ಬಾಲಿವುಡ್ ನಟ ರಾಜ್ಕುಮಾರ್ ರಾವ್ ನಟನೆಯ ರೋಮ್-ಕಾಮ್ ಮಿಸ್ಟರ್ ಅಂಡ್ ಮಿಸಸ್ ಮಹಿ ಬಿಡುಗಡೆಗೆ ಸಜ್ಜಾಗುತ್ತಿದ್ದಾರೆ. ಅವರಿಗೆ ನಾಯಕಿಯಾಗಿ ಜಾನ್ವಿ ಕಪೂರ್ ನಟಿಸಿದ್ದಾರೆ. ಶರಣ್ ಶರ್ಮಾ ನಿರ್ದೇಶನದ ಜೀ ಸ್ಟುಡಿಯೋಸ್ ಮತ್ತು ಧರ್ಮ ಪ್ರೊಡಕ್ಷನ್ಸ್ ನಿರ್ಮಾಣದ ಈ ಸಿನಿಮಾ ಮೇ 31ರಂದು ಬಿಡುಗಡೆಯಾಗುತ್ತಿದೆ. ಸದ್ಯ ಚಿತ್ರದ ಪ್ರಚಾರ ಕಾರ್ಯ ಭರದಿಂದ ಸಾಗುತ್ತಿದೆ.
ಇತ್ತೀಚೆಗೆ ಕರಣ್ ಜೋಹರ್ ಅವರೊಂದಿಗಿನ ಸಂದರ್ಶನದಲ್ಲಿ, ರಾತ್ರೋರಾತ್ರಿ ಚಲನಚಿತ್ರದಲ್ಲಿ ಸ್ಟಾರ್ ಕಿಡ್‌ನಿಂದ ಬದಲಾಯಿಸಲ್ಪಟ್ಟ ಅನುಭವವನ್ನು ಬಹಿರಂಗಪಡಿಸಿದರು ಮತ್ತು ಅದನ್ನು ‘ನ್ಯಾಯವಲ್ಲ’ ಎಂದು ಹೇಳಿದ್ದಾರೆ.
ಒಂದು ದಿನ ಹೇಳದೆ ಕೇಳದೆ ರಾತ್ರೋರಾತ್ರಿ ನನ್ನ ಪಾತ್ರಕ್ಕೆ ನನ್ನ ಬದಲಿಗೆ ಸ್ಟಾರ್ ಕಿಡ್ಡನ್ನು ಹಾಕಿದ್ದರು. ಇದು ಖಂಡಿತಾ ಸರಿಯಲ್ಲ. ಅವರು ವಿಷಯಗಳ ಮೇಲೆ ಹಿಡಿತ ಹೊಂದಿದ್ದಾರೆಂದ ಮಾತ್ರಕ್ಕೆ, ಜನರ ಪರಿಚಯವಿದೆ ಎಂದ ಮಾತ್ರಕ್ಕೆ ಹೀಗೆ ಮಾಡೋದು ಸರಿಯಲ್ಲ’ ಎಂದು ಹೇಳಿದ್ದಾರೆ.
ಒಮ್ಮೆ ರಾಜ್ಕುಮಾರ್ ಆಡಿಷನ್‌ನಲ್ಲಿ ಭಾಗವಹಿಸುವಾಗ ತಮ್ಮ ಬಳಿ ಕೇವಲ ರೂ.18 ಉಳಿದಿದ್ದನ್ನು ಬಹಿರಂಗಪಡಿಸಿದ್ದರು. ರಣವೀರ್ ಅಲಹಬಾದಿಯಾ ಅವರೊಂದಿಗಿನ ಹಿಂದಿನ ಸಂಭಾಷಣೆಯಲ್ಲಿ, ರಾಜ್ಕುಮಾರ್ ರಾವ್ ಅವರು ತಮ್ಮ ವೃತ್ತಿಜೀವನದ ಆರಂಭದಲ್ಲಿ ಅನೇಕ ಆಡಿಷನ್‌ನಲ್ಲಿ ಭಾಗವಹಿಸಲು ಹೆಣಗಾಡುತ್ತಿದ್ದಾಗ ಎದುರಿಸಿದ ಭೀಕರ ವಾಸ್ತವಗಳನ್ನು ಹೇಳಿದ್ದರು.
‘ಅತ್ಯಂತ ಕಷ್ಟದ ಸಮಯ. ಆರ್ಥಿಕ ತೊಂದರೆ ಮತ್ತು ಕೆಲಸವಿರಲಿಲ್ಲ. ನನ್ನ ತಾಯಿ ನನಗೆ ತುಂಬಾ ಬೆಂಬಲ ನೀಡಿದರು ಮತ್ತು ನನ್ನ ಹಣದ ಕೊರತೆ ಬಂದಾಗ ಅದನ್ನು ವ್ಯವಸ್ಥೆ ಮಾಡಿ ಕಳುಹಿಸುತ್ತಿದ್ದರು. ಒಮ್ಮೆ ನನ್ನ ಖಾತೆಯಲ್ಲಿ ಕೇವಲ 18 ರೂಪಾಯಿ ಉಳಿದಿತ್ತು ಮತ್ತು ಅದು ಕೂಡ ಮುಂಬೈಯಂತಹ ನಗರದಲ್ಲಿ ನಿಭಾಯಿಸುವುದು ಕಷ್ಟವಾಗಿತ್ತು. ತುಂಬಾ ಮಿತವ್ಯಯದಿಂದ ಖರ್ಚು ಮಾಡುತ್ತಿದ್ದೆ. ನಾವು ಮೂವರು ಒಂದೇ ಫ್ಲಾಟ್‌ನಲ್ಲಿ ವಾಸಿಸುತ್ತಿದ್ದೆವು ಮತ್ತು ನಾನು ಊಟವನ್ನು ಬಿಟ್ಟು ಊಟಕ್ಕೆ ಒಂದು ಪಾರ್ಲೆ ಜಿ ಮತ್ತು ಫ್ರೂಟಿಯನ್ನು ಸೇವಿಸುತ್ತಿದ್ದೆ. ಆ ಸಮಯದಲ್ಲಿ ನನ್ನ ಊಟದ ಬೆಲೆ 4 ರೂ. ಆಗಿತ್ತು ಎಂದು ಹೇಳಿದ್ದಾರೆ.
