ರೇಣುಕಾಸ್ವಾಮಿ ಕೊಲೆ ಕೇಸ್ ನಲ್ಲಿ ನಟ ದರ್ಶನ್ ಜೈಲು ಸೇರಿದ್ದಾರೆ. ಕೆಲವರು ದರ್ಶನ್ ಪರವಾಗಿ ನಿಂತಿದ್ದರೆ ಮತ್ತೊಂದಷ್ಟು ಮಂದಿ ದರ್ಶನ್ ನಡೆಗೆ ಆಕ್ರೋಶ ಹೊರ ಹಾಕಿದ್ದಾರೆ. ಇನ್ನೂ ಕೆಲವರು ಮೌನ ತಾಳಿದ್ದಾರೆ. ಇದೀಗ ದರ್ಶನ್ ಬಗ್ಗೆ ಮುಖ್ಯಮಂತ್ರಿ ಚಂದ್ರು ಮಾತನಾಡಿದ್ದಾರೆ.
ಖಾಸಗಿ ಯುಟ್ಯೂಬ್ ಚಾನಲ್ ಗೆ ಮಾತನಾಡಿದ ಮುಖ್ಯಮಂತ್ರಿ ಚಂದ್ರು ಅವರು, ‘ಅನುಭವದ ಪಾಠ ತುಂಬಾನೇ ಮುಖ್ಯ. ರೈತ ಓದದೇ ಇದ್ದರೂ ಅವನಿಗೆ ಜೀವನದ ಪಾಠ ಗೊತ್ತಿದೆ. ಹೇಗೆ ಉತ್ತಬೇಕು, ಬಿತ್ತಬೇಕು ಎಂಬುದು ತಿಳಿದಿರುತ್ತದೆ. ಸಾಮಾನ್ಯ ಜ್ಞಾನ ಇಲ್ಲದ ವಿದ್ಯಾಭ್ಯಾಸ ಏನಕ್ಕೂ ಪ್ರಯೋಜನ ಇಲ್ಲ’ ಎಂದಿದ್ದಾರೆ ಮುಖ್ಯಮಂತ್ರಿ ಚಂದ್ರು. ಇದಕ್ಕೆ ಉದಾಹರಣೆಯಾಗಿ ಅವರು ದರ್ಶನ್ ಅವರನ್ನು ತೆಗೆದುಕೊಂಡಿದ್ದಾರೆ.
‘ದರ್ಶನ್ಗೆ ಸಾಮಾನ್ಯ ಜ್ಞಾನ ಇಲ್ಲ. ಇದ್ದಿದ್ದರೆ ಹೀಗಾಗುತ್ತಿರಲಿಲ್ಲ. ಹಣ ಇದೆ, ಆದರೆ ಬೌದ್ಧಿಕ ಪ್ರಜ್ಞೆ ಇಲ್ಲ. ಅವನು ವೃತ್ತಿಪರ ಮರ್ಡರರ್ ಅಲ್ಲ. ಆದಾಗ್ಯೂ ಕೊಲೆ ಮಾಡಿರುವ ಆರೋಪ ಬಂದಿದೆ. ಅವನಲ್ಲಿ ಕ್ರೌರ್ಯ ಯಾಕೆ ಬಂತು ಎಂದರೆ ಅದಕ್ಕೆ ಕಾರಣ ಧಿಮಾಕು, ದುರಹಂಕಾರ, ಅನುಭವದ ಕೊರತೆ. ರಾಜ್ಕುಮಾರ್ಗೆ ಅವಮಾನ ಆಗಿತ್ತು. ಆದರೆ, ಅದನ್ನು ಮೆಟ್ಟಿನಿಂತನು’ ಎಂದಿದ್ದಾರೆ ಮುಖ್ಯಮಂತ್ರಿ ಚಂದ್ರು.
