ಟಾಲಿವುಡ್ ನಟ ರಾಮ್ ಚರಣ್ ಖ್ಯಾತಿ ‘ಆರ್ಆರ್ಆರ್’ ಸಿನಿಮಾದಿಂದ ಮತ್ತಷ್ಟು ಹೆಚ್ಚಿದೆ. ಈ ಸಿನಿಮಾ ವಿಶ್ವ ಮಟ್ಟದಲ್ಲಿ ಸದ್ದು ಮಾಡುತ್ತಿದೆ. ‘ಆರ್ಆರ್ಆರ್’ ಹಾಲಿವುಡ್ ಅಂಗಳದಲ್ಲಿ ಅವಾರ್ಡ್ ಗೆಲ್ಲುತ್ತಿರುವುದರಿಂದ ಭಾರತೀಯರು ಹೆಮ್ಮೆ ಪಡುವಂತಾಗಿದೆ. ಈಗ ನಟ ರಾಮ್ ಚರಣ್ ಅವರು ವಿದೇಶದಲ್ಲಿ ಸಂದರ್ಶನ ನೀಡುತ್ತಿದ್ದಾರೆ. ಸದ್ಯ ರಾಮ್ ಚರಣ್ ಸಂದರ್ಶನ ಶೇರ್ ಮಾಡಿಕೊಂಡಿರುವ ಉದ್ಯಮಿ ಆನಂದ್ ಮಹಿಂದ್ರಾ, ರಾಮ್ ಚರಣ್ಗೆ ಗ್ಲೋಬಲ್ ಸ್ಟಾರ್ ಎನ್ನುವ ಸ್ಟಾರ್ ಪಟ್ಟ ನೀಡಿದ್ದಾರೆ.
ಎಬಿಸಿ ನಡೆಸಿದ ಜಿಎಂಎ3 ಕಾರ್ಯಕ್ರಮದಲ್ಲಿ ರಾಮ್ ಚರಣ್ ಭಾಗಿ ಆಗಿದ್ದರು. ಈ ಕಾರ್ಯಕ್ರಮದಲ್ಲಿ ‘ನಾಟು ನಾಟು.. ಹಾಡಿನ ಬಗ್ಗೆ ಚರ್ಚೆ ಮಾಡಲಾಯಿತು. ಕಾರ್ಯಕ್ರಮದಲ್ಲಿ ಮಾತನಾಡುತ್ತಾ, ರಾಮ್ ಚರಣ್ ‘ಇದು ಆರಂಭ ಮಾತ್ರ’ ಎಂದಿದ್ದು, ಈ ವಿಡಿಯೋ ಸಖತ್ ವೈರಲ್ ಆಗಿದೆ. 10 ಲಕ್ಷಕ್ಕೂ ಅಧಿಕ ಬಾರಿ ವಿಡಿಯೋ ವೀಕ್ಷಣೆ ಕಂಡಿದೆ. ಈ ವಿಡಿಯೋನ ರೀಟ್ವೀಟ್ ಮಾಡಿಕೊಂಡಿರುವ ಆನಂದ್ ಮಹಿಂದ್ರಾ ‘ಈ ವ್ಯಕ್ತಿ ಗ್ಲೋಬಲ್ ಸ್ಟಾರ್’ ಎಂದು ರಾಮ್ ಚರಣ್ ಅವರನ್ನು ಕರೆದಿದ್ದಾರೆ.
ಆನಂದ್ ಮಹಿಂದ್ರಾ ಅವರ ಹೊಗಳಿಕೆಯಿಂದ ಫ್ಯಾನ್ಸ್ ಹಾಗೂ ರಾಮ್ ಚರಣ್ಗೆ ಖುಷಿಯಾಗಿದೆ. ಈ ಟ್ವೀಟ್ಗೆ ಉತ್ತರಿಸಿರುವ ರಾಮ್ ಚರಣ್, ‘ಧನ್ಯವಾದ. ಎಲ್ಲಾ ಕ್ಷೇತ್ರಗಳಲ್ಲಿ ಮಿಂಚಲು ಇದು ಭಾರತದ ಸಮಯ’ ಎಂದಿದ್ದಾರೆ.
