ಹೈದರಾಬಾದ್ : ವಿರಾಟ್ ಕೊಹ್ಲಿ (100 ರನ್, 63 ಎಸೆತ, 12 ಫೋರ್, 4 ಸಿಕ್ಸರ್) ಮತ್ತು ಫಾಫ್ ಡು ಪ್ಲೆಸಿಸ್ (71 ರನ್ 47 ಎಸೆತ, 7 ಫೋರ್, 2 ಸಿಕ್ಸರ್) ಅವರ 172 ರನ್‌ಗಳ ಅಮೋಘ ಜತೆಯಾಟದ ಬಲದಿಂದ ಮಿಂಚಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 8 ವಿಕೆಟ್‌ಗಳಿಂದ ಹೈದರಾಬಾದ್ ತಂಡದ ಸವಾಲನ್ನು ಹತ್ತಿಕ್ಕಿತು. ಈ ಜಯದೊಂದಿಗೆ ಒಟ್ಟಾರೆ 14 ಅಂಕಗಳನ್ನು ಕಲೆಹಾಕಿದ ಆರ್‌ಸಿಬಿ, ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೆ ಜಿಗಿಯುವ ಮೂಲಕ ತನ್ನ ಪ್ಲೇ ಆಫ್ ಆಸೆಯನ್ನು ಜೀವಂತವಾಗಿಟ್ಟುಕೊಂಡಿತು.
ಉಪ್ಪಳದ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯು ಕ್ರೀಡಾಂಗಣದಲ್ಲಿ ಗುರುವಾರ (ಮೇ 18) ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್‌ ಮಾಡಿದ ಸನ್‌ರೈಸರ್ಸ್‌ ಹೈದರಾಬಾದ್, ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ಹೆನ್ರಿಚ್ ಕ್ಲಾಸೆನ್ (104) ಬಾರಿಸಿದ ಅವರ ಚೊಚ್ಚಲ ಶತಕದ ನೆರವಿನಿಂದ 5 ವಿಕೆಟ್ ನಷ್ಟಕ್ಕೆ 186 ರನ್‌ಗಳ ದೊಡ್ಡ ಮೊತ್ತವನ್ನೇ ಪೇರಿಸಿತು.
ಇದಕ್ಕೆ ಪ್ರತಿಯಾಗಿ ಬೆಂಗಳೂರು ತಂಡ 4 ಎಸೆತಗಳು ಬಾಕಿ ಇರುವಂತೆಯೇ 2 ವಿಕೆಟ್ ನಷ್ಟಕ್ಕೆ 187 ರನ್ ಸಿಡಿಸಿ ಸ್ಮರಣೀಯ ಗೆಲುವನ್ನು ಸಂಭ್ರಮಿಸಿತು. ಐಪಿಎಲ್‌ ಅಖಾಡದಲ್ಲಿ 4 ವರ್ಷಗಳ ನಂತರ ಶತಕ ಸಿಡಿಸಿದ ವಿರಾಟ್ ಕೊಹ್ಲಿ, ಐಪಿಎಲ್‌ ಇತಿಹಾಸದಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಬ್ಯಾಟರ್‌ಗಳ ಪಟ್ಟಿಯಲ್ಲಿ ಕ್ರಿಸ್ ಗೇಲ್ (6) ಅವರ ದಾಖಲೆಯನ್ನು ಸರಿಗಟ್ಟಿದರು.
ಸನ್‌ರೈಸರ್ಸ್‌ಗೆ ಆರಂಭಿಕ ಆಘಾತ
ಹೈದರಾಬಾದ್ ಪರ ಇನಿಂಗ್ಸ್ ಶುರು ಮಾಡಿದ ಅಭಿಷೇಕ್ ಶರ್ಮ ಮತ್ತು ರಾಹುಲ್ ತ್ರಿಪಾಠಿಯನ್ನು 27 ರನ್‌ಗೆ ಬೇರ್ಪಡಿಸುವಲ್ಲಿ ಆಫ್ ಸ್ಪಿನ್ನರ್ ಮೈಕಲ್ ಬ್ರೇಸ್‌ವೆಲ್ ಯಶಸ್ವಿಯಾದರು. ಒಂದೇ ಓವರ್‌ನಲ್ಲಿ ಅಭಿಷೇಕ್ ಮತ್ತು ರಾಹುಲ್ ಇಬ್ಬರನ್ನೂ ಔಟ್ ಮಾಡಿದ ಬ್ರೇಸ್‌ವೆಲ್ ಆರ್‌ಸಿಬಿ ಪಾಳಯದಲ್ಲಿ ಸಂತಸ ಮೂಡಿಸಿದರು.
ಮಾರ್ಕಮ್‌-ಕ್ಲಾಸೆನ್ ಜೊತೆಯಾಟ
3ನೇ ವಿಕೆಟ್‌ಗೆ ನಾಯಕ ಏಡೆನ್‌ ಮಾರ್ಕ್ರಮ್ ಜತೆ 76 ರನ್ ಜೊತೆಯಾಟ ಕಟ್ಟಿದ ಹೆನ್ರಿಚ್ ಕ್ಲಾಸೆನ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಬೌಲರ್‌ಗಳನ್ನು ದಂಡಿಸಿದರು. 24 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದ ಕ್ಲಾಸೆನ್, ಬಿರುಸಿನ ಆಟ ಮುಂದುವರಿಸಿ ಎದುರಿಸಿದ 49 ಎಸೆತದಲ್ಲಿ ಸಿಕ್ಸರ್ ಬಾರಿಸುವ ಮೂಲಕ ಚೊಚ್ಚಲ ಶತಕದ ಸಂಭ್ರಮ ಆಚರಿಸಿದರು. ಆದರೆ ಈ ಸಂಭ್ರಮ ಮಾಸುವ ಮುನ್ನವೇ ಹರ್ಷಲ್ ಪಟೇಲ್‌ಗೆ ವಿಕೆಟ್ ಒಪ್ಪಿಸಿದರು. ಇದರೊಂದಿಗೆ ಹ್ಯಾರಿ ಬ್ರೂಕ್ (27*) ಜೊತೆಗೆ 4ನೇ ವಿಕೆಟ್‌ಗೆ ಕಟ್ಟಿದ್ದ 74 ರನ್‌ಗಳ ಜೊತೆಯಾಟವೂ ಕೊನೆಗೊಂಡಿತು.
ಕ್ಲಾಸೆನ್ ಅವರ ಆಟದಿಂದ ಹೈದರಾಬಾದ್ ತಂಡ 200 ರನ್ ಗಡಿ ಮುಟ್ಟಬಹುದೆಂದು ಎಲ್ಲರೂ ಭಾವಿಸಿದ್ದರು. ಆದರೆ ಇನಿಂಗ್ಸ್ ಕೊನೆಯ ಓವರ್ ಎಸೆದ ವೇಗಿ ಮೊಹಮ್ಮದ್ ಸಿರಾಜ್ ಕೇವಲ 4 ರನ್ ನೀಡಿದ ಪರಿಣಾಮ ಹೈದರಾಬಾದ್ ನಿರೀಕ್ಷಿತ ಗುರಿ ಮುಟ್ಟಲು ವಿಫಲಗೊಂಡಿತು. ಆರ್‌ಸಿಬಿ ಪರ ಮೈಕೆಲ್ ಬ್ರೇಸ್‌ವೆಲ್ 2 ವಿಕೆಟ್ ಪಡೆದರೆ, ಸಿರಾಜ್, ಶಹಬಾಜ್ ಮತ್ತು ಹರ್ಷಲ್ ತಲಾ 1 ವಿಕೆಟ್ ಗಳಿಸಿದರು.
ಆರ್‌ಸಿಬಿ ಪ್ಲೇಆಫ್ ಲೆಕ್ಕಾಚಾರ ಹೇಗೆ?
ಪ್ಲೇ ಆಫ್ ಹಂತಕ್ಕೆ ಗುಜರಾತ್ ತಂಡ ಈಗಾಗಲೇ ಅರ್ಹತೆ ಹೊಂದಿರುವ ಕಾರಣ ಉಳಿದ 3 ಸ್ಥಾನಗಳಿಗಾಗಿ, ಚೆನ್ನೈ ಸೂಪರ್‌ ಕಿಂಗ್ಸ್‌, ಲಖನೌ ಸೂಪರ್‌ ಜಯಂಟ್ಸ್‌, ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಬೆಂಗಳೂರು ಮತ್ತು ಮುಂಬೈ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿದೆ. 14 ಅಂಕ ಹೊಂದಿರುವ ಮುಂಬೈ ತನ್ನ ಕೊನೇ ಲೀಗ್ ಪಂದ್ಯದಲ್ಲಿ ಸೋತರೆ, ಬೆಂಗಳೂರು ತಂಡ ಒಂದು ವೇಳೆ ತನ್ನ ಅಂತಿಮ ಪಂದ್ಯದಲ್ಲಿ ಸೋತರೂ ಉತ್ತಮ ರನ್‌ರೇಟ್ ಆಧಾರದ ಮೇಲೆ ಪ್ಲೇ-ಆಫ್‌ಗೆ ಅರ್ಹತೆ ಗಳಿಸುವ ಅವಕಾಶ ಹೊಂದಿದೆ. ಮುಂಬೈ ಗೆದ್ದರೆ, ಆರ್‌ಸಿಬಿಯು ತನ್ನ ಕೊನೇ ಪಂದ್ಯದಲ್ಲಿ ಗೆಲ್ಲಬೇಕು. ಆಗ ತಲಾ 16 ಅಂಕ ಪಡೆಯುವ ಮುಂಬೈ ಮತ್ತು ಆರ್‌ಸಿಬಿ ಎರಡೂ ತಂಡಗಳು ಮುಂದಿನ ಹಂತಕ್ಕೆ ಸುಲಭವಾಗಿ ಕಾಲಿಡಲಿವೆ.
