ಶುಭ ಸಂದರ್ಭದಲ್ಲಿ ತೊಗರಿ ಬೇಳೆ ಒಬ್ಬಟ್ಟು ಮಾಡಿದ ಸಂದರ್ಭದಲ್ಲಿ ನಮಗೆ ತೆಂಗಿನಕಾಯಿಯ ಹಾಲಿನ ಜ್ಞಾಪಕ ಬರುತ್ತದೆ. ಏಕೆಂದರೆ ಇವೆರಡೂ ಒಂದು ಉತ್ತಮ ಕಾಂಬಿನೇಷನ್. ಅದನ್ನು ಬಿಟ್ಟರೆ ಹೆಣ್ಣು ಮಕ್ಕಳ ಸೌಂದರ್ಯ ವೃದ್ಧಿಯಲ್ಲಿ ತೆಂಗಿನ ಹಾಲು ಸರಾಗವಾಗಿ ಬಳಕೆ ಆಗುತ್ತದೆ.
ಆದರೆ ನೈಸರ್ಗಿಕವಾದ ಪೌಷ್ಟಿಕಾಂಶಗಳನ್ನು ಒಳಗೊಂಡ ತೆಂಗಿನ ಹಾಲಿನಲ್ಲಿ ಇನ್ನೂ ಬಹಳಷ್ಟು ಉಪಯೋಗಗಳಿವೆ. ಪ್ರತಿ ದಿನವೂ ನಮ್ಮ ಅಡುಗೆ ಅಥವಾ ಆಹಾರ ಪದಾರ್ಥಗಳ ತಯಾರಿಕೆಯಲ್ಲಿ ಹಸಿ ತೆಂಗಿನಕಾಯಿ ಅಥವಾ ಕೊಬ್ಬರಿಯನ್ನು ಬಳಸುತ್ತೇವೆ.
- ಹಸಿ ತೆಂಗಿನ ಕಾಯಿಯಿಂದ ಸಿಗುವ ತೆಂಗಿನ ಹಾಲು ಸ್ವತಃ ಕೊಬ್ಬಿನ ಅಂಶವನ್ನು ಹೊಂದಿರುತ್ತದೆ. ಆದರೆ ಇದು ನಮ್ಮ ದೇಹಕ್ಕೆ ಅಗತ್ಯವಾಗಿ ಬೇಕಾದ ಒಳ್ಳೆಯ ಕೊಬ್ಬಿನಂಶ ಆಗಿರುತ್ತದೆ.
- ಇದರಲ್ಲಿ ಮೀಡಿಯಂ ಚೈನ್ ಟ್ರೈಗ್ಲಿಸರೈಡ್ ಫ್ಯಾಟಿ ಆಮ್ಲಗಳು ಸಾಕಷ್ಟು ಕಂಡು ಬರುವುದರಿಂದ ಮತ್ತು ವಿವಿಧ ಬಗೆಯ ಪೌಷ್ಟಿಕ ಸತ್ವಗಳು ತೆಂಗಿನ ಹಾಲಿನಲ್ಲಿ ಲಭ್ಯ ಇರುವುದರಿಂದ ನಮ್ಮ ಮಾಂಸ – ಖಂಡಗಳ ಬೆಳವಣಿಗೆಯಲ್ಲಿ ಸಹಾಯ ಮಾಡುವುದು ಮಾತ್ರವಲ್ಲದೆ ನಮ್ಮ ದಿನ ನಿತ್ಯದ ವ್ಯಾಯಾಮ ಸಂದರ್ಭದಲ್ಲಿ ನಮ್ಮ ದೇಹದಿಂದ ಹಾನಿಯಾಗುವ ಶಕ್ತಿಯ ಪ್ರಮಾಣವನ್ನು ಮತ್ತೊಮ್ಮೆ ಸಮತೋಲನವಾಗಿಸುವ ಲಕ್ಷಣ ತೆಂಗಿನ ಹಾಲಿನಲ್ಲಿ ಕಂಡು ಬರುತ್ತದೆ.
- ಒಳ್ಳೆಯ ಕೊಬ್ಬಿನ ಅಂಶಗಳು ನಮ್ಮ ದೇಹಕ್ಕೆ ಸೇರುವುದರಿಂದ ಹೆಚ್ಚು ಹೊತ್ತಿನ ತನಕ ಬೇರೆ ಆಹಾರ ಸೇವನೆ ಮಾಡಬೇಕು ಎನ್ನುವ ಬಯಕೆ ಉಂಟಾಗುವುದಿಲ್ಲ. ಇದರಿಂದ ನಮ್ಮ ದೇಹದ ತೂಕ ಕಡಿಮೆ ಆಗುವುದರ ಜೊತೆಗೆ ದೈಹಿಕ ಸದೃಡತೆ ಕೂಡ ನಮಗೆ ಸಿಗುತ್ತದೆ.
- ಕೆಲವರಿಗೆ ಸೇವಿಸಿದ ಆಹಾರ ಸರಿಯಾಗಿ ಜೀರ್ಣ ಆಗುವುದಿಲ್ಲ. ಹಾಗಾಗಿ ಆಹಾರದಲ್ಲಿನ ಪೌಷ್ಟಿಕ ಸತ್ವಗಳು ಮತ್ತು ಎಲೆಕ್ಟ್ರೋಲೈಟ್ ಅಂಶಗಳು ದೇಹದ ಸರಿಯಾದ ಕಾರ್ಯ ನಿರ್ವಹಣೆಗೆ ಸಹಾಯಕ್ಕೆ ಬರುವುದಿಲ್ಲ. ಈ ಕಾರಣದಿಂದ ಮಲ ವಿಸರ್ಜನೆ ಸರಿಯಾದ ಸಮಯಕ್ಕೆ ಸರಿಯಾದ ರೀತಿ ಆಗುವುದಿಲ್ಲ.
- ವಿಪರೀತ ಅಜೀರ್ಣತೆ ಕಾಡುತ್ತಿರುವ ಕಾರಣದಿಂದ ಕರುಳಿನ ಭಾಗದಲ್ಲಿ ರೋಗ – ರುಜಿನಗಳು ಕಂಡು ಬರುವ ಸಾಧ್ಯತೆ ಇರುತ್ತದೆ. ಅಂತಹವರಿಗೆ ತೆಂಗಿನ ಹಸಿಯಾದ ಹಾಲು ಒಳ್ಳೆಯ ಸ್ನೇಹಿತ ಎಂದು ಹೇಳಬಹುದು
- ಜೀರ್ಣ ನಾಳದಲ್ಲಿ ಹೆಚ್ಚು ಪೌಷ್ಟಿಕಾಂಶಗಳನ್ನು ಮತ್ತು ಎಲೆಕ್ಟ್ರೋಲೈಟ್ ಅಂಶಗಳನ್ನು ಒದಗಿಸುವುದರಿಂದ ಹಿಡಿದು ಅಜೀರ್ಣತೆ ಮತ್ತು ಮಲಬದ್ಧತೆಯನ್ನು ದೂರಗೊಳಿಸಿ ಆರೋಗ್ಯಕರವಾದ ಬ್ಯಾಕ್ಟೀರಿಯಾಗಳ ಬೆಳವಣಿಗೆಯನ್ನು ಕರುಳಿನ ಭಾಗದಲ್ಲಿ ಉಂಟು ಮಾಡುತ್ತದೆ.
- ಇತ್ತೀಚಿಗೆ ಸಕ್ಕರೆ ಕಾಯಿಲೆ ಹೊಂದಿರುವ ಜನರು ಎಲ್ಲಾ ಕಡೆ ಕಂಡು ಬರುತ್ತಾರೆ. ತಮ್ಮ ಆಹಾರ ಶೈಲಿಯಿಂದ ಅಥವಾ ಅನುವಂಶೀಯವಾಗಿ ಮಧುಮೇಹವನ್ನು ದತ್ತು ಪಡೆದು ಜೀವನ ನಡೆಸುತ್ತಿರುತ್ತಾರೆ.
- ದೇಹದಲ್ಲಿ ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಹೆಚ್ಚಾದರೂ ತೊಂದರೆಯೇ ಮತ್ತು ಕಡಿಮೆಯಾದರೂ ತೊಂದರೆಯೇ. ಹಾಗಾಗಿ ಸರಿಯಾದ ಇನ್ಸುಲಿನ್ ಉತ್ಪತ್ತಿ ನಿರ್ವಹಣೆ ಮಾಡಿಕೊಳ್ಳುವುದರಿಂದ ಮಧುಮೇಹವನ್ನು ನಿಯಂತ್ರಣ ಮಾಡಿಕೊಳ್ಳಬಹುದು.
- ಮಧುಮೇಹ ಹೊಂದಿದ ವ್ಯಕ್ತಿಗಳಿಗೆ ತೆಂಗಿನ ಹಾಲು ಸೇವನೆ ಮಾಡುವುದರಿಂದ ರಕ್ತದಲ್ಲಿನ ಸಕ್ಕರೆ ಪ್ರಮಾಣದ ಹರಿಯುವಿಕೆಯನ್ನು ಕಡಿಮೆ ಮಾಡುವುದರ ಜೊತೆಗೆ ಮಧುಮೇಹ ಸಮಸ್ಯೆ ಏರುಪೇರಾಗದಂತೆ ನೋಡಿಕೊಳ್ಳುತ್ತದೆ.
