ಅಹಮದಾಬಾದ್‌: ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ವಿಶ್ವಕಪ್‌ ಕ್ರಿಕೆಟ್‌ (Wordl Cup Cricket) ಪಂದ್ಯದಲ್ಲಿ ಪಾಕ್‌ (Pakistan) ತಂಡದ ರಿಜ್ವಾನ್ ಮೊಹಮ್ಮದ್ (Mohammad Rizwan) ಅವರನ್ನು ವಿರಾಟ್ ಕೊಹ್ಲಿ ಟ್ರೋಲ್ ಮಾಡಿದ್ದಾರೆ. 12.3 ಓವರ್‌ನಲ್ಲಿ ಇಮಾಮ್‌-ಉಲ್‌-ಹಕ್‌ ಔಟಾದ ನಂತರ ರಿಜ್ವಾನ್ ಕ್ರೀಸ್‌ಗೆ ಆಗಮಿಸಿದರು. ಈ ವೇಳೆ ಗಾರ್ಡ್‌ ತೆಗೆದುಕೊಳ್ಳಲು ರಿಜ್ವಾನ್ ಕೆಲ ನಿಮಿಷ ತೆಗೆದುಕೊಂಡರು. ಅಂದಾಜು ಬ್ಯಾಟರ್‌ ತೆಗೆದುಕೊಳ್ಳುವ ಸೆಕೆಂಡ್‌ಗಿಂತಲೂ ಹೆಚ್ಚು ಸಮಯ ತೆಗೆದುಕೊಂಡಿದ್ದಕ್ಕೆ ಕೊಹ್ಲಿ (Virat Kohli) ವಾಚ್‌ ಕಟ್ಟುವ ಎಡಗೈನ್ನು ನೋಡಿ “ಎಷ್ಟು ಸಮಯ ಎಂದು” ಪ್ರಶ್ನೆ ಮಾಡುವಂತೆ ಟ್ರೋಲ್ ಮಾಡಿದರು.
ಶ್ರೀಲಂಕಾ ವಿರುದ್ಧ ಸೆಂಚೂರಿ ಸಿಡಿಸಿದ್ದ ರಿಜ್ವಾನ್ ಈ ಪಂದ್ಯದಲ್ಲಿ 1 ರನ್‌ನಿಂದ ಅರ್ಧಶತಕ ವಂಚಿತರಾದರು. 69 ಎಸೆತ ಎದುರಿಸಿದ ರಿಜ್ವಾನ್ 7 ಬೌಂಡರಿಯೊಂದಿಗೆ 49 ರನ್‌ಗಳಿಸಿ ಔಟಾದರು. ಪಾಕಿಸ್ತಾನ 29.3 ಓವರ್‌ಗಳಲ್ಲಿ 2 ವಿಕೆಟ್‌ ನಷ್ಟಕ್ಕೆ 155 ರನ್‌ಗಳಿಸಿ ಸುಭದ್ರ ಸ್ಥಿತಿಯಲ್ಲಿ ಇತ್ತು. ಆದರೆ ಯಾವಾಗ ಬಾಬರ್‌ ಅಜಂ ಔಟಾದರೋ ಅಲ್ಲಿಂದ ಕುಸಿತ ಆರಂಭವಾಯಿತು. ಮಧ್ಯಮ ಕ್ರಮಾಂಕದಲ್ಲಿ ಯಾರು ಪ್ರತಿರೋಧ ನೀಡದ ಪರಿಣಾಮ ಕೇವಲ 36 ರನ್‌ಗಳ ಅಂತರದಲ್ಲಿ 8 ವಿಕೆಟ್‌ ಕಳೆದುಕೊಂಡು 42.5 ಓವರ್‌ಗಳಲ್ಲಿ 191 ರನ್‌ಗಳಿಗೆ ಸರ್ವಪತನ ಕಂಡಿತು.
