ಬೆಂಗಳೂರು: ಹೊಸದಾಗಿ ರಚಿಸಲಾಗಿರುವ ಸಶಸ್ತ್ರ ಸೇನಾಪಡೆಗಳ ವಿಶೇಷ ಕಾರ್ಯಾಚರಣೆ ವಿಭಾಗ (ಎಎಫ್‌ಎಸ್‌ಒಡಿ)ವಧಿನ್ನು ಬಲಪಡಿಸುವ ನಿಟ್ಟಿನಲ್ಲಿ ರಚಿಸಲಿರುವ ತ್ರಿ ಸರ್ವಿಸಸ್‌ ಘಟಕವನ್ನು ಉತ್ತರ ಪ್ರದೇಶದ ಆಗ್ರಾದಿಂದ ಬೆಂಗಳೂರಿಗೆ ಸ್ಥಳಾಂತರಿಸಲಾಗಿದೆ.
ಎಎಫ್‌ಎಸ್‌ಒಡಿ ಕೇಂದ್ರ ಕಚೇರಿ ಬೆಂಗಳೂರಿನಲ್ಲಿ ತೆರೆಯಲಾಗಿದೆ. ಇದು ಪ್ಯಾರಾಚೂಟ್‌ ರೆಜಿಮೆಂಟ್‌ ಟ್ರೂಫ್ಸ್‌ ಸೇರಿದಂತೆ ವಿಶೇಷ ಪಡೆಗಳಿಗೆ ಹಲವು ರೀತಿಯ ತರಬೇತಿಗಳನ್ನು ನೀಡಲಿದೆ ಎಂದು ರಕ್ಷಣಾ ಪಡೆಯ ಮೂಲಗಳು ತಿಳಿಸಿವೆ.
ಸೇನೆ, ನೌಕಾಪಡೆ ಮತ್ತು ವಾಯುಪಡೆ ಮೂರು ಸೇವೆಗಳ ನಡುವಿನ ಸಮನ್ವಯ ಹೆಚ್ಚಿಸುವ ಉದ್ದೇಶದಿಂದ ಈ ತ್ರಿ ಸರ್ವಿಸಸ್‌ ಘಟಕ ಆರಂಭಿಸಲಾಗಿದೆ. ಎಎಫ್‌ಎಸ್‌ಒಡಿ ಪಡೆಗಳಲ್ಲಿ ಸೇನೆಯ ಪ್ಯಾರಾ (ವಿಶೇಷ ಪಡೆಗಳು), ನೌಕಾ ಪಡೆಯ ಕಮಾಂಡೋಗಳು (ಮಾರ್ಕೋಸ್‌) ಮತ್ತು ಭಾರತೀಯ ವಾಯುಪಡೆಯ ಗಾರ್ಡ್‌ಗಳು ಸೇರಿದ್ದಾರೆ. ಇದರ ಸಿಬ್ಬಂದಿಯನ್ನು ಭಯೋತ್ಪಾದನಾ ನಿಗ್ರಹ ಕಾರ್ಯಾಚರಣೆಗಳಲ್ಲಿಅನುಭವ ಪಡೆಯುವ ಸಲುವಾಗಿ ಕಾಶ್ಮೀರ ಕಣಿವೆಗೆ ನಿಯೋಜಿಸಲಾಗಿತ್ತು.
ಅಲ್ಲದೆ, ಎಎಫ್‌ಎಸ್‌ಒಡಿ ಪಡೆಗಳನ್ನು ಪಶ್ಚಿಮ ಬಂಗಾಳದ ಸಿಲಿಗುರಿ ಕಾರಿಡಾರ್‌ನಲ್ಲಿರುವ ಭಾರತ-ಚೀನಾ ಗಡಿ ಭಾಗದಲ್ಲಿ ಯುದ್ಧದ ಸನ್ನಿವೇಶಗಳನ್ನು ನಿಭಾಯಿಸಲು ಮತ್ತು ಇತರೆ ಪ್ರದೇಶಗಳಿಗೂ ಸಿಬ್ಬಂದಿಯನ್ನು ನಿಯೋಜಿಸಲಾಗುತ್ತಿದೆ. ಈ ಪಡೆಗಳನ್ನು ಬಾಹ್ಯ ಕಾರ್ಯಾಚರಣೆಗಳನ್ನು ನಿಭಾಯಿಸುವ ರೀತಿ ಸನ್ನದ್ಧಗೊಳಿಸಲಾಗುತ್ತಿದೆ. ಈ ಪಡೆಗಳಿಗೆ ವಿಶೇಷ ಶಸ್ತ್ರಾಸ್ತ್ರಗಳನ್ನು ನೀಡುವ ಮೂಲಕ ಅವರ ಸಾಮರ್ಥ್ಯಗಳನ್ನು ಹೆಚ್ಚಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ.
ಸಿಲಿಗುರಿ ಕಾರಿಡಾರ್‌ ಸಮೀಪ ಭಾರತೀಯ ವಾಯುಪಡೆಯ ವಿಮಾನಗಳ ಭಾರಿ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ಇಳಿಸಿದ ನಂತರ ಡಿಆರ್‌ಡಿಒ ಕೂಡ 600 ಪ್ಯಾರಾ ಮಿಲಿಟರಿ ತುಕಡಿಗಳಿಗೆ ಸೇರಿದ ಎಲ್ಲ ಬಗೆಯ ಶಸ್ತ್ರಾಸ್ತ್ರಗಳನ್ನು ಸಂಗ್ರಹ ಮಾಡುವ ಪ್ರಯೋಗ ನಡೆಸಿತು. ಈ ಅಭ್ಯಾಸಗಳಲ್ಲಿ ಹೊಸ ಹಾಗೂ ಅತ್ಯಾಧುನಿಕ ತಂತ್ರಜ್ಞಾನ, ತೀವ್ರ ನಿಗಾ ವ್ಯವಸ್ಥೆ ಮತ್ತು ಗುರಿ ಅಭ್ಯಾಸ ಮತ್ತು ಎದುರಾಳಿಗಳ ಗುರಿಗಳನ್ನು ಭೇದಿಸುವುದು ಸೇರಿ ಹಲವು ಅಂಶಗಳು ಒಳಗೊಂಡಿವೆ ಎಂದು ಮೂಲಗಳು ತಿಳಿಸಿವೆ
