ಒಟ್ಟು ಬಿಗ್ ಬಾಸ್ ಮನೆಯೊಳಗೆ 17 ಸ್ಪರ್ಧಿಗಳಿದ್ದಾರೆ. ಅದರಲ್ಲಿ ವರ್ತೂರ್ ಸಂತೋಷ್, ಸಂಗೀತಾ ಶೃಂಗೇರಿ, ಕಾರ್ತಿಕ್ ಮಹೇಶ್‌, ರಕ್ಷಕ್ ಬುಲೆಟ್, ತನಿಷಾ ಕುಪ್ಪುಂದ ಮತ್ತು ಡ್ರೋನ್ ಪ್ರತಾಪ್ ಅವರು ಅಸಮರ್ಥರು ಲಿಸ್ಟ್‌ನಲ್ಲಿ ಇದ್ದಾರೆ. ಇನ್ನುಳಿದವರೆಲ್ಲರಿಗೂ ಈ ಆರು ಜನರ ಜೊತೆಗೆ ಒಂದಲ್ಲಾ ಒಂದು ವಿಚಾರಕ್ಕೆ ವಾದ-ವಾಗ್ವಾದ ನಡೆಯುತ್ತಲೇ ಇರುತ್ತದೆ. ಇದೀಗ ಡ್ರೋನ್ ಪ್ರತಾಪ್ ಅವರು ಅಡುಗೆ ಮನೆಗೆ ಬಂದು ವಿನಯ್ ಬಗ್ಗೆ ಮಾತನಾಡಿದ್ದಾರೆ. ಅದು ವಿನಯ್ ಗೌಡಗೆ ಗೊತ್ತಾಗಿದ್ದು, ಪ್ರತಾಪ್ ಮೇಲೆ ಏಕಾಏಕಿ ಕೋಪಗೊಂಡಿದ್ದಾರೆ.
‘ನೀವೆಷ್ಟು ಚೆನ್ನಾಗಿ ಅಡುಗೆ ಮಾಡ್ತೀರಾ ಅಂತ ನಮಗೂ ಗೊತ್ತಿದೆ ಎಂದು ವಿನಯ್ ಅಣ್ಣ ಹೇಳ್ತಿದ್ದಾರೆ..’ ಅಂತ ಅಡುಗೆ ಮನೆಯಲ್ಲಿ ಪ್ರತಾಪ್ ಉಳಿದ ಅಸಮರ್ಥರ ಬಳಿ ಚರ್ಚೆ ಮಾಡಿದ್ದಾರೆ. ಇದು ವಿನಯ್‌ಗೆ ಗೊತ್ತಾಗಿದೆ. ಪ್ರತಾಪ್ ಇರುವ ಜಾಗಕ್ಕೆ ಬಂದ ವಿನಯ್, ‘ಕಣ್ಣಲ್ಲಿ ಕಣ್ಣಿಟ್ಟು ಮುಖದ ಮೇಲೆ ಹೇಳುತ್ತೇನೆ. ಹಿಂದೆ ಮುಂದೆ ಮಾತಾಡುವವನು ನಾನಲ್ಲ. ನೀವೆಲ್ಲ ಗಲೀಜಾಗಿ ಮಾಡ್ತಾ ಇದ್ದೀರಿ ಅಂತೇನಾದರೂ ಹೇಳಿದ್ನಾ ನಾನು? ನಿಂದು ತಪ್ಪಿದೆ. ಇವತ್ತು ನಿನ್ ಡ್ರೋನ್‌ದು ರೆಕ್ಕೆ ಪುಕ್ಕ ಎಲ್ಲ ಕಿತ್ತು ಹಾಕ್ತೀನಿ..’ ಎಂದು ವಿನಯ್ ಗರಂ ಆಗಿದ್ದಾರೆ. ಇಂದಿನ ಎಪಿಸೋಡ್‌ನಲ್ಲಿ ಏನಾಗಲಿದೆ ಎಂಬುದನ್ನ ಕಾದು ನೋಡಬೇಕು.
‘ಬಿಗ್ ಬಾಸ್ ಕನ್ನಡ ಸೀಸನ್ 10’ ಶೋನಲ್ಲಿ ವಿನಯ್ ಗೌಡ ಅವರು ತಮ್ಮ ಖಡಕ್ ನಿಲುವಿನಿಂದ ಮನೆಯನ್ನು ಕಂಟ್ರೋಲ್‌ಗೆ ತೆಗೆದುಕೊಳ್ಳಲು ಪ್ರಯತ್ನಿಸುತ್ತಿದ್ದಾರಾ ಎಂಬ ಅನುಮಾನ ಮೂಡಿದೆ. ಸದ್ಯ ಮನೆಯಲ್ಲಿರುವ 17 ಸ್ಪರ್ಧಿಗಳಲ್ಲಿ ವಿನಯ್ ಗೌಡ ಅವರ ಧ್ವನಿಯೇ ಕೊಂಚ ಜೋರು. ‘ನಾನಾ ನೀನಾ’ ಎಂಬ ಪೈಪೋಟಿಯಲ್ಲೇ ಅವರ ಆಟದ ಶೈಲಿ ಇರುತ್ತದೆ.
