ಮಾಂತ್ರಿಕ ಹಳದಿ ಮಸಾಲೆ ಅಂತಾನೆ ಕರೆಯಲ್ಪಡುವ ಅರಿಶಿನ ನಮ್ಮಲ್ಲಿ ತುಂಬಾನೇ ಜನಪ್ರಿಯವಾದ ಮಸಾಲೆ ಪದಾರ್ಥವಾಗಿದೆ. ಇದು ಹಲವಾರು ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ.
ಅರಿಶಿನವು ಕೇವಲ ಅಡುಗೆ ಮನೆಯಲ್ಲಿ ಮಾತ್ರ ಪ್ರಮುಖ ಪಾತ್ರವನ್ನು ಹೊಂದಿರುವುದು ಮಾತ್ರವಲ್ಲ. ಅರಿಶಿನವು ಧಾರ್ಮಿಕ ಕಾರ್ಯಗಳಲ್ಲಿ ಮತ್ತು ವಾಸ್ತು ಶಾಸ್ತ್ರದಲ್ಲಿ ವಿಶೇಷ ಸ್ಥಾನವನ್ನು ಹೊಂದಿರುವುದರೊಂದಿಗೆ ಆರೋಗ್ಯದ ದೃಷ್ಟಿಯಲ್ಲೂ ಅರಿಶಿನ ಬಹುಪಕಾರಿ.
ಅರಿಶಿನವನ್ನು ಸಾವಿರಾರು ವರ್ಷಗಳಿಂದ ಪರ್ಯಾಯ ಔಷಧವಾಗಿ ಬಳಸಲಾಗುತ್ತಿದೆ. ಹೊಟ್ಟೆಯ ಸಮಸ್ಯೆಗಳು ಮತ್ತು ಜೀರ್ಣಕಾರಿ ಸಮಸ್ಯೆಗಳು ಸೇರಿದಂತೆ ಅನೇಕ ರೋಗಗಳು ಮತ್ತು ಪರಿಸ್ಥಿತಿಗಳಿಗೆ ಚಿಕಿತ್ಸೆ ನೀಡಲು ಇದನ್ನು ಬಳಸಲಾಗುತ್ತದೆ.
ಅರಿಶಿನವು ಉರಿಯೂತದ ಮತ್ತು ಉತ್ಕರ್ಷಣ ನಿರೋಧಕ ಸಂಯುಕ್ತಗಳಲ್ಲಿ ಸಮೃದ್ಧವಾಗಿದೆ. ಸಾಂಪ್ರದಾಯಿಕ ಆಯುರ್ವೇದ ಔಷಧದಲ್ಲಿ, ಅರಿಶಿನವನ್ನು ಸಂಧಿವಾತದ ನೋವನ್ನು ನಿವಾರಿಸಲು ಮತ್ತು ಮುಟ್ಟನ್ನು ನಿಯಂತ್ರಿಸಲು ಸಹ ಬಳಸಲಾಗುತ್ತದೆ. ಜೀರ್ಣಕ್ರಿಯೆ ಮತ್ತು ಯಕೃತ್ತಿನ ಕಾರ್ಯವನ್ನು ಸುಧಾರಿಸಲು ಸಹ ಅರಿಶಿನವನ್ನು ಬಳಸಲಾಗುತ್ತದೆ.
ಅಷ್ಟೇ ಅಲ್ಲದೆ ಇಂದು, ಅರಿಶಿನವನ್ನು ಎದೆಯುರಿ, ಉರಿಯೂತ ಮತ್ತು ಹೊಟ್ಟೆಯ ಹುಣ್ಣುಗಳಿಗೆ ಪರ್ಯಾಯ ಚಿಕಿತ್ಸೆಯಾಗಿ ಗುರುತಿಸಲಾಗಿದೆ.
ಅರಿಶಿನವನ್ನು ನಮ್ಮ ದೈನಂದಿನ ಅಡುಗೆಯಲ್ಲೂ ಸಹ ಬಳಸಲಾಗುತ್ತದೆ, ಇದು ಆಹಾರಕ್ಕೆ ಬಣ್ಣ ಕೊಡುವುದರಿಂದ ಹಿಡಿದು ಆರೋಗ್ಯ ಪ್ರಯೋಜನಗಳವರೆಗೆ ಎಲ್ಲವನ್ನೂ ನೀಡುತ್ತದೆ
ಅರಿಶಿನದಲ್ಲಿರುವ ಅತ್ಯಂತ ಸಕ್ರಿಯ ಪದಾರ್ಥವನ್ನು ಕರ್ಕ್ಯುಮಿನ್ ಎಂದು ಕರೆಯಲಾಗುತ್ತದೆ. ಅರಿಶಿನದ ಹೆಚ್ಚಿನ ಆರೋಗ್ಯ ಪ್ರಯೋಜನಗಳಿಗೆ ಇದು ಕಾರಣವಾಗಿದೆ ಎಂದು ಹೇಳಲಾಗುತ್ತದೆ.
ಕರ್ಕ್ಯುಮಿನ್ ಪಾಲಿಫಿನಾಲ್ ಉತ್ಕರ್ಷಣ ನಿರೋಧಕವಾಗಿದ್ದು, ಇದು ಪ್ರಬಲವಾದ ಆಂಟಿವೈರಲ್, ಬ್ಯಾಕ್ಟೀರಿಯಾ ವಿರೋಧಿ ಮತ್ತು ಕ್ಯಾನ್ಸರ್ ವಿರೋಧಿ ಸಾಮರ್ಥ್ಯಗಳನ್ನು ಹೊಂದಿದೆ ಎಂದು ತುಂಬಾ ಸಂಶೋಧನೆಗಳು ತೋರಿಸಿವೆ.
ಅರಿಶಿನವು, ಅಧಿಕ ಹೊಟ್ಟೆಯ ಆಮ್ಲವನ್ನು ನಿಗ್ರಹಿಸಲು, ಅಜೀರ್ಣಕ್ಕೆ ಚಿಕಿತ್ಸೆ ನೀಡಲು ಉತ್ತಮವಾಗಿದೆ ಎಂದು ಬ್ರಿಟಿಷ್ ಮೆಡಿಕಲ್ ಜರ್ನಲ್ ನಲ್ಲಿ ಪ್ರಕಟವಾದ ಅಧ್ಯಯದಲ್ಲಿ ಉಲ್ಲೇಖಿಸಲಾಗಿದೆ
ಅರಿಶಿನವು ಕರ್ಕ್ಯುಮಿನ್ ಎಂಬ ಸ್ವಾಭಾವಿಕವಾಗಿ ಸಕ್ರಿಯವಾಗಿರುವ ಸಂಯುಕ್ತವನ್ನು ಹೊಂದಿದ್ದು, ಇದು ಉರಿಯೂತದ ಮತ್ತು ಆಂಟಿಮೈಕ್ರೊಬಿಯಲ್ ಗುಣಲಕ್ಷಣಗಳನ್ನು ಹೊಂದಿದೆ ಎಂದು ಹೇಳಲಾಗಿದೆ.
ಇದನ್ನು ಅಜೀರ್ಣವನ್ನು ಒಳಗೊಂಡಂತೆ ದೀರ್ಘಕಾಲದವರೆಗೆ ಔಷಧೀಯ ಪರಿಹಾರವಾಗಿ ಬಳಸಲಾಗುತ್ತದೆಯಾದರೂ ಸಾಂಪ್ರದಾಯಿಕ ಔಷಧಿಗಳೊಂದಿಗೆ ಹೋಲಿಸಿದರೆ ಇದು ನಿಜಕ್ಕೂ ಎಷ್ಟು ಪರಿಣಾಮಕಾರಿ ಎಂಬುದರ ಬಗ್ಗೆ ಸ್ಪಷ್ಟತೆಯಿಲ್ಲ ಎಂಬುದಾಗಿಯೂ ಅಧ್ಯಯನ ತಂಡ ಹೇಳಿಕೊಂಡಿದೆ.
ನಿಯಂತ್ರಿತ ಪ್ರಯೋಗವು 28 ದಿನಗಳ ಅವಧಿಗೆ ಮೂರು ಚಿಕಿತ್ಸಾ ಗುಂಪುಗಳ ಮೇಲೆ ನಡೆಸಲಾಗಿದೆ. ಥೈಲ್ಯಾಂಡ್‌ನ ಆಸ್ಪತ್ರೆಯಲ್ಲಿ ಅಜ್ಞಾತ ಕಾರಣದಿಂದ ಹೊಟ್ಟೆ ಸಂಬಂಧಿತ ಅಸ್ವಸ್ಥತೆಗಳನ್ನು ಒಳಗೊಂಡ 18-70 ವರ್ಷ ವಯಸ್ಸಿನ 206 ರೋಗಿಗಳನ್ನು ಈ ಅಧ್ಯಯನ ಒಳಗೊಂಡಿತ್ತು.
ಈ ಪ್ರಯೋಗದಲ್ಲಿ ಅರಿಶಿನ ಮತ್ತು ಒಂದು ಸಣ್ಣ ಡಮ್ಮಿ ಕ್ಯಾಪ್ಸುಲ್ , ಒಮೆಪ್ರಜೋಲ್ ಪ್ರತಿದಿನ ಒಂದು ಸಣ್ಣ 20 ಮಿಲಿ ಗ್ರಾಂ ಕ್ಯಾಪ್ಸುಲ್ ಮತ್ತು ಎರಡು ದೊಡ್ಡ ಡಮ್ಮಿ ಕ್ಯಾಪ್ಸುಲ್‌ಗಳು ದಿನಕ್ಕೆ 4 ಬಾರಿ ಮತ್ತು ಅರಿಶಿನ ಜೊತೆಗೆ ಒಮೆಪ್ರಜೋಲ್ ಅಂತ ಮೂರು ಗುಂಪುಗಳಾಗಿ ವಿಂಗಡಿಸಲಾಗಿತ್ತು.
ಡಿಸ್ಪೆಪ್ಸಿಯಾ ಮೌಲ್ಯಮಾಪನದ ತೀವ್ರತೆ (SODA) ಸ್ಕೋರ್, ನೋವು ಮತ್ತು ಇತರ ರೋಗಲಕ್ಷಣಗಳಲ್ಲಿ 28 ದಿನಗಳ ನಂತರ ರೋಗಲಕ್ಷಣದ ತೀವ್ರತೆಯಲ್ಲಿ ಗಮನಾರ್ಹವಾದ ಕಡಿತವನ್ನು ಸೂಚಿಸಿದೆಯಂತೆ. ರೋಗಿಗಳಲ್ಲಿ 56 ದಿನಗಳ ನಂತರ ಈ ನೋವು ತುಂಬಾನೇ ಕಡಿಮೆಯಾಗಿದೆಯಂತೆ.
