ಒಪ್ಪಿತ ಸಂಬಂಧವು ಮಹಿಳೆಯ ಮೇಲೆ ಹಲ್ಲೆ ನಡೆಸಲು ಲೈಸನ್ಸ್‌ ಅಲ್ಲಎಂದು ಹೇಳಿರುವ ಹೈಕೋರ್ಟ್‌, ಹಲವು ವರ್ಷಗಳ ಸಂಬಂಧವಿಟ್ಟುಕೊಂಡಿದ್ದ ವ್ಯಕ್ತಿಯ ಮೇಲೆ ಮಹಿಳೆ ಹೂಡಿದ್ದ ಪ್ರಕರಣವನ್ನು ರದ್ದುಗೊಳಿಸಲು ನಿರಾಕರಿಸಿದೆ. ಆದರೆ, ಆರೋಪಿ ವಿರುದ್ಧ ಮದುವೆಯಾಗುವುದಾಗಿ ನಂಬಿಸಿ ಅತ್ಯಾಚಾರವೆಸಗಿದ್ದಾನೆ ಮತ್ತು ವಂಚಿಸಿದ್ದಾನೆ ಎಂಬ ಆರೋಪಗಳನ್ನು ನ್ಯಾಯಾಲಯ ರದ್ದುಗೊಳಿಸಿದೆ.
ಪ್ರಕರಣ ರದ್ದು ಕೋರಿ ವ್ಯಕ್ತಿಯೊಬ್ಬ ಸಲ್ಲಿಸಿದ್ದ ಅರ್ಜಿ ವಜಾಗೊಳಿಸಿರುವ ನ್ಯಾ. ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯಪೀಠ, “ಆರೋಪಿ ವ್ಯಕ್ತಿ ಮತ್ತು ದೂರುದಾರ ಮಹಿಳೆ ನಡುವೆ ಎಷ್ಟು ವರ್ಷದ ಒಪ್ಪಿತ ಸಂಬಂಧವಿರಬಹುದು. ಆದರೆ, ಅದೇ ಆತನಿಗೆ ಆಕೆಯ ಮೇಲೆ ಹಲ್ಲೆ ನಡೆಸಲು ಲೈಸನ್‌ ಆಗುವುದಿಲ್ಲ,” ಎಂದು ಹೇಳಿದೆ.
“ಅರ್ಜಿದಾರ ಆರೋಪಿ ಮತ್ತು ಮಹಿಳೆ ನಡುವೆ ಐದು ವರ್ಷಕ್ಕೂ ಮಿಗಿಲಾದ ಒಪ್ಪಿತ ಸಂಬಂಧವಿದೆ. ಮದುವೆಯಾಗು ವುದಾಗಿ ನಂಬಿಸಿ ತನ್ನ ಜತೆ ಲೈಂಗಿಕ ಸಂಪರ್ಕ ಹೊಂದಿದ್ದರು ಎಂದು ದೂರುದಾರರ ಮಹಿಳೆ ಹೇಳಿದ್ದಾರೆ. ಅದರಂತೆ, ಐಪಿಸಿ ಸೆಕ್ಷನ್‌ 376, 417, 504 ಮತ್ತು 506ರಡಿ ಆರೋಪ ಎಸಗಿದ್ದಾರೆಂದು ತಿಳಿಸಿದ್ದಾರೆ. ಆದರೆ, ಆರೋಪಿ ಆ ಮಹಿಳೆಯ ಮೇಲೆ ಹಲ್ಲೆ ನಡೆಸಿದ್ದಾರೆ. ಇದರಿಂದಾಗಿ ಆಕೆ ಗಾಯಗೊಂಡಿರುವುದು ಪ್ರಮಾಣಪತ್ರದಲ್ಲಿ ದಾಖಲಾಗಿದೆ,” ಎಂದು ನ್ಯಾಯಾಲಯ ಹೇಳಿದೆ
