ಚೆನ್ನೈ : ಎಂಎಸ್‌ ಧೋನಿ ಸಾರಥ್ಯದ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡ 10ನೇ ಬಾರಿ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಫೈನಲ್‌ ತಲುಪುವ ಮೂಲಕ ಇತಿಹಾಸ ನಿರ್ಮಿಸಿದೆ. ಐಪಿಎಲ್ 2023 ಟೂರ್ನಿಯ ಕ್ವಾಲಿಫೈಯರ್ 1 ಪಂದ್ಯದಲ್ಲಿ ಭರ್ಜರಿ ಆಟವಾಡಿದ ಸಿಎಸ್‌ಕೆ ಅಂಕಪಟ್ಟಿಯ ಅಗ್ರಸ್ಥಾನಿ ಗುಜರಾತ್ ಟೈಟನ್ಸ್ ತಂಡವನ್ನು 15 ರನ್‌ಗಳಿಂದ ಮಣಿಸಿ ಫೈನಲ್‌ಗೆ ದಾಪುಗಾಲಿಟ್ಟಿತು. ಸೋಲುಂಡ ಹಾರ್ದಿಕ್ ಪಾಂಡ್ಯ ಪಡೆ, ಇದೀಗ ಫೈನಲ್‌ಗೆ ಅರ್ಹತೆ ಪಡೆಯಲು ಕ್ವಾಲಿಫೈಯರ್ 2 ಪಂದ್ಯದಲ್ಲಿ ಪೈಪೋಟಿ ನಡೆಸಲಿದೆ.
ಮುಗ್ಗರಿಸಿದ ಗುಜರಾತ್ ಟೈಟನ್ಸ್
ಕಳೆದ ಪಂದ್ಯದಲ್ಲಿ ಆರ್‌ಸಿಬಿ ಎದುರು ರನ್‌ಚೇಸ್‌ನಲ್ಲಿ ಅಬ್ಬರಿಸಿದ್ದ ಗುಜರಾತ್ ಟೈಟನ್ಸ್, ಕ್ವಾಲಿಫೈಯರ್ ಕದನದಲ್ಲಿ ಸಿಎಸ್‌ಕೆ ಎದುರು ಚೇಸಿಂಗ್‌ ಆಯ್ಕೆ ಮಾಡಿ ಮುಗ್ಗರಿಸಿತು. ಗೆಲ್ಲಲು 173 ರನ್‌ಗಳ ಸವಾಲಿನ ಗುರಿ ಬೆನ್ನತ್ತಿದ್ದ ಟೈಟನ್ಸ್, ತನ್ನ 20 ಓವರ್‌ಗಳಲ್ಲಿ 157 ರನ್ ಕಲೆಹಾಕಲಷ್ಟೇ ಶಕ್ತವಾಗಿ ಸೋಲಿಗೆ ಶರಣಾಯಿತು.
ಸಿಎಸ್‌ಕೆ ಭರ್ಜರಿ ಬೌಲಿಂಗ್‌
ಮನೆಯಂಗಣದ ಪಿಚ್‌ಗೆ ಸೂಕ್ತ ರಣತಂತ್ರ ಹೆಣೆದು ಬೌಲಿಂಗ್‌ ಮಾಡಿದ ಸೂಪರ್‌ ಕಿಂಗ್ಸ್‌ ಎದುರಾಳಿ ಬ್ಯಾಟರ್‌ಗಳ ಅಬ್ಬರಕ್ಕೆ ಬ್ರೇಕ್ ಹಾಕಿತು. ರಶೀದ್‌ ಖಾನ್‌ (30) ಮತ್ತು ಶುಭಮನ್ ಗಿಲ್ (42) ಹೋರಾಟದ ಬ್ಯಾಟಿಂಗ್‌ ನಡೆಸಿದರೂ ತಂಡವನ್ನು ಜಯದ ದಡ ಮುಟ್ಟಿಸಲು ಸಾಧ್ಯವಾಗಲಿಲ್ಲ. ಸಿಎಸ್‌ಕೆ ಪರ ದೀಪಕ್ ಚಹರ್‌, ಮತೀಶ ಪತಿರಣ, ಮಹೇಶ್‌ ತೀಕ್ಷಣ ಮತ್ತು ರವೀಂದ್ರ ಜಡೇಜಾ ತಲಾ 2 ವಿಕೆಟ್‌ ಪಡೆಯುವ ಮೂಲಕ ಸಿಎಸ್‌ಕೆ ಗೆಲುವಿನ ರೂವಾರಿಗಳೆನಿಸಿದರು. ಕಠಿಣ ಪಿಚ್‌ನಲ್ಲಿ ಫಿಫ್ಟಿ ಬಾರಿಸಿದ ಋತುರಾಜ್ ಗಾಯಕ್ವಾಡ್‌ಗೆ ಪಂದ್ಯಶ್ರೇಷ್ಠ ಗೌರವ ಒಲಿಯಿತು.
ಗಾಯಕ್ವಾಡ್‌ ಫಿಫ್ಟಿ, ಸಿಎಸ್‌ಕೆ ಸವಾಲಿನ ಮೊತ್ತ
ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಚೆನ್ನೈ ಸೂಪರ್‌ ಕಿಂಗ್ಸ್‌ ಸ್ಪೋಟಕ ಆರಂಭ ಪಡೆಯಿತು. ಮೊದಲ ವಿಕೆಟ್‌ಗೆ ಆರಂಭಿಕರಾದ ಋತುರಾಜ್ ಗಾಯಕ್ವಾಡ್‌ ಮತ್ತು ಡೆವೋನ್‌ ಕಾನ್ವೇ 87 ರನ್‌ಗಳ ಜೊತೆಯಾಟವನ್ನಾಡಿದರು. ಬಿರುಸಿನ ಆಟವಾಡಿದ ಗಾಯಕ್ವಾಡ್‌ 44 ಎಸೆತಗಳಲ್ಲಿ 7 ಫೋರ್‌ ಮತ್ತು 1 ಸಿಕ್ಸರ್‌ ನೆರವಿನಿಂದ 60 ರನ್‌ಗಳ ಕೊಡುಗೆ ಕೊಟ್ಟರು. ಇನ್‌ಫಾರ್ಮ್ ಬ್ಯಾಟರ್‌ ಕಾನ್ವೇ 34 ಎಸೆತಗಳಲ್ಲಿ 40 ರನ್ ಬಾರಿಸಿ ಔಟಾದರು. ಇನಿಂಗ್ಸ್‌ ಅಂತ್ಯದ ಓವರ್‌ಗಳಲ್ಲಿ ಸಿಡಿಯಲು ವಿಫಲವಾದ ಸಿಎಸ್‌ಕೆ 172/7 ರನ್‌ಗಳ ಸವಾಲಿನ ಮೊತ್ತಕ್ಕೆ ತೃಪ್ತಿ ಪಟ್ಟಿತು. ಟೈಟನ್ಸ್ ಪರ ಅನುಭವಿ ವೇಗಿಗಳಾದ ಮೊಹಮ್ಮದ್‌ ಶಮಿ ಮತ್ತು ಮೋಹಿತ್‌ ಶರ್ಮಾ ತಲಾ 2 ವಿಕೆಟ್‌ ಪಡೆದು ಗಮನ ಸೆಳೆದರು.
ಚೆನ್ನೈ ಸೂಪರ್‌ ಕಿಂಗ್ಸ್‌: 20 ಓವರ್‌ಗಳಲ್ಲಿ 7 ವಿಕೆಟ್‌ ನಷ್ಟಕ್ಕೆ 172 ರನ್ (ಋತುರಾಜ್ ಗಾಯಕ್ವಾಡ್‌ 60, ಡೆವೋನ್‌ ಕಾನ್ವೇ 40, ರವೀಂದ್ರ ಜಡೇಜಾ 22; ಮೊಹಮ್ಮದ್‌ ಶಮಿ 28ಕ್ಕೆ 2, ಮೋಹಿತ್‌ ಶರ್ಮಾ 31ಕ್ಕೆ 2).
ಗುಜರಾತ್ ಟೈಟನ್ಸ್: 20 ಓವರ್‌ಗಳಲ್ಲಿ 157ಕ್ಕೆ ಆಲ್‌ಔಟ್‌ (ಶುಭಮನ್ ಗಿಲ್ 42, ದಸುನ್ ಶನಕ 17, ರಶೀದ್‌ ಖಾನ್‌ 30; ದೀಪಕ್ ಚಹರ್‌ 29ಕ್ಕೆ 2, ರವೀಂದ್ರ ಜಡೇಜಾ 18ಕ್ಕೆ 2, ಮಹೇಶ್‌ ತೀಕ್ಷಣ 28ಕ್ಕೆ 2, ಮತೀಶ ಪತಿರಣ 37ಕ್ಕೆ 2).
ಪಂದ್ಯಶ್ರೇಷ್ಠ: ಋತುರಾಜ್ ಗಾಯಕ್ವಾಡ್‌
ಚೇಸಿಂಗ್‌ ಆಯ್ಕೆ ಮಾಡಿದ ಟೈಟನ್ಸ್
ದಾಖಲೆಯ 12ನೇ ಬಾರಿ ನಾಕ್‌ಔಟ್‌ ಹಂತಕ್ಕೆ ಮುನ್ನಡೆದಿರುವ ಎಂಎಸ್‌ ಧೋನಿ ಸಾರಥ್ಯದ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡ, ಐಪಿಎಲ್ 2023 ಟೂರ್ನಿಯ ಕ್ವಾಳಿಫೈಯರ್‌ 1 ಪಂದ್ಯದಲ್ಲಿ ಅಂಕಪಟ್ಟಿಯ ಅಗ್ರಸ್ಥಾನಿ ಗುಜರಾತ್ ಟೈಟನ್ಸ್ ಎದುರು ಪೈಪೋಟಿ ನಡೆಸಲಿದೆ. ಈ ಹೈ ವೋಲ್ಟೇ ಪಂದ್ಯದಲ್ಲಿ ಟಾಸ್‌ ಗೆದ್ದ ಜಿ.ಟಿ ತಂಡದ ನಾಯಕ ಹಾರ್ದಿಕ್ ಪಾಂಡ್ಯ, ಆತಿಥೇಯ ಸಿಎಸ್‌ಕೆ ತಂಡವನ್ನು ಮೊದಲು ಬ್ಯಾಟ್‌ ಮಾಡುವಂತೆ ಆಹ್ವಾನಿಸಿದರು.
ಹೆಚ್ಚುವರಿ ಸ್ಪಿನ್ನರ್‌ ತೆಗೆದುಕೊಂಡ ಪಾಂಡ್ಯ
ಹೈ ವೋಲ್ಟೇಜ್ ಪಂದ್ಯಕ್ಕೆ ಗುಜರಾತ್ ಟೈಟನ್ಸ್ ಹೆಚ್ಚುವರಿ ಸ್ಪಿನ್ನರ್‌ನ ಆಯ್ಕೆ ಮಾಡಿಕೊಂಡಿದೆ. ಚೆಪಾಕ್‌ನ ಪಿಚ್ ಸ್ಪಿನ್ನರ್‌ಗಳಿಗೆ ನೆರವಾಗುತ್ತದೆ. ಇದನ್ನು ಮನಗಂಡ ಜಿ.ಟಿ ನಾಯಕ ಹಾರ್ದಿಕ್ ಪಾಂಡ್ಯ, ಎಡಗೈ ವೇಗಿ ಯಶ್ ದಯಾಳ್ ಅವರನ್ನು ಕೈಬಿಟ್ಟು ಅವರ ಜಾಗದಲ್ಲಿ ಯುವ ಸ್ಪಿನ್ನರ್‌ ದರ್ಶನ್‌ ನಾಲ್ಕಂಡೆ ಅವರನ್ನು ಆಡಿಸಿದ್ದಾರೆ.
