ಬ್ಯಾಂಕಾಕ್: ಮಗುವಿಗೆ ತಂದೆ ಮತ್ತು ತಾಯಿ ಇಬ್ಬರೂ ಬೇಕು ಎಂದು ನಮ್ಮ ಸಮಾಜ ನಂಬಿರುವುದರಿಂದ, ಒಂಟಿ ಅಪ್ಪಂದಿರು ಹೆಚ್ಚು ‘ತಾಯಿ’ಯಾಗಲು ಪ್ರಯತ್ನಿಸುತ್ತಾರೆ. ಹಾಗೆಯೇ ಒಂಟಿ ತಾಯಂದಿರು ತಮ್ಮ ಮಗುವಿಗೆ ಎರಡೂ ಪ್ರಪಂಚದ ಅತ್ಯುತ್ತಮತೆಯನ್ನು ನೀಡಲು ಕೆಲವು ರೀತಿಯಲ್ಲಿ ಹೆಚ್ಚು ‘ತಂದೆ’ಯಾಗಲು ಪ್ರಯತ್ನಿಸುತ್ತಾರೆ. ಅಂತೆಯೇ ಇದೀಗ ಥೈಲ್ಯಾಂಡ್‍ನಲ್ಲಿ ಕಣ್ಣೀರು ತರಿಸುವಂತಹ ಘಟನೆಯೊಂದು ನಡೆದಿದೆ
ಹೌದು. ತಂದೆಯೊಬ್ಬ ‘ತಾಯಂದಿರ ದಿನ’ ದಂದು (Mothers Day) ತನ್ನ ಮಗಳನ್ನು ಸಂತೈಸುವ ಸಲುವಾಗಿ ತಾಯಿಯಂತೆ ಡ್ರೆಸ್ ಮಾಡಿ ಶಾಲೆಗೆ ಬರುವ ಮೂಲಕ ಎಲ್ಲರ ಹುಬ್ಬೇರಿಸುವಂತೆ ಮಾಡಿದ್ದಾರೆ. ಸದ್ಯ ತಂದೆ ಹಾಗೂ ಮಗಳ ವೀಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದ್ದು, ವೀಡಿಯೋ ನೋಡಿ ನೆಟ್ಟಿಗರು ಕೂಡ ಒಂದು ಬಾರಿ ಮೌನಕ್ಕೆ ಶರಣಾಗುತ್ತಾರೆ.
ಏನಿದು ಘಟನೆ..?: 48 ವರ್ಷದ ಪ್ರಚಯ ತದೀಬು ಮಹಿಳೆಯಂತೆ ಬಂದಿರುವ ಸಿಂಗಲ್ ಪೇರೆಂಟ್. ಇವರು ಮದರ್ಸ್ ಡೇ ಅಂದು ಮಗಳ ಶಾಲೆಯಲ್ಲಿ ಕಾರ್ಯಕ್ರಮವನ್ನು ಇಟ್ಟುಕೊಂಡಿದ್ದರು. ಈ ಹಿನ್ನೆಲೆಯಲ್ಲಿ ಮಗಳಿಗೆ ತಾಯಿಯ ಪ್ರೀತಿಯೂ ಸಿಗಬೇಕು ಎನ್ನು ನಿಟ್ಟಿನಲ್ಲಿ ಅಮ್ಮನ ಧಿರಿಸಿನಲ್ಲಿ ಆಗಮಿಸಿದ್ದಾರೆ. ಮಹಿಳೆಯಂತೆ ಕಾಣಿಸಿಕೊಳ್ಳಲು ಬಟ್ಟೆ, ಉದ್ದನೆಯ ಕೂದಲು ಹಾಗೂ ವಿಗ್ ಧರಿಸಿದ್ದರು. ಶಾಲೆಗೆ ಬಂದ ತದೀಬು, ತನ್ನ ಮಗಳ ಪಕ್ಕ ಬಂದು ಕುಳಿತಿದ್ದಾರೆ. ಈ ವೇಳೆ ತಂದೆಯನ್ನು ಕಂಡು ಅಚ್ಚರಿಗೊಳಗಾದ ಮಗಳು ಕಾಲಿಗೆ ಬಿದ್ದು, ಅಪ್ಪನನ್ನು ತಬ್ಬಿಕೊಂಡು ಕಣ್ಣೀರು ಹಾಕಿದ್ದಾಳೆ.
ಈ ಎಲ್ಲಾ ದೃಶ್ಯವು ಮೊಬೈಲ್‍ನಲ್ಲಿ ಸೆರೆಯಾಗಿದ್ದು, ಸದ್ಯ ಈ ವೀಡಿಯೋವನ್ನು ತದೀಬು ಅವರು ತಮ್ಮ ಸೋಶಿಯಲ್ ಮೀಡಿಯಾ ಅಕೌಂಟ್‍ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಅಲ್ಲದೆ ಇಂದು ತಾಯಂದಿರ ದಿವಗಿದ್ದು, ಹೀಗಾಗಿ ನಾನು ನಿನಗಾಗಿ `ತಾಯಿ’ಯಾಗಬಲ್ಲೆ ಎಂದು ಬರೆದುಕೊಂಡಿದ್ದಾರೆ. ತದೀಬು ಅವರು ವೀಡಿಯೋ ಹಂಚಿಕೊಳ್ಳುತ್ತಿದ್ದಂತೆಯೇ ಇದು ಸಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದೆ. ಅಲ್ಲದೆ ತಂದೆ-ಮಗಳ ಬಾಂಧವ್ಯಕ್ಕೆ ಹಾಗೂ ಮಗಳಿಗೆ ತಾಯಿಯ ಸ್ಥಾನವನ್ನೂ ಕೂಡ ತುಂಬುತ್ತಿರುವ ತಂದೆಗೆ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ.
