ಕೊಲೆ ಪ್ರಕರಣದಲ್ಲಿ ಭಾಗಿಯಾದ ಇಬ್ಬರು ಆರೋಪಿಗಳಿಗೆ ಅಫ್ಘಾನಿಸ್ತಾನದ ತಾಲಿಬಾನ್ ಸರ್ಕಾರ ಬಹಿರಂಗವಾಗಿ ಮರಣ ದಂಡನೆ ಶಿಕ್ಷೆ ವಿಧಿಸಿದೆ. ಇಬ್ಬರಿಗೂ ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಬಹಿರಂಗವಾಗಿ ಗುಂಡು ಹಾರಿಸುವ ಮೂಲಕ ಹತ್ಯೆ ಮಾಡಲಾಗಿದೆ.
ಅಫ್ಘಾನಿಸ್ತಾನದ ಘಜ್ನಿ ನಗರದಲ್ಲಿ ಇರುವ ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಈ ಬಹಿರಂಗ ಮರಣ ದಂಡನೆ ಶಿಕ್ಷೆಯನ್ನು ವಿಧಿಸಲಾಯಿತು. ಈ ಮರಣ ದಂಡನೆ ವಾರೆಂಟ್ ಮೇಲೆ ತಾಲಿಬಾನ್‌ನ ಪರಮೋಚ್ಛ ನಾಯಕ ಹಿಬಾತುಲ್ಲಾ ಅಕುಂಝಾದಾ ಅವರು ಸಹಿ ಹಾಕಿದ್ದು, ಅಫ್ಘಾನಿಸ್ತಾನದ ಸುಪ್ರೀಂ ಕೋರ್ಟ್‌ ಅಧಿಕಾರಿ ಅತೀಖುಲ್ಲಾ ದರ್ವಿಶ್ ಎಂಬುವರು ಇಬ್ಬರೂ ಅಪರಾಧಿಗಳ ವಿರುದ್ಧ ಜಾರಿಯಾಗಿದ್ದ ಮರಣ ದಂಡನೆ ವಾರೆಂಟ್ ಅನ್ನು ಸ್ಫೀಕರ್ ಮೂಲಕ ತಿಳಿಸಿದರು.
ಮರಣ ದಂಡನೆ ಶಿಕ್ಷೆಗೆ ಗುರಿಯಾದ ಇಬ್ಬರೂ ಅಪರಾಧಿಗಳೂ ಕೊಲೆ ಮಾಡಿದ್ದರು. ಎರಡು ವರ್ಷಗಳ ಕಾಲ ನ್ಯಾಯಾಲಯಗಳಲ್ಲಿ ಈ ಕುರಿತ ವಿಚಾರಣೆ ನಡೆದಿತ್ತು. ನಂತರ ಮರಣ ದಂಡನೆ ಆದೇಶಕ್ಕೆ ಸಹಿ ಬಿದ್ದಿತ್ತು ಎಂದು ಅಫ್ಘಾನಿಸ್ತಾನ ಸುಪ್ರೀಂ ಕೋರ್ಟ್‌ ಅಧಿಕಾರಿ ಅತೀಖುಲ್ಲಾ ದರ್ವಿಶ್ ಅವರು ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಸೇರಿದ್ದ ಜನರಿಗೆ ಮಾಹಿತಿ ನೀಡಿದರು. ಬಳಿಕ ಮರಣ ದಂಡನೆ ಶಿಕ್ಷೆ ಜಾರಿಯಾಯ್ತು.
ಈ ಮರಣ ದಂಡನೆ ಶಿಕ್ಷೆಯನ್ನು ವೀಕ್ಷಿಸಲು ಸಾವಿರಾರು ಜನರು ಕ್ರೀಡಾಂಗಣದಲ್ಲಿ ಸೇರಿದ್ದರು. ಅಪರಾಧಿಗಳನ್ನು ಕ್ರೀಡಾಂಗಣದ ಮಧ್ಯ ಭಾಗದಲ್ಲಿ ನಿಲ್ಲಿಸಿ ಅವರ ಹಿಂದಿನಿಂದ ಯೋಧರು ಗುಂಡು ಹಾರಿಸಿದರು. ಇಬ್ಬರೂ ಅಪರಾಧಿಗಳ ಬೆನ್ನಿಗೆ ಹತ್ತಾರು ಗುಂಡುಗಳು ತಗುಲಿದವು. ಬಳಿಕ ಅಪರಾಧಿಗಳಿಬ್ಬರೂ ಸ್ಥಳದಲ್ಲೇ ಕುಸಿದು ಬಿದ್ದು ಸಾವನ್ನಪ್ಪಿದರು. ಬಳಿಕ ನಿಯಮಾವಳಿಗಳ ಅನ್ವಯ ವೈದ್ಯರು ಇಬ್ಬರೂ ಅಪರಾಧಿಗಳನ್ನು ಪರಿಶೀಲಿಸಿ ಮೃತಪಟ್ಟಿರೋದನ್ನು ಖಚಿತಪಡಿಸಿದರು.
ಈ ಮರಣ ದಂಡನೆ ಶಿಕ್ಷೆ ಜಾರಿ ಸನ್ನಿವೇಶದಲ್ಲಿ ಇಬ್ಬರೂ ಅಪರಾಧಿಗಳ ಕುಟುಂಬಸ್ಥರು ಫುಟ್ಬಾಲ್ ಸ್ಟೇಡಿಯಂಗೆ ಆಗಮಿಸಿದ್ದರು. ಮರಣ ದಂಡನೆ ಶಿಕ್ಷೆ ಜಾರಿ ಮಾಡುವ ಮುನ್ನ ಅಪರಾಧಿಗಳನ್ನು ಮಾತನಾಡಿಸಲು ಬಯಸುತ್ತೀರಾ ಎಂದು ಇಬ್ಬರೂ ಅಪರಾಧಿಗಳ ಕುಟುಂಬಸ್ಥರಿಗೆ ಅವಕಾಶ ನೀಡಲಾಯ್ತು. ಆದರೆ ಎರಡೂ ಕುಟುಂಬಗಳೂ ನಿರಾಕರಿಸಿದ ಹಿನ್ನೆಲೆಯಲ್ಲಿ ಅಪರಾಧಿಗಳ ಮೇಲೆ ಕುಟುಂಬಸ್ಥರ ಎದುರಿನಲ್ಲೇ ಗುಂಡು ಹಾರಿಸಿ ಶಿಕ್ಷೆ ನೀಡಲಾಯಿತು.
