ವಾಷಿಂಗ್ಟನ್: ಅಮೆರಿಕದ ಇಂಡಿಯಾನಾ ರಾಜ್ಯದಲ್ಲಿ ಭಾರತ ಮೂಲದ 24 ವರ್ಷದ ವಿದ್ಯಾರ್ಥಿಗೆ ಬಲವಾಗಿ ಇರಿಯಲಾಗಿದ್ದು, ಆತನ ಸ್ಥಿತಿ ಚಿಂತಾಜನಕವಾಗಿದೆ ಎಂದು ಮಾಧ್ಯಮ ವರದಿ ಹೇಳಿದೆ. ಇಂಡಿಯಾನಾದ ವಾಲ್ಪರೈಸೊ ನಗರದ ಸಾರ್ವಜನಿಕ ಜಿಮ್ ಒಂದರಲ್ಲಿ 24 ವರ್ಷದ ಜೋರ್ಡನ್ ಆಂಡ್ರಾಡೆ ಎಂಬಾತ ಭಾರತದ ವಿದ್ಯಾರ್ಥಿ ವರುಣ್‌ನ ತಲೆಗೆ ಚಾಕುವಿನಿಂದ ಇರಿದಿದ್ದಾನೆ. ಈ ಕೃತ್ಯಕ್ಕೆ ಕಾರಣ ತಿಳಿಯಲು ಇನ್ನೂ ತನಿಖೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿರುವುದಾಗಿ ಎನ್‌ಡಬ್ಲ್ಯೂಐಯು ಟೈಮ್ಸ್ ವರದಿ ಮಾಡಿದೆ. ಘಟನೆ ಬಳಿಕ ದಾಳಿಕೋರನನ್ನು ಬಂಧಿಸಲಾಗಿದೆ. ಮಾರಕ ಆಯುಧದಿಂದ ಭೀಕರ ದಾಳಿ ನಡೆಸಿರುವುದು ಹಾಗೂ ಕೊಲೆ ಪ್ರಯತ್ನದ ಆರೋಪಗಳನ್ನು ಆತನ ವಿರುದ್ಧ ದಾಖಲಿಸಲಾಗಿದೆ.
“ವರುಣ್‌ನ ಮೇಲೆ ದಾಳಿಕೋರ ಚಾಕುವಿನಿಂದ ಹಲ್ಲೆ ನಡೆಸಿದ್ದಾನೆ. ವರುಣ್ ಬಹಳ ಗಂಭೀರವಾಗಿ ಗಾಯಗೊಂಡಿದ್ದಾನೆ. ಆತನನ್ನು ಫೋರ್ಟ್ ವೇಯ್ನೆ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆತ ಬದುಕಿ ಉಳಿಯುವ ಸಾಧ್ಯತೆ ಶೇ 0 ದಿಂದ ಶೇ 5ರಷ್ಟು ಮಾತ್ರ ಇದೆ ಎಂದು ವರದಿಯಾಗಿದೆ. ಭಯಾನಕ ದಾಳಿ ನಂತರ ವರುಣ್ ಬಹಳ ಗಂಭೀರ ಸ್ಥಿತಿಯಲ್ಲಿ ಇದ್ದಾನೆ” ಎಂದು ವರದಿ ತಿಳಿಸಿದೆ.
ಬೆಳಿಗ್ಗೆ ಜಿಮ್‌ನಲ್ಲಿ ಮಸಾಜ್‌ಗೆ ಮನವಿ ಮಾಡಿದ್ದ ತಾನು, ಮಸಾಜ್ ಕೊಠಡಿ ಒಳಗೆ ಹೋದಾಗ ಅಲ್ಲಿ ಮತ್ತೊಬ್ಬ ವ್ಯಕ್ತಿಯನ್ನು ಕಂಡಿದ್ದಾಗಿ ದಾಳಿಕೋರ ಆಂಡ್ರಾಡೆ ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದಾನೆ. ಅ ವ್ಯಕ್ತಿ ತನಗೆ ಪರಿಚಯ ಇರಲಿಲ್ಲ. ಆದರೆ ‘ವಿಲಕ್ಷಣ’ವಾಗಿ ಕಾಣಿಸಿದ. ಆ ವ್ಯಕ್ತಿಯಿಂದ ಅಪಾಯ ಎದುರಾಗಬಹುದು ಎಂದು ನಿರ್ಧರಿಸಿದ್ದು, ಆ ಪರಿಸ್ಥಿತಿಗೆ ತಕ್ಕಂತೆ ‘ಸರಿಯಾದ ರೀತಿಯಲ್ಲಿ’ ಪ್ರತಿಕ್ರಿಯೆ ನೀಡುವ ತೀರ್ಮಾನ ತೆಗೆದುಕೊಂಡಿದ್ದಾಗಿ ಆರೋಪ ದಾಖಲೆಯಲ್ಲಿ ಆಂಡ್ರಾಡೆ ನೀಡಿದ ಹೇಳಿಕೆಯನ್ನು ದಾಖಲಿಸಲಾಗಿದೆ.
