‘ಬಿಗ್ ಬಾಸ್ ಒಟಿಟಿ ಸೀಸನ್ 3’ ಆರಂಭವಾಗಿ ಕೆಲ ದಿನ ಕಳೆದಿದೆ. ಬಿಗ್ ಬಾಸ್ ಮನೆಗೆ ಖ್ಯಾತ ಯುಟ್ಯೂಬರ್ ಅರ್ಮಾನ್ ಮಲಿಕ್ ತಮ್ಮಿಬ್ಬರು ಹೆಂಡತಿಯ ಜೊತೆಗೆ ಹೋಗಿದ್ದಾರೆ. ಇದನ್ನು ನೋಡಿ ಖ್ಯಾತ ನಟಿ ಡೆವೊಲಿನಾ ಭಟ್ಟಾಚಾರ್ಜಿ ಅವರು ಸೋಶಿಯಲ್ ಮೀಡಿಯಾದಲ್ಲಿ ಆಕ್ರೋಶ ಹೊರಹಾಕಿದ್ದಾರೆ.
ಅರ್ಮಾನ್ ಮಲಿಕ್ ಗೆ ಈಗಾಗಲೇ ಮೂರು ಮದುವೆಯಾಗಿದೆ. ಮೊದಲ ಪತ್ನಿಗೆ ವಿಚ್ಛೇದನ ಕೊಟ್ಟ ಬಳಿಕ ಮತ್ತೆರಡು ಮದುವೆಯಾದರು. ಈಗ ಅವರು ಒಂದೇ ಮನೆಯಲ್ಲಿ ಇಬ್ಬರು ಪತ್ನಿಯರ ಜೊತೆಗೆ ಇದ್ದಾರೆ. ಈ ಇಬ್ಬರು ಪತ್ನಿಯರಿಗೆ ಇಬ್ಬಿಬ್ಬರು ಮಕ್ಕಳಿದ್ದಾರೆ. ಈಗ ಅವರು ಎರಡನೇ ಪತ್ನಿ ಪಾಯಲ್, ಮೂರನೇ ಪತ್ನಿ ಕೃತಿಕಾ ಜೊತೆಗೆ ‘ಬಿಗ್ ಬಾಸ್ ಒಟಿಟಿ ಸೀಸನ್ 3’ ಮನೆಗೆ ಸ್ಪರ್ಧಿಯಾಗಿ ಎಂಟ್ರಿಕೊಟ್ಟಿದ್ದಾರೆ. ಇದು ಸಾಕಷ್ಟು ಟೀಕೆಗೆ ಕಾರಣವಾಗಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರೋ ಖ್ಯಾತ ನಟಿ ಡೆವೊಲಿನಾ ಭಟ್ಟಾಚಾರ್ಜಿ, ಇದು ಮನರಂಜನೆ ಅಂತ ನಿಮಗೆ ಅನಿಸತ್ತಾ? ಇದು ಮನರಂಜನೆ ಅಲ್ಲವೇ ಅಲ್ಲ, ಇದೊಂದು ನಂಬಿಕೆ. ಇದು ರೀಲ್ ಅಂತ ಲೈಟ್ ಆಗಿ ತಗೋಬೇಡಿ, ರಿಯಲ್. ನಾಚಿಕೆ ಆಗದಿರುವಂತಹ ಮನರಂಜನೆ ಅಂತ ಹೇಗೆ ಕರೆಯುತ್ತಾರೆ ಅಂತ ಅರ್ಥ ಆಗ್ತಿಲ್ಲ. ನನಗೆ ಇದನ್ನು ಕೇಳಿಯೇ ಅಸಹ್ಯವಾಗ್ತಿದೆ. 6-7 ದಿನಗಳಲ್ಲಿ ಲವ್ ಆಯ್ತು, ಮದುವೆ ಆಯ್ತು, ಆಮೇಲೆ ಮತ್ತೆ ಹೆಂಡ್ತಿ ಗೆಳತಿಯ ಜೊತೆಯೂ ಲವ್ ಆಯ್ತು, ಮದುವೆ ಆಯ್ತು ಅಂದ್ರೆ ಹೇಗೆ?
ಇವರು ಮೂವರು ನಾಚಿಕೆ ಬಿಟ್ಟವರು. ಮಕ್ಕಳ ಬಗ್ಗೆಯೂ ಇವರಿಗೆ ಯೋಚನೆ ಇಲ್ಲ. ಇವರೆಲ್ಲ ಈಗ ಬಿಗ್ ಬಾಸ್ ಒಟಿಟಿ ಸೀಸನ್ 3ಯಲ್ಲಿದ್ದಾರೆ. ಸ್ವಲ್ಪವೂ ಸೂಕ್ಷ್ಮತೆ ಇಲ್ಲದ ಆ ಮಹಿಳೆಯರು, ನಾಚಿಕೆ ಬಿಟ್ಟ ಆ ವ್ಯಕ್ತಿ ನೋಡಲು ಕಷ್ಟವಾಗ್ತಿದೆ.
“ಬಿಗ್ ಬಾಸ್, ನಿಮಗೆ ಏನಾಗಿದೆ? ನಿಮಗೆ ಇಷ್ಟು ಕೆಟ್ಟ ದಿನ ಬಂದಿದ್ಯಾ? ಬಹುಪತ್ನಿತ್ವವು ಮನರಂಜನೆ ವಿಚಾರವೇ? ಈ ಥರ ಸ್ಪರ್ಧಿಗಳನ್ನು ಬಿಗ್ ಬಾಸ್ ಮೂಲಕ ಪರಿಚಯಿಸುತ್ತಿರುವುದು ಮನರಂಜನೆಯ ವಿಚಾರವೇ? ಚಿಕ್ಕ ಮಕ್ಕಳಿಂದ ವೃದ್ಧರವರೆಗೆ ಈ ಶೋವನ್ನು ನೋಡುತ್ತಾರೆ. ಹೊಸ ಪೀಳಿಗೆಗೆ ಏನು ಹೇಳಿಕೊಡುತ್ತಿದ್ದೀರಿ? 2-3-4 ಅಂತ ಮದುವೆ ಆಗಬಹುದಾ? ಮದುವೆಯಾದವರೆಲ್ಲರೂ ಒಟ್ಟಾಗಿ ಚೆನ್ನಾಗಿ ಇರಬಹುದೇ? ಬಹುಪತ್ನಿತ್ವ ಹೊಂದಿದ ಕುಟುಂಬಕ್ಕೆ ಭೇಟಿ ನೀಡಿ, ಅವರು ಎಷ್ಟು ಕಣ್ಣೀರಿನಿಂದ ಕೈತೊಳೆಯುತ್ತಾರೆ ಅಂತ ನೋಡಿ..
ಇದೇ ಕಾರಣಕ್ಕೆ ವಿಶೇಷ ವಿವಾಹ ಕಾಯಿದೆ ಬೇಕು ಅಂತ ಹೇಳೋದು. ಇದರಿಂದ ಎಲ್ಲರಿಗೂ ಒಂದೇ ರೀತಿಯ ಕಾನೂನು ಇದ್ದು ಸಮಾಜ ಕೂಡ ಆರೋಗ್ಯಕರ ವಾತಾವರಣದಿಂದ ಇರಬಹುದು. ಪತ್ನಿ ಎರಡು ಗಂಡನನ್ನು ಇಟ್ಟುಕೊಂಡರೆ ಅದು ಮನರಂಜನೆ ಆಗತ್ತಾ?
ಸ್ಪರ್ಧಿಗಳ ಬಗ್ಗೆಯಾಗಲೀ, ಬಿಗ್ ಬಾಸ್ ನೋಡುವವರು ಯಾರು ಅಂತ ನನಗೆ ಅರ್ಥ ಆಗ್ತಿಲ್ಲ. ಯಾವ ಕಾರಣಕ್ಕೆ ವೀಕ್ಷಕರು ಈ ಶೋವನ್ನು ನೋಡಬೇಕು? ಬಿಗ್ ಬಾಸ್ ಶೋನಲ್ಲಿ ಇವರು ಇರೋದು ನಿಮಗೆ ಸರಿ ಅನಿಸತ್ತಾ? ಇದು ನಾಚಿಕೆಗೇಡಿತನ ಅಂತ ನಿಮಗೆ ಅನಿಸಿಲ್ಲ ಅಂದ್ರೆ ನಿಮ್ಮ ಬದುಕು ವೇಸ್ಟ್ ಅಂತ ಅಂದುಕೊಳ್ಳಿ. 2-3 ಮದುವೆಯಾಗೋದು ಅಗತ್ಯ ಅಂದ್ರೆ ಮಾಡಿಕೊಂಡು ಮನೆಯಲ್ಲಿರಿ. ಆದರೆ ಇದನ್ನು ಇಡೀ ಜಗತ್ತಿನದಾದ್ಯಂತ ಹರಡಬೇಡಿ ಎಂದು ಆಕ್ರೋಶ ಹೊರ ಹಾಕಿದ್ದಾರೆ.
ಅರ್ಮಾನ್ ಮಲಿಕ್ ಅವರು ಪಾಯಲ್ ಅವರನ್ನು ನೋಡಿ 7 ದಿನದೊಳಗಡೆ ಲವ್ ಮಾಡಿ ಮದುವೆಯೂ ಆದರಂತೆ. ಇವರಿಗೆ ಮಗ ಹುಟ್ಟಿದ್ದನು. ಪಾಯಲ್ ಗೆಳತಿ ಕೃತಿಕಾ ಅವರು ಟ್ರಿಪ್ ಪ್ಲ್ಯಾನ್ ಮಾಡಿದ್ದರು. ಆ ಟ್ರಿಪ್ ಕ್ಯಾನ್ಸಲ್ ಆಯ್ತು. ಟ್ರಿಪ್ ಸಲುವಾಗಿ ಅರ್ಮಾನ್ ಮನೆಗೆ ಕೃತಿಕಾ ಬಂದಿದ್ದರು. ಆ ವೇಳೆ ಪಾಯಲ್ ಅವರು ಯಾವುದೋ ಕೆಲಸದಿಂದ ಮನೆಯಿಂದ ಹೊರಗಡೆ ಹೋಗಿದ್ದರು. ಆ 7 ದಿನಗಳೊಳಕಡೆ ಕೃತಿಕಾ-ಅರ್ಮಾನ್ ಪ್ರೀತಿಸಿ ಮದುವೆಯಾದರು. ಈ ಮದುವೆ ಪಾಯಲ್‌ಗೆ ಶಾಕ್ ತಂದಿತ್ತು. 1 ವರ್ಷ ಪಾಯಲ್ ಅರ್ಮಾನ್ ಅವರಿಂದ ದೂರ ಇದ್ದರು. ಆಮೇಲೆ ಅವರು ಗಂಡನ ಬಳಿ ಬಂದರು. 2022ರಲ್ಲಿ ಪಾಯಲ್, ಕೃತಿಕಾ ಇಬ್ಬರೂ ಏಕಕಾಲಕ್ಕೆ ಗರ್ಭಿಯಾದರು. ಸದ್ಯ ಈ ಮೂವರೆ ಬಿಗ್ ಬಾಸ್ ಮನೆಯಲ್ಲಿದ್ದಾರೆ.
