ಬೆಂಗಳೂರು : ಹದಿನಾರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿ ಆರಂಭಕ್ಕೆ ಇನ್ನು ಕೆಲವೇ ದಿನಗಳು ಮಾತ್ರವೇ ಬಾಕಿಯಿದೆ. ಐಪಿಎಲ್‌ 2023 ಟೂರ್ನಿಯು ಅತ್ಯಂತ ವಿಶೇಷವಾದುದ್ದು, ಏಕೆಂದರೆ ಬರೋಬ್ಬರಿ 3 ವರ್ಷಗಳ ಬಳಿಕ ಟೂರ್ನಿಯು ಮತ್ತೆ ಹೋಮ್‌ ಅಂಡ್‌ ಅವೇ ಮಾದರಿಯಲ್ಲಿ ಆಯೋಜನೆ ಆಗುತ್ತಿದೆ. ಜೊತೆಗೆ ಟೂರ್ನಿಯ ರೋಚಕತೆ ಹೆಚ್ಚಿಸುವ ನಿಟ್ಟಿನಲ್ಲಿ ಇಂಪ್ಯಾಕ್ಟ್‌-ಪ್ಲೇಯರ್‌ ನಿಯಮವನ್ನು ಕೂಡ ಪರಿಚಯ ಮಾಡಲಾಗುತ್ತಿದೆ.
ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಆಟಗಾರರಿಗೆ ಕನಸಿನ ವೇದಿಕೆ ಆಗಿದೆ. ಕೇವಲ ಭಾರತೀಯರು ಮಾತ್ರವಲ್ಲ ವಿದೇಶಿ ಆಟಗಾರರು ಕೂಡ ಜನಪ್ರಿಯ ಲೀಗ್‌ನಲ್ಲಿ ಪಾಲ್ಗೊಳ್ಳಲು ತುದಿಗಾಲಲ್ಲಿ ನಿಂತಿರುತ್ತಾರೆ. ಹಲವು ಆಟಗಾರರ ವೃತ್ತಿಬದುಕನ್ನೇ ಬದಲಾಯಿಸಿದ ಹೆಗ್ಗಳಿಕೆ ಐಪಿಎಲ್‌ಗೆ ಸಲ್ಲುತ್ತದೆ. ಇಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸದ್ದು ಮಾಡುತ್ತಿರುವ ದೇಶ-ವಿದೇಶಿ ಆಟಗಾರರಿಗೆ ಆರಂಭಿಕ ವೇದಿಕೆ ನೀಡಿದ್ದು ಇದೇ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಎಂಬುದು ವಿಶೇಷ.
ಅಂತಾರಾಷ್ಟ್ರೀಯ ಮಟ್ಟಕ್ಕಿಂತಲೂ ಮೊದಲು ಐಪಿಎಲ್‌ನಲ್ಲಿ ಸದ್ದು ಮಾಡಿದ ಆಟಗಾರರ ಸಾಲಿನಲ್ಲಿ ಡೇವಿಡ್‌ ವಾರ್ನರ್‌, ಎಬಿ ಡಿ’ವಿಲಿಯರ್ಸ್‌, ಜಸ್‌ಪ್ರೀತ್‌ ಬುಮ್ರಾ, ಹಾರ್ದಿಕ್‌ ಪಾಂಡ್ಯ, ರಶೀದ್‌ ಖಾನ್‌, ಕೈರೊನ್‌ ಪೊಲಾರ್ಡ್‌ ಹಾಗೂ ಸುನೀಲ್ ನರೈನ್‌ ಅವರಂತಹ ಸ್ಟಾರ್‌ಗಳು ಕಾಣಿಸಿಕೊಳ್ಳುತ್ತಾರೆ. ಅಂದಹಾಗೆ ಟಿ20 ಕ್ರಿಕೆಟ್‌ಗೆ ಅಮೋಘ ಆಲ್‌ರೌಂಡರ್‌ಗಳನ್ನು ಕೊಟ್ಟ ಹೆಗ್ಗಳಿಕೆ ಐಪಿಎಲ್‌ನದ್ದು. ಈ ಬಗ್ಗೆ ಮಾತನಾಡಿರುವ ಟಿ20 ಕ್ರಿಕೆಟ್‌ನ ದಿಗ್ಗಜ ಆಟಗಾರ ವೆಸ್ಟ್‌ ಇಂಡೀಸ್‌ನ ದೈತ್ಯ ಬ್ಯಾಟರ್‌ ಕ್ರಿಸ್‌ ಗೇಲ್, ಕಳೆದ 15 ಆವೃತ್ತಿಗಳ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ತಾವು ಕಂಡ ಸಾರ್ವಕಾಲಿಕ ಶ್ರೇಷ್ಠ ಆಲ್‌ರೌಂಡರ್‌ ಯಾರೆಂದು ಹೆಸರಿಸಿದ್ದಾರೆ.
ಅಚ್ಚರಿಯ ಆಯ್ಕೆ ಹೊರಹಾಕಿದ ಗೇಲ್
ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಇತಿಹಾಸದಲ್ಲಿ ವೆಸ್ಟ್‌ ಇಂಡೀಸ್‌ ಆಲ್‌ರೌಂಡರ್‌ಗಳು ಭಾರಿ ಸದ್ದು ಮಾಡಿದ್ದಾರೆ. ಕೈರೊನ್‌ ಪೊಲಾರ್ಡ್‌ ಮತ್ತು ಸುನಿಲ್‌ ನರೈನ್‌ ಮುಂಬೈ ಇಂಡಿಯನ್ಸ್ ಮತ್ತು ಕೋಲ್ಕತಾ ನೈಟ್‌ ರೈಡರ್ಸ್‌ ತಂಡಗಳ ಪರ ಆಡಿ ಧೂಳೆಬ್ಬಿಸಿದ್ದಾರೆ. ಮುಂಬೈ ತಂಡದ ದಾಖಲೆಯ 5 ಟ್ರೋಫಿ ಗೆಲುವಿನಲ್ಲಿ ಪೊಲಾರ್ಡ್‌ ಪಾತ್ರ ಬಹುದೊಡ್ಡದು. ಅದೆಷ್ಟೋ ಪಂದ್ಯಗಳಲ್ಲಿ ಮುಂಬೈಗೆ ಏಕಾಂಗಿಯಾಗಿ ಜಯ ತಂದಿದ್ದಾರೆ.
2012 ಮತ್ತು 2014ರಲ್ಲಿ ಟ್ರೋಫಿ ಗೆದ್ದ ಕೆಕೆಆರ್‌ ತಂಡದ ಪರ ಸುನೀಲ್ ನರೈನ್‌ ಮ್ಯಾಚ್ ವಿನ್ನರ್‌ ಆಗಿದ್ದರು. ಶೇನ್‌ ವಾಟ್ಸನ್‌ (2008ರಲ್ಲಿ ರಾಜಸ್ಥಾನ್‌ ರಾಯಲ್ಸ್‌) ಮತ್ತು ಹಾರ್ದಿಕ್‌ ಪಾಂಡ್ಯ (2022ರಲ್ಲಿ ಗುಜರಾತ್‌ ಟೈಟನ್ಸ್‌) ಕೂಡ ಐಪಿಎಲ್‌ ಗೆದ್ದ ಸ್ಟಾರ್‌ ಆಲ್‌ರೌಂಡರ್‌ಗಳು, ಆದರೆ, ಇವರೆಲ್ಲರಿಗಿಂತಲೂ ಸಿಎಸ್‌ಕೆ ಪರ 10 ವರ್ಷಗಳ ಕಾಲ ಆಡಿದ ಡ್ವೇನ್‌ ಬ್ರಾವೋ ಸಾರ್ವಕಾಲಿಕ ಶ್ರೇಷ್ಠ ಆಲ್‌ರೌಂಡರ್‌ ಎಂದು ಕ್ರಿಸ್‌ ಗೇಲ್ ಕರೆದಿದ್ದಾರೆ.
ಬ್ರಾವೋ ಗ್ರೇಟೆಸ್ಟ್‌ ಆಲ್‌ರೌಂಡರ್‌
ವೆಸ್ಟ್‌ ಇಂಡೀಸ್‌ನ ದೈತ್ಯ ಬ್ಯಾಟ್ಸ್‌ಮನ್‌ ಕ್ರಿಸ್‌ ಗೇಲ್, ಐಪಿಎಲ್‌ನಲ್ಲಿ ಕೆಕೆಆರ್‌, ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ಹಾಗೂ ಪಂಜಾಬ್ ಕಿಂಗ್ಸ್‌ ತಂಡಗಳ ಪರ ಬ್ಯಾಟ್‌ ಬೀಸಿದ್ದಾರೆ. ಎದುರಾಳಿ ಬೌಲರ್‌ಗಳಿಗೆ ಸಿಂಹ ಸ್ವಪ್ನವಾಗಿದ್ದ ಗೇಲ್, ಐಪಿಎಲ್‌ನ ದಿಗ್ಗಜ ಎಂಬುದರಲ್ಲಿ ಯಾವುದೇ ಸಂದೇಹವಿಲ್ಲ. ಆದರೆ, ತಮಗಿಂತಲೂ ಐಪಿಎಲ್‌ನಲ್ಲಿ ಅತ್ಯಂತ ಪ್ರಭಾವಿ ಆಟವಾಡಿದ ಶ್ರೇಯಸ್ಸನ್ನು ವಿಂಡೀಸ್‌ನ ಮಾಜಿ ನಾಯಕ ಡ್ವೇನ್‌ ಬ್ರಾವೋಗೆ ನೀಡಿದ್ದಾರೆ.
“ಡ್ವೇನ್‌ ಬ್ರಾವೋ ಐಪಿಎಲ್‌ ಇತಿಹಾಸದಲ್ಲೇ ಅತಿ ಹೆಚ್ಚು ವಿಕೆಟ್‌ಗಳನ್ನು ಪಡೆದ ಬೌಲರ್‌. ಜೊತೆಗೆ ಬ್ಯಾಟಿಂಗ್‌ನಲ್ಲೂ ಚೆನ್ನೈ ಮತ್ತು ಮುಂಬೈ ತಂಡಗಳ ಪರ ಅತ್ಯಂತ ಮೌಲ್ಯಯುತ ರನ್‌ಗಳನ್ನು ಬಾರಿಸಿದ್ದಾರೆ. ಬಹುಬಾರಿ ಐಪಿಎಲ್‌ ಚಾಂಪಿಯನ್ ಪಟ್ಟವನ್ನೂ ಅಲಂಕರಿಸಿದ್ದಾರೆ. ಬ್ರಾವೋ ಐಪಿಎಲ್‌ನ ಸಾರ್ವಕಾಲಿಕ ಶ್ರೇಷ್ಠ ಆಲ್‌ರೌಂಡರ್‌ ಎಂಬುದರಲ್ಲಿ ಸಂಶಯವೇ ಬೇಡ,” ಎಂದು ಜಿಯೋ ಸಿನಿಮಾ ಕಾರ್ಯಕ್ರಮದಲ್ಲಿ ಗೇಲ್ ಹೇಳಿದ್ದಾರೆ.
ಡ್ವೇನ್‌ ಚಾಂಪಿಯನ್ ಆಟಗಾರ
39 ವರ್ಷದ ಅನುಭವಿ ಆಲ್‌ರೌಂಡರ್‌ ಡ್ವೇನ್‌ ಬ್ರಾವೋ, ಐಪಿಎಲ್‌ 2022 ಟೂರ್ನಿ ಬಳಿಕ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದಿಂದ ಬಿಡುಗಡೆಯಾದರು. ಬಳಿಕ ಐಪಿಎಲ್‌ 2023 ಟೂರ್ನಿ ಸಲುವಾಗಿ ಅವರನ್ನು ಯಾರೊಬ್ಬರೂ ಖರೀದಿ ಮಾಡಲಿಲ್ಲ. ಐಪಿಎಲ್‌ನಲ್ಲಿ 14 ಆವೃತ್ತಿಗಳಲ್ಲಿ ಕಾಣಿಸಿಕೊಂಡಿರುವ ಬ್ರಾವೋ ಆಡಿದ 161 ಪಂದ್ಯಗಳಲ್ಲಿ 183 ವಿಕೆಟ್‌ಗಳನ್ನು ಪಡೆದಿದ್ದಾರೆ.
ತಮ್ಮ ವೇಗದ ಬೌಲಿಂಗ್‌ನಲ್ಲಿ ಗತಿ ಬದಲಾವಣೆ, ಶಾರ್ಟ್‌ ಪಿಚ್‌ ತಂತ್ರ ಹಾಗೂ ಮಂದಗತಿಯ ಎಸೆತ ಹೀಗೆ ಹಲವು ತಂತ್ರಗಳನ್ನು ಬಳಕೆ ಮಾಡಿ ಐಪಿಎಲ್‌ ಇತಿಹಾಸದ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಎನಿಸಿಕೊಂಡ ಬ್ರಾವೋ, ಬ್ಯಾಟಿಂಗ್‌ನಲ್ಲಿ ಒಟ್ಟಾರೆ 1560 ರನ್‌ಗಳನ್ನು ಬಾರಿಸಿದ್ದಾರೆ, ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದಲ್ಲಿ 2011, 2018 ಮತ್ತು 2021ರಲ್ಲಿ ಟ್ರೋಫಿ ಎತ್ತಿ ಹಿಡಿದಿರುವ ಬ್ರಾವೋ ಅಪ್ಪಟ ಚಾಂಪಿಯನ್ ಆಟಗಾರ.
ಸರ್ಫರಾಝ್‌ ಖಾನ್‌ ಕಡೆಗಣನೆ
ಸಾರ್ವಕಾಲಿಕ ಶ್ರೇಷ್ಠ ಆಲ್‌ರೌಂಡರ್‌ ಆಗಿ ಡ್ವೇನ್‌ ಬ್ರಾವೋ ಅವರನ್ನು ಆಯ್ಕೆ ಮಾಡಿರುವ ಕ್ರಿಸ್‌ ಗೇಲ್, ಇದೇ ವೇಳೆ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡದ ಯುವ ಬ್ಯಾಟರ್‌ ಸರ್ಫರಾಝ್‌ ಖಾನ್‌ ಅವರನ್ನು ಕಡೆಗಣಿಸಲಾಗಿದೆ ಎಂದು ಹೇಳಿದ್ದಾರೆ. ಐಪಿಎಲ್‌ನಲ್ಲಿ ವಿವಿಧ ಫ್ರಾಂಚೈಸಿಗಳಲ್ಲಿ ಕಾಣಿಸಿಕೊಂಡಿರುವ 23 ವರ್ಷದ ಯುವ ಬ್ಯಾಟರ್‌ ಸರ್ಫರಾಝ್‌ ಖಾನ್‌, ದೇಶಿ ಕ್ರಿಕೆಟ್‌ ರಣಜಿ ಟ್ರೋಫಿ ಟೂರ್ನಿಯಲ್ಲಿ ಕಳೆದ ನಾಲ್ಕು ವರ್ಷಗಳಲ್ಲಿ ಗರಿಷ್ಠ ರನ್‌ ಸ್ಕೋರ್‌ಗಳಲ್ಲಿ ಒಬ್ಬರಾಗಿದ್ದಾರೆ.
ಆದರೆ, ಅವರಿಗೆ ಭಾರತ ತಂಡದಲ್ಲಿ ಸ್ಥಾನ ಲಭ್ಯವಾಗಿಲ್ಲ. ಫ್ರಾಂಚೈಸಿ ತಂಡಗಳಲ್ಲೂ ಅವರಿಗೆ ಸ್ಥಿರ ಅವಕಾಶ ಲಭ್ಯವಾಗಲಿಲ್ಲ. ಐಪಿಎಲ್‌ 2023 ಟೂರ್ನಿಯು ಮಾರ್ಚ್‌ 31ರಂದು ಶುರುವಾಗಲಿದೆ. ಉದ್ಘಾಟನಾ ಪಂದ್ಯದಲ್ಲಿ ಗುಜರಾತ್‌ ಟೈಟನ್ಸ್‌ ಮತ್ತು ಸಿಎಸ್‌ಕೆ ತಂಡಗಳು ಪೈಪೋಟಿ ನಡೆಸಲಿವೆ. ಡೆಲ್ಲಿ ತಂಡ ಲಖನೌ ಸೂಪರ್‌ ಜಯಂಟ್ಸ್‌ ಎದುರು ಏ.1ರಂದು ತನ್ನ ಅಭಿಯಾನ ಆರಂಭಿಸಲಿದ್ದು, ರಿಷಭ್ ಪಂತ್ ಅನುಪಸ್ಥಿತಿಯಲ್ಲಿ ಡೆಲ್ಲಿ ಪರ ಬ್ಯಾಟಿಂಗ್‌ ಪರಾಕ್ರಮ ಮೆರೆಯುವ ಅತ್ಯುತ್ತಮ ಅವಕಾಶ ಸರ್ಫರಾಝ್‌ ಖಾನ್‌ಗೆ ಸಿಕ್ಕಿದೆ.
