ಮಂಗಳೂರು: ರಾಜ್ಯದಲ್ಲಿ ಚುನಾವಣಾ ಪ್ರಚಾರದ ಅಬ್ಬರ ದಿನದಿಂದ ದಿನಕ್ಕೆ ಏರುತ್ತಿದ್ದು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲೂ ಪ್ರತಿಧ್ವನಿಸಿದೆ. ಭಾನುವಾರ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ರಾಜಸ್ಥಾನ ರಾಯಲ್ಸ್ ನಡುವೆ ನಡೆದ ಐಪಿಎಲ್ ಪಂದ್ಯದ ವೇಳೆ ಬೆಳ್ತಂಗಡಿ ಶಾಸಕ ಹರೀಶ್ ಪೂಂಜಾ ಅವರ ಪೋಸ್ಟರ್ ಕಂಡುಬಂದಿದ್ದು ಈ ಫೋಟೋ ಈಗ ವೈರಲ್ ಆಗಿದೆ.
ಬೆಳ್ತಂಗಡಿ ಮೂಲಕ ನಾಲ್ವರು ಯುವಕರು ಪಂಡ್ಯ ನಡೆಯುತ್ತಿದ್ದ ವೇಳೆ ತಮ್ಮ ನೆಚ್ಚಿನ ಶಾಸಕರಾದ ಶಾಸಕ ಹರೀಶ್ ಪೂಂಜಾ ಅವರ ಫೋಟೋ ಪ್ರದರ್ಶಿಸಿ ಅಭಿಮಾನ ವ್ಯಕ್ತಪಡಿಸಿದ್ದಾರೆ. ತಮ್ಮ ನೆಚ್ಚಿನ ಶಾಸಕ ಮತ್ತೊಮ್ಮೆ ಗೆದ್ದು ಬರಲಿ ಎಂದು ಅವರು ಹಾರೈಸಿದ್ದಾರೆ.
ಉಜಿರೆ ಕಾಲೇಜಿನಲ್ಲಿ ಸಹಪಾಠಿಗಳಾಗಿದ್ದು ಈಗ ವಿವಿಧಿಡೆ ಉದ್ಯೋಗಿಗಳಾಗಿರುವ ಅಳದಂಗಡಿಯ ಅಚಲ್, ಪಿಲ್ಯದ ರಾಜೇಶ್, ಉಜಿರೆಯ ಶಾಂತಾರಾಮ್ ಮತ್ತು ನೆಕ್ಕಿಲಾಡಿಯ ದೇವಿಪ್ರಸಾದ್ ಪೋಸ್ಟರ್ ಪ್ರದರ್ಶಿಸಿದ ಹರೀಶ್ ಪೂಂಜಾ ಅಭಿಮಾನಿಗಳು.
ಮತ ಪ್ರಚಾರದೊಂದಿಗೆ ಜಾಗೃತಿ
ಆರ್ ಸಿಬಿ ಅಭಿಮಾನಿಗಳಾದ ಇವರು ಭಾನುವಾರ ನಡೆದ ಪಂದ್ಯದ ನಡುವೆಯೇ ಹರೀಶ್ ಪೂಂಜಾ ಅವರ ಪರವಾಗಿ ಮತ ಪ್ರಚಾರ ಮಾಡಿದ್ದಾರೆ. ತಮ್ಮ ನೆಚ್ಚಿನ ಯುವ ನಾಯಕನನ್ನು ಮತ್ತೆ ಚುನಾಯಿಸುವಂತೆ ಬೆಳ್ತಂಗಡಿಯ ಮತದಾರಲ್ಲಿ ವಿನಂತಿಸಿದ್ದಾರೆ. ಬೆಂಗಳೂರು ಮತ್ತು ಪರವೂರಿನಲ್ಲಿರುವ ಬೆಳ್ತಂಗಡಿಯ ಉದ್ಯೋಗಿಗಳು ತಮ್ಮದೇ ಊರಿಗೆ ತೆರಳಿ ಮತದಾನ ಮಾಡುವಂತೆ ವಿನಂತಿಸಿದ್ದಾರೆ. ಈ ಮೂಲಕ ಮತದಾನದ ಜಾಗೃತಿಯನ್ನೂ ಮೆರೆದಿದ್ದಾರೆ.
ಈ ಬಗ್ಗೆ ತಮ್ಮ ಅನುಭವ ಹಂಚಿಕೊಂಡ ಅಳದಂಗಡಿಯ ಅಚಲ್, ಪಂದ್ಯದ ವೇಳೆ ತಮ್ಮ ನೆಚ್ಚಿನ ನಾಯಕನ ಪೋಸ್ಟರ್ ಗಳನ್ನು ಪ್ರದರ್ಶಿಸಿದ್ದೇವೆ. ಈಗ ಹೇಗೂ ಚುನಾವಣೆಯ ಸಮಯ. ಹೀಗಾಗಿ ಈ ವೇಳೆ ವಿನೂತನ ರೀತಿಯಲ್ಲಿ ಪ್ರಚಾರ ಮಾಡುವ ಯೋಚನೆ ಮನದಲ್ಲಿ ಬಂತು. ತಕ್ಷಣವೇ ನಮ್ಮ ನೆಚ್ಚಿನ ನಾಯಕ ಹರೀಶ್ ಪೂಂಜಾ ಅವರ ಪೋಸ್ಟರ್ ಅನ್ನು ಪ್ರಿಂಟ್ ಹಾಕಿದೆ. ಗೆಳೆಯರು ಸಹ ಖುಷಿಯಿಂದ ಜೊತೆಯಾದರು ಎಂದು ತಿಳಿಸಿದ್ದಾರೆ.
