ಬೆಂಗಳೂರು: “ಶುಭಮನ್ ಗಿಲ್‌ ಭಾರತೀಯ ಕ್ರಿಕೆಟ್‌ಗೆ ಸಿಕ್ಕಿರುವ ಉಡುಗೊರೆ,” ಎಂದು ಜಿಯೋ ಸಿನಿಮಾ ಕಾರ್ಯಕ್ರಮದಲ್ಲಿ ರಾಬಿನ್ ಉತ್ತಪ್ಪ ಹೇಳಿದ್ದಾರೆ. ಅಷ್ಟೇ ಅಲ್ಲದೆ ಯುವ ಆರಂಭಿಕ ಬ್ಯಾಟರ್‌ ಮುಂದಿನ ದಿನಗಳಲ್ಲಿ ದಿಗ್ಗಜ ಆಟಗಾರನಾಗಿ ಬೆಳೆಯುತ್ತಾನೆ ಎಂದು ಭವಿಷ್ಯ ನುಡಿದಿದ್ದಾರೆ. “ನನ್ನ ಪ್ರಕಾರ ಭಾರತೀಯ ಕ್ರಿಕೆಟ್‌ಗೆ ಶುಭಮನ್ ಗಿಲ್‌ ಬಹುದೊಡ್ಡ ಆಸ್ತಿ. ಒಬ್ಬ ಪ್ರಬುದ್ಧ ದಿಗ್ಗಜ ಆಟಗಾರನಾಗಿ ಬೆಳೆಯುತ್ತಿದ್ದಾರೆ.
ಆತ ಅಮೋಘವಾಗಿ ಬೆಳೆಯುತ್ತಿರುವ ರೀತಿಯನ್ನು ನಾವು ಕಂಡಿದ್ದೇವೆ. ಒಬ್ಬ ಉತ್ತಮ ನಾಯಕನಾಗಿ ಇಂದು ನಮ್ಮ ಮುಂದೆ ಕಾಣಿಸುತ್ತಿದ್ದಾನೆ. ಕೇವಲ ಐಪಿಎಲ್‌ ತಂಡವನ್ನು ಮಾತ್ರವಲ್ಲ ಮುಂದಿನ ದಿನಗಳಲ್ಲಿ ಭಾರತ ಕ್ರಿಕೆಟ್‌ ತಂಡವನ್ನು ಮುನ್ನಡೆಸುವ ಸಾಮರ್ಥ್ಯ ಅವರಲ್ಲಿದೆ,” ಎಂದು ರಾಬಿನ್ ಗುಣಗಾನ ಮಾಡಿದ್ದಾರೆ.ಶುಭಮನ್ ಗಿಲ್‌ ಅತ್ಯಂತ ಜವಾಬ್ದಾರಿಯುತವಾಗಿ ಬ್ಯಾಟ್‌ ಮಾಡಿದರು. ಜಿ.ಟಿ ಜಯ ದಕ್ಕಿಸಿಕೊಳ್ಳಬೇಕಾದರೆ ಗಿಲ್‌ ಇನಿಂಗ್ಸ್‌ ಪೂರ ಬ್ಯಾಟ್‌ ಮಾಡಬೇಕಿತ್ತು. ಇದನ್ನು ಅರಿತೇ ಅವರು ಎಚ್ಚರಿಕೆಯ ಆಟವಾಡಿ ಅವಕಾಶ ಸಿಕ್ಕಾಗ ಸ್ಟ್ರೈಕ್‌ರೇಟ್‌ ಹೆಚ್ಚಿಸಿಕೊಂಡರು. ಗುರಿ ಸಾಧನೆಗೆ ಎಚ್ಚರಿಕೆಯ ಮಾರ್ಗ ಅನುಸರಿಸಿದರು.
ಕೊನೆಗೆ ಅವರೊಟ್ಟಿಗೆ ಕೈಜೋಡಿಸುವ ಬ್ಯಾಟರ್‌ ಸಲುವಾಗಿ ಅವರು ಕಾಯುತ್ತಿದ್ದರು. ಉತ್ತಮ ಸಾಥ್‌ ಸಿಕ್ಕಿದ್ದರೆ ಸೆಟ್‌ ಆದ ಬಳಿಕ ಅವರು ಮತ್ತಷ್ಟು ಸ್ಪೋಟಕ ಆಟವಾಡುತ್ತಿದ್ದರು. ಒಂದು ಬದಿ ಕ್ರೀಸ್‌ ಕಾಯ್ದುಕೊಂಡು ರನ್‌ ಕಲೆಹಾಕುವುದು ಗಿಲ್‌ ಅವರ ಮೇಲಿರುವ ಪ್ರಮುಖ ಜವಾಬ್ದಾರಿ ಆಗಿದೆ,” ಎಂದು ಉತ್ತಪ್ಪ ವಿವರಿಸಿದ್ದಾರೆ.
“ಚೇಸಿಂಗ್ ವೇಳೆ ರನ್‌ ಗಳಿಕೆಯ ವೇಗ ಹೆಚ್ಚಿಸುವ ಪ್ರಯತ್ನದಲ್ಲಿ ಗಿಲ್‌ ವಿಕೆಟ್‌ ಕೈಚೆಲ್ಲಿದರು. ಅದು ಅನಗತ್ಯವಾಗಿತ್ತು. ಅವರ ಬದಲು ಸಾಯ್ ಸುದರ್ಶನ್ ವೇಗವಾಗಿ ರನ್‌ ಗಳಿಸುವ ಪ್ರಯತ್ನ ಮಾಡಬೇಕಿತ್ತು. ಮುಂದಿನ ದಿನಗಳಲ್ಲಿ ಸಾಯ್ ಸುದರ್ಶನ್ ತಮ್ಮ ಸ್ಟ್ರೈಕ್‌ರೇಟ್‌ ಸುಧಾರಿಸುತ್ತಾರೆಂದು ನಂಬಿದ್ದೇನೆ. ಸುದರ್ಶನ್ ಸ್ಟ್ರೈಕ್‌ರೇಟ್‌ ಸುಧರಾಯಿಸಿದ್ದರೆ, ಗಿಲ್‌-ಸಾಯ್ ಜೊತೆಯಾಟ ಅಮೋಘವಾಗಿರುತ್ತಿತ್ತು,” ಎಂದು ರಾಬಿನ್ ಅಭಿಪ್ರಾಯ ಪಟ್ಟಿದ್ದಾರೆ.
