ರಾಧಿಕಾ ಕುಮಾರಸ್ವಾಮಿ ನಟನೆಯ ಭೈರಾದೇವಿ ಸಿನಿಮಾದ ಟ್ರೈಲರ್ ಬಿಡುಗಡೆಯಾಗಿದೆ. ಮಂತ್ರಿಮಾಲ್ ನಡೆದ ಟ್ರೈಲರ್ ಲಾಂಚ್ ಕಾರ್ಯಕ್ರಮದಲ್ಲಿ ರಾಧಿಕಾ ಕುಮಾರಸ್ವಾಮಿ ಅಭಿಮಾನಿಗಳಿಗೆ ಶಾಕ್ ನೀಡಿದ್ದಾರೆ. ಒಂದು ವೇಳೆ ಈ ಸಿನಿಮಾ ಸಕ್ಸಸ್ ಆಗದೇ ಇದ್ರೆ, ಜನರು ಇದನ್ನು ಒಪ್ಪದೇ ಇದ್ದಲ್ಲಿ ನಾನು ಮುಂದೆ ನಟನೆ ಮಾಡುವುದಿಲ್ಲ ಎಂದು ಭಾವುಕರಾಗಿದ್ದಾರೆ.
ನಾಲ್ಕು ವರ್ಷಗಳ ಕಾಲ, ಹಲವು ಅಡೆತಡೆಯ ನಡುವೆ ಕುಟುಂಬ ಸಮೇತರಾಗಿ ಬಂದು ನೋಡುವಂತಹ ಸಿನಿಮಾವನ್ನು ಮಾಡಿದ್ದೇವೆ. ತುಂಬಾ ಕಷ್ಟಪಟ್ಟು ಈ ಸಿನಿಮಾವನ್ನು ಮಾಡಿದ್ದೇವೆ. ಈ ಒಂದು ಚಿತ್ರ ಮಾಡುವಾಗಲೇ ನಾನು ನಿರ್ದೆಶಕರಿಗೆ ಹೇಳಿದ್ದೆ. ಒಂದು ವೇಳೆ ಈ ಸಿನಿಮಾವನ್ನು ಜನರು ಗೆಲ್ಲಿಸದೇ ಹೋದಲ್ಲಿ ನಾನು ಚಿತ್ರರಂಗದಿಂದ ಹಾಗೂ ನಟನೆಯಿಂದ ದೂರ ಉಳಿಯುತ್ತೇನೆ ಅಂತ ಹೇಳಿದ್ದೆ ಎಂದರು.
ಸಿನಿಮಾದ ಒಂದು ಹಾಡಿನಲ್ಲಿ ಅಘೋರಿ ಪಾತ್ರ ಮಾಡುವಾಗ ಮೇಕಪ್ನಿಂದಾಗಿ ಕಲಾವಿದರು ಎಷ್ಟು ಕಷ್ಟಪಟ್ಟಿದ್ದಾರೆಂದು ನಾನು ನೋಡಿದ್ದೇನೆ. ತುಂಬಾ ಕಷ್ಟ ಬಿದ್ದು. ನೂರಾರು ಸಮಸ್ಯೆಗಳನ್ನ ಎದುರಿಸಿ ಈ ಸಿನಿಮಾವನ್ನು ಮಾಡಿದ್ದೇವೆ. ಹೀಗಾಗಿ ಒಂದು ವೇಳೆ ಈ ಸಿನಿಮಾ ಬಾಕ್ಸ್ಆಫೀಸ್ನಲ್ಲಿ ಸೋತ್ರೆ ನಾನು ಮುಂದೆ ಯಾವ ಸಿನಿಮಾವನ್ನು ಮಾಡಲ್ಲ. ಇದೇ ನನ್ನ ಕೊನೆಯ ಸಿನಿಮಾ ಆಗಲಿದೆ ಅಂತ ರಾಧಿಕಾ ಕುಮಾರಸ್ವಾಮಿ ವೇದಿಕೆಯ ಮೇಲೆ ಹೇಳಿದ್ರು. ಅಂದ ಹಾಗೆ ರಾಧಿಕಾ ಕುಮಾರಸ್ವಾಮಿ ನಾಯಕಿಯಾಗಿ ನಟಿಸಿರುವ ಈ ಸಿನಿಮಾದಲ್ಲಿ ರಮೇಶ್ ಅರವಿಂದ್ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. ಅಕ್ಟೋಬರ್ 3 ರಂದು ತೆರೆಯ ಮೇಲೆ ಭೈರಾದೇವಿ ಸಿನಿಮಾ ರಿಲೀಸ್ ಆಗುತ್ತಿದೆ.
