ಹೊಸದಿಲ್ಲಿ : ಬ್ಯಾಟಿಂಗ್‌ ದಂತಕತೆ ಹಾಗೂ ಗಾಡ್‌ ಆಫ್‌ ಕ್ರಿಕೆಟ್‌ ಖ್ಯಾತಿಯ ದಿಗ್ಗಜ ಸಚಿನ್ ತೆಂಡೂಲ್ಕರ್‌, ಏಕದಿನ ಕ್ರಿಕೆಟ್‌ನಲ್ಲಿ ಮಹತ್ವದ ಬದಲಾವಣೆಗೆ ಕರೆ ನೀಡಿದ್ದಾರೆ. ಮಾರ್ಚ್‌ 17ರಂದು ನಡೆದ ಇಂಡಿಯಾ ಟು-ಡೇ ಕಾರ್ಯಕ್ರಮದಲ್ಲಿ ಮಾತನಾಡಿದ ಮಾಸ್ಟರ್‌ ಬ್ಲಾಸ್ಟರ್‌ ಒಡಿಐ ಕ್ರಿಕೆಟ್‌ ಈಗ ಬೇಸರ ತರುತ್ತಿದೆ, ಆಟದ ಆಗು ಹೋಗುಗಳನ್ನು ಅಂದಾಜಿಸುವುದು ಬಹಳಾ ಸುಲಭವಾಗಿಬಿಟ್ಟಿದೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.
ಏಕದಿನ ಕ್ರಿಕೆಟ್‌ನಲ್ಲಿ 2 ಹೊಸ ಚೆಂಡುಗಳನ್ನು ಬಳಕೆ ಮಾಡಲಾಗುತ್ತಿದೆ. ಜೊತೆಗೆ ಫೀಲ್ಡಿಂಗ್‌ ನಿಯಮಗಳೆಲ್ಲವೂ ಬ್ಯಾಟರ್ಸ್‌ಗೆ ನೆರವಾಗುತ್ತಿವೆ. ಇದರಿಂದ ಬೌಲರ್‌ಗಳಿಗೆ ಅನ್ಯಾಯವಾಗುತ್ತಿದ್ದು, ಬ್ಯಾಟ್‌ ಮತ್ತು ಬಾಲ್‌ ನಡುವಣ ಸಮಬಲದ ಹೋರಾಟ ಮರೆಯಾಗುತ್ತಿದೆ ಎಂದು ಕಚಿನ್‌ ಕಳವಳ ವ್ಯಕ್ತಪಡಿಸಿದ್ದಾರೆ.
ಇದೇ ವರ್ಷ ಭಾರತದ ಆತಿಥ್ಯದಲ್ಲಿ ಐಸಿಸಿ ಏಕದಿನ ಕ್ರಿಕೆಟ್‌ ವಿಶ್ವಕಪ್‌ ಟೂರ್ನಿಯು ಅಕ್ಟೋಬರ್‌-ನವೆಂಬರ್‌ ಅವಧಿಯಲ್ಲಿ ಆಯೋಜನೆ ಆಗಲಿದೆ. ಅಷ್ಟೇ ಅಲ್ಲದೆ ಮುಂದಿನ 9 ವರ್ಷಗಳ ಅವಧಿಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ ಮೂರು ಒಡಿಐ ವಿಶ್ವಕಪ್‌ ಆಯೋಜಿಸಲು ಯೋಜನೆ ಹಾಕಿಕೊಂಡಿರುವ ಸಂದರ್ಭದಲ್ಲಿ ಮಾಸ್ಟರ್‌ ಬ್ಲಾಸ್ಟರ್‌ ಈ ರೀತಿಯ ಹೇಳಿಕೆ ನೀಡಿದ್ದಾರೆ.
“ಬದಲಾವಣೆಯೇ ಇಲ್ಲದೆ ಏಕದಿನ ಕ್ರಿಕೆಟ್‌ ಬಹಳಾ ಬೋರಿಂಗ್‌ ಆಗುತ್ತಿದೆ ಎಂಬುದರಲ್ಲಿ ಅನುಮಾನವೇ ಬೇಡ. ಈಗಿನ ಒಡಿಐ ಕ್ರಿಕೆಟ್‌ ಬಗ್ಗೆ ಮಾತನಾಡೋಣ. ಇಂದು ಆಟದ ರೋಚಕತೆ ಹೆಚ್ಚಿಸುವ ಸಲುವಾಗಿ ಇನಿಂಗ್ಸ್‌ ಒಂದರಲ್ಲಿ 2 ಹೊಸ ಚೆಂಡುಗಳನ್ನು ಬಳಕೆ ಮಾಡಲಾಗುತ್ತಿದೆ. ಇದರಿಂದ ಆಟದಲ್ಲಿ ರಿವರ್ಸ್‌ ಸ್ವಿಂಗ್ ಇಲ್ಲವಾಗಿದೆ. ಇನಿಂಗ್ಸ್‌ನಲ್ಲಿ 40ನೇ ಓವರ್‌ ನಡೆಯುತ್ತಿದ್ದರೂ ಅದು 20ನೇ ಓವರ್‌ಗೆ ಸಮನಾಗಿರುತ್ತದೆ. ಸಾಮಾನ್ಯವಾಗಿ ಚೆಂಡು 30ನೇ ಓವರ್‌ ನಂತರ ಮಾತ್ರ ರಿವರ್ಸ್‌ ಸ್ವಿಂಗ್ ಆಗುತ್ತದೆ. ಈಗ 2 ಹೊಸ ಚೆಂಡುಗಳ ಬಳಕೆಯಿಂದ ರಿವರ್ಸ್‌ ಸ್ವಿಂಗ್ ಮರೆಯಾಗಿದೆ,” ಎಂದು ಹೇಳಿದ್ದಾರೆ.
ಸ್ಪಿನ್ನರ್‌ಗಳಿಗೆ ಸಂತಸ ನೀಡುತ್ತಿಲ್ಲ?
ಏಕದಿನ ಕ್ರಿಕೆಟ್‌ನಲ್ಲಿ ಈಗ ತರಲಾಗಿರುವ ಫೀಲ್ಡಿಂಗ್‌ ನಿಯಮಗಳು ಸ್ಪಿನ್ನರ್‌ಗಳಿಗೆ ಭಾರಿ ನಿರಾಶೆ ತಂದೊಡ್ಡಿದೆ ಎಂದು ಸಚಿನ್ ತೆಂಡೂಲ್ಕರ್‌ ಅಭಿಪ್ರಾಯ ಪಟ್ಟಿದ್ದಾರೆ. ಕೊನೇ 10 ಓವರ್‌ಗಳಲ್ಲಿ 30 ಯಾರ್ಡ್‌ ಒಳಗೆ 5 ಫೀಲ್ಡರ್‌ಗಳನ್ನು ಹೊಂದುವುದು ಸ್ಪಿನ್ನರ್‌ಗಳಿಗೆ ಸಂತಸ ನೀಡುತ್ತಿಲ್ಲ ಎಂದು ಮಾಸ್ಟರ್‌ ಬ್ಲಾಸ್ಟರ್‌ ತಿಳಿಸಿದ್ದಾರೆ.
“ನಾನು ಕೆಲ ಸ್ಪಿನ್ನರ್‌ಗಳೊಂದಿಗೆ ಮಾತನಾಡಿದ್ದೇನೆ. ರಿಂಗ್‌ ಒಳಗೆ 5 ಫೀಲ್ಡರ್‌ಗಳನ್ನು ಹೊಂದುವ ಬಗ್ಗೆ ಅವರ ಅಭಿಪ್ರಾಯ ಕೇಳಿದ್ದೇನೆ. ಈ ನಿಯಮದಿಂದ ನಮ್ಮ ನೇರ ನಿಖರತೆಯಲ್ಲಿ ಬದಲಾವಣೆ ತಂದುಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಬೌಲರ್‌ಗಳು ಹೇಳುತ್ತಾರೆ. ಬ್ಯಾಟರ್‌ ತಪ್ಪು ಮಾಡುವಂತೆ ಮಾಡಲು ಲೈನ್‌ ಬದಲಾಯಿಸಬೇಕಾಗುತ್ತದೆ. ಆದರೆ, ಈಗಿನ ಫೀಲ್ಡಿಂಗ್‌ ನಿಯಮದಿಂದ ಆ ರೀತಿಯ ಬದಲಾವಣೆಗಳಿಗೆ ಅವಕಾಶ ಇಲ್ಲವಾಗಿದೆ. ಬದಲಾವಣೆ ತರಲು ಬೇಕಾದ ಕ್ಷೇತ್ರರಕ್ಷಣೆಯ ಬಲ ಈಗ ಇಲ್ಲವಾಗಿದೆ ಎನ್ನುತ್ತಾರೆ,” ಎಂದು ಸಚಿನ್ ವಿವರಿಸಿದ್ದಾರೆ.
