ಡಿಸೆಂಬರ್ 21 ರಂದು ಚೆನ್ನೈ ಸೂಪರ್ ಕಿಂಗ್ಸ್ ವೇಗಿ ತುಷಾರ್ ದೇಶಪಾಂಡೆ ತಮ್ಮ ಬಾಲ್ಯದ ಗೆಳತಿ ನಭಾ ಗಡಂವರ್ ಅವರನ್ನು ತಮ್ಮ ಬಾಳ ಸಂಗಾತಿಯಾಗಿ ಸ್ವೀಕರಿಸಿದ್ದಾರೆ.
ಥಾಣೆಯ ಕಲ್ಯಾಣ ಪ್ರಾಂತ್ಯದಲ್ಲಿ ತನ್ನ ಬಾಲ್ಯದ ಗೆಳತಿಯೊಂದಿಗೆ ಸಪ್ತಪದಿ ತುಳಿದಿರುವ ಸಿಎಸ್‌ಕೆ ವೇಗಿ ತುಷಾರ್ ದೇಶಪಾಂಡೆ ತಮ್ಮ ವಿವಾಹದ ಸುಂದರ ಕ್ಷಣದ ಪೋಟೋಗಳನ್ನು ತಮ್ಮ ಅಧಿಕೃತ ಇನ್‌ಸ್ಟಾಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
“ಎರಡು ಹೃದಯಗಳ ಸಂಗಮದೊಂದಿಗೆ ನವ ಜೀವನ ಆರಂಭಗೊಂಡಿದೆ. ಜೈ ಭಜರಂಗಬಲಿ,” ಎಂದು ತಾನು ಹಂಚಿಕೊಂಡಿರುವ ಫೋಟೋಗೆ ಈ ರೀತಿಯ ಶೀರ್ಷಿಕೆ ನೀಡಿರುವ ಅವರು, “ಈ ಸುಂದರ ಕ್ಷಣಗಳನ್ನು ಸೆರೆ ಹಿಡಿದ ಎಲ್ಲರಿಗೂ ಹೃತ್ಪೂರ್ವಕ ಕೃತಜ್ಞತೆಗಳು. ಇದು ನಮ್ಮ ಜೀವನದ ಬಲು ಸುಂದರವಾದ ಕ್ಷಣಗಳು,” ಎಂದು ಕೆಳಗಡೆ ಮತ್ತೊಂದು ಸಾಲು ಬರೆದಿದ್ದಾರೆ.
2023ರ ಐಪಿಎಲ್ ಫೈನಲ್ ಪಂದ್ಯ ಸೇರಿದಂತೆ ಕೆಲವು ಪಂದ್ಯಗಳ ವೇಳೆ ಕ್ರೀಡಾಂಗಣಕ್ಕೆ ತೆರಳಿ ಯುವ ವೇಗಿ ತುಷಾರ್ ದೇಶಪಾಂಡೆ ಅವರನ್ನು ಬಾಲ್ಯದ ಗೆಳತಿ ನಭಾ ಗಡಂವಾರ್ ಬೆಂಬಲಿಸಿದ್ದರು. ಜೂನ್ 12 ರಂದು ಇವರಿಬ್ಬರ ನಿಶ್ಚಿತಾರ್ಥ ನಡೆದಿತ್ತು. ಕೆಂಪು ಚೆಂಡಿನ ಒಳಗಿದ್ದ ಉಂಗುರಗಳನ್ನು ಪರಸ್ಪರ ತೊಡಿಸಿದ್ದು ಈ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದ್ದವು.
ಡಿಸೆಂಬರ್ 21 ರಂದು ಥಾಣೆಯ ಕಲ್ಯಾಣ ಪ್ರಾಂತ್ಯದಲ್ಲಿ ನಡೆದಿದ್ದ ತುಷಾರ್ ದೇಶಪಾಂಡೆ ಹಾಗೂ ನಭಾ ಗಡಂವರ್ ಅವರ ವಿವಾಹ ಸಮಾರಂಭದಲ್ಲಿ ಕ್ರಿಕೆಟಿಗರಾದ ಪ್ರಶಾಂತ್ ಸೋಲಂಕಿ, ಧವಳ್ ಕುಲಕರ್ಣಿ, ಭವನ್ ಟಕ್ಕರ್, ಶಿವಂ ದುಬೇ ಸೇರಿದಂತೆ ಕೆಲವು ಕ್ರಿಕೆಟಿಗರು ಭಾಗಿಯಾಗಿ ನೂತನ ವಧು- ವರರನ್ನು ಶುಭ ಹಾರೈಸಿದ್ದಾರೆ.
