದರ ಕುರಿತಾಗಿ ತಮ್ಮ ಸಲಹೆಗಳನ್ನು ಸಾಮಾಜಿಕ ಜಾಲತಾಣ ಇನ್‌ಸ್ಟಾ ಗ್ರಾಂನಲ್ಲಿ ಹಂಚಿಕೊಳ್ಳುತ್ತಿದ್ದರು. ಒಂದೇ ವರ್ಷಕ್ಕೆ ಸಾವಿರ ಪೌಂಡ್ ಅಂದರೆ 45 ಕೆಜಿ ತೂಕ ಇಳಿಸಿಕೊಂಡಿದ್ದ ಅಡ್ರಿಯಾನಾ ಥೈಸೆನ್, ಸಾಮಾಜಿಕ ಜಾಲತಾಣದಲ್ಲಿ ಇನ್ಫ್ಲ್ಯುಯೆನ್ಸರ್ ಆಗಿ ಲಕ್ಷಾಂತರ ಅಭಿಮಾನಿಗಳನ್ನು ಹೊಂದಿದ್ದರು.
