ಸಿನಿಮಾ ರಂಗದಲ್ಲಿ ಸ್ಟಾರ್ ನಟ ನಟಿಯರ ಮಕ್ಕಳು ಚಿತ್ರರಂಗಕ್ಕೆ ಬರುವುದು ಕಾಮನ್ ಆಗಿದೆ. ಸ್ಟಾರ್ ಫ್ಯಾಮಿಲಿಗಳ ಅನೇಕ ಕುಡಿಗಳು ಈಗಾಗಲೇ ತೆಲುಗು ಚಿತ್ರರಂಗದಲ್ಲಿ ತೊಡಗಿಕೊಂಡಿದ್ದಾರೆ. ಆ ಸಾಲಿಗೆ ಇದೀಗ ಖ್ಯಾತ ನಟ ಮಹೇಶ್ ಬಾಬು ಕುಟುಂಬದ ಕುಡಿಯೊಂದು ಸೇರಿಕೊಂಡಿದೆ.
ಘಟ್ಟಮನೇನಿ ಕುಟುಂಬದ ಸಾಕಷ್ಟು ಮಂದಿ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿದ್ದಾರೆ. ಸೂಪರ್ಸ್ಟಾರ್ ಕೃಷ್ಣ ಅವರ ಮಕ್ಕಳು, ಮರಿ ಮಕ್ಕಳು, ಅಳಿಯಂದಿರು ಚಿತ್ರರಂಗದಲ್ಲಿ ಬ್ಯುಸಿ ಇದ್ದಾರೆ. ಈಗ ಈ ಕುಟುಂಬದ ಮತ್ತೋರ್ವ ಕುಡಿ ಚಿತ್ರರಂಗಕ್ಕೆ ಕಾಲಿಡೋಕೆ ರೆಡಿ ಆಗಿದೆ. ಅವರು ಬೇರೆ ಯಾರೂ ಅಲ್ಲ ಜಯ ಕೃಷ್ಣ ಘಟ್ಟಮನೇನಿ. ರಮೇಶ್ ಬಾಬು ಅವರ ಮಗ ಆಗಿರೋ ಇವರು ಸಿನಿಮಾ ರಂಗದಲ್ಲಿ ತೊಡಗಿಕೊಳ್ಳಲಿದ್ದಾರೆ. ಅದಕ್ಕಾಗಿ ಭರ್ಜರಿ ತಯಾರಿ ಮಾಡಿಕೊಂಡಿದ್ದಾರೆ.
ರಮೇಶ್ ಬಾಬು ಅವರು ಮಹೇಶ್ ಬಾಬು ಅವರ ಸಹೋದರ. ರಮೇಶ್ ಬಾಬು ನಟ ಹಾಗೂ ನಿರ್ಮಾಪಕ ಆಗಿದ್ದರು. ಅವರು 2022ರಲ್ಲಿ ನಿಧನ ಹೊಂದಿದರು. ಇವರ ಮಗ ಜಯ ಕೃಷ್ಣ ಘಟ್ಟಮನೇನಿ ಅವರು ಹೀರೋ ಆಗಿ ಎಂಟ್ರಿ ಕೊಡಲಿದ್ದಾರೆ. ಈ ಬಗ್ಗೆ ಟಾಲಿವುಡ್ನಲ್ಲಿ ಮಾಹಿತಿ ಹರಿದಾಡಿದೆ.
ಅಮೆರಿಕದಲ್ಲಿ ಜಯ ಕೃಷ್ಣ ಅವರು ನಟನಾ ತರಬೇತಿ ಪಡೆದು ಬಂದಿದ್ದಾರೆ. ನಟನೆಯ ಜೊತೆಗೆ ಸಿನಿಮಾ ಮಾಡುವ ತರಬೇತಿಯನ್ನು ಕೂಡ ಪಡೆದಿದ್ದಾರೆ. ಅವರು ಹೀರೋ ಆಗಿ ಮಿಂಚಲು ರೆಡಿ ಆಗಿದ್ದಾರೆ ಎನ್ನಲಾಗಿದೆ. ಜಯ ಕೃಷ್ಣ ಅವರು ಸದ್ಯ ಕಥೆಯನ್ನು ಕೇಳುತ್ತಿದ್ದಾರೆ. ಆ ಬಳಿಕ ಅವರು ಒಂದು ಕಥೆಯನ್ನು ಆಯ್ಕೆ ಮಾಡಿ ಸಿನಿಮಾ ಮಾಡಲಿದ್ದಾರೆ.
ಮಹೇಶ್ ಬಾಬು ಅವರ ಮಗಳು ಸಿತಾರಾಗೆ ಸಣ್ಣ ವಯಸ್ಸು. ಅವಳು ಈಗಲೇ ಚಿತ್ರರಂಗದಲ್ಲಿ ನಿಧಾನವಾಗಿ ತೊಡಗಿಕೊಳ್ಳುತ್ತಿದ್ದಾಳೆ. ಬ್ರ್ಯಾಂಡ್ಗಳ ಪ್ರಚಾರ ಮಾಡುವ ಅವಳು, ‘ಸರ್ಕಾರು ವಾರಿ ಪಾಟ’ ಸಿನಿಮಾದ ಪ್ರಮೋಷನ್ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಳು. ಈಗ ಜಯ ಕೃಷ್ಣ ಅವರು ಕೂಡ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರೆ.
