ಟಾಲಿವುಡ್ ಬ್ಯೂಟಿ ನಟಿ ಸಮಂತಾ ಸದ್ಯ ದೊಡ್ಡ ಸ್ಟಾರ್ ನಟಿಯಾಗಿ ಮಿಂಚುತ್ತಿದ್ದಾರೆ. ಬ್ಯಾಕ್ ಟು ಬ್ಯಾಕ್ ಹಿಟ್ ಸಿನಿಮಾಗಳಲ್ಲಿ ನಟಿಸುತ್ತಿರುವ ಬ್ಯೂಟಿ ಇದೀಗ ಬಾಲಿವುಡ್ ಗೂ ಎಂಟ್ರಿಕೊಟ್ಟಿದ್ದಾರೆ. ಹತ್ತು ವರ್ಷಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಕಳೆದಿರುವ ಸಮಂತಾ, ಈಗಲೂ ಬೇಡಿಕೆಯ ನಾಯಕ ನಟಿಯಾಗಿದ್ದಾರೆ.
2010 ರಲ್ಲಿ ಏ ಮಾಯ ಚೇಸಾವೆ ಹೆಸರಿನ ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ್ಕಾಲಿಟ್ಟ ಸಮಂತಾ, ಆ ಬಳಿಕ ತಿರುಗಿ ನೋಡಿದ್ದೇ ಇಲ್ಲ. ಏ ಮಾಯ ಚೇಸಾವೆ ಸಿನಿಮಾದಲ್ಲಿ ನಟಿಸುವ ಮುನ್ನ ಸಮಂತಾ ಕೆಲವು ಸಿನಿಮಾಗಳಿಗೆ ಆಡಿಷನ್ ನೀಡಿದ್ದರು. ಅವರ ಮೊದಲ ಆಡಿಷನ್ ತೆಗೆದುಕೊಂಡಿದ್ದ ನಿರ್ದೇಶಕ ಶಿವ ನಾಗೇಶ್ವರ ರಾವ್ ಅಂದು ಸಮಂತಾ ಹೇಗಿದ್ದರು? ತಮ್ಮ ಸಿನಿಮಾಕ್ಕೆ ಸಮಂತಾ ಏಕೆ ಸೆಲೆಕ್ಟ್ ಆಗಲಿಲ್ಲ ಎಂಬ ಕುರಿತು ಮಾತನಾಡಿದ್ದಾರೆ.
2009 ರಲ್ಲಿ ನಿರ್ದೇಶಕ ಶಿವ ನಾಗೇಶ್ವರ್ ರಾವ್ ಅವರು ನಿನ್ನು ಕಲಿಸಾಕ ಹೆಸರಿನ ಸಿನಿಮಾ ನಿರ್ದೇಶನ ಮಾಡಲಿದ್ದರು. ಆ ಸಿನಿಮಾಕ್ಕಾಗಿ ಹೊಸ ನಾಯಕಿಯರನ್ನು ಹುಡುಕುವಾಗ ಚೆನ್ನೈನಲ್ಲಿ ಕಾಲೇಜು ವ್ಯಾಸಾಂಗ ಮಾಡುತ್ತಿದ್ದ ಸಮಂತಾ ಹೈದರಾಬಾದ್ಗೆ ಬಂದು ಆಡಿಷನ್ ಕೊಟ್ಟಿದ್ದರಂತೆ. ಆಡಿಷನ್ ಮುಗಿದ ಮೇಲೆ ಸಮಂತಾರನ್ನು ಒಂದು ದಿನದ ಮಟ್ಟಿಗೆ ಹೈದರಾಬಾದ್ನಲ್ಲಿಯೇ ಉಳಿಯಲು ಶಿವ ನಾಗೇಶ್ವರ ರಾವ್ ಹೇಳಿದರಂತೆ. ಆದರೆ ಸಮಂತಾ ಅದಕ್ಕೆ ಒಪ್ಪದೆ ಇಂದೇ ಚೆನ್ನೈಗೆ ಮರಳಬೇಕು ಎಂದು ಹಠ ಮಾಡಿದರಂತೆ.
ಒಂದೇ ದಿನಕ್ಕೆ ವಿಮಾನದ ಟಿಕೆಟ್ ಬುಕ್ ಮಾಡುವುದು ಬಹಳ ದುಬಾರಿ ಆಗುತ್ತಿತ್ತು, ಹಾಗಾಗಿ ನಾವು ಇಂದು ಒಂದು ರಾತ್ರಿ ಇಲ್ಲಿಯೇ ತಂಗಿದ್ದು ನಾಳೆ ಸಂಜೆಯ ಫ್ಲೈಟ್ಗೆ ಹೋಗಿ ಎಂದು ಮನವಿ ಮಾಡಿದೆವು ಆದರೆ ಸಮಂತಾ ಒಪ್ಪಲಿಲ್ಲ, ಕೊನೆಗೆ ನಮ್ಮ ತಂಡದವರು ಸಮಂತಾಗಾಗಿ ದುಬಾರಿ ಬೆಲೆಯ ಟಿಕೆಟ್ ಬುಕ್ ಮಾಡಿ ಅವರನ್ನು ಚೆನ್ನೈಗೆ ಕಳಿಸಿಕೊಟ್ಟರು ಎಂದು ಶಿವ ನಾಗೇಶ್ವರ ರಾವ್ ಹೇಳಿದ್ದಾರೆ.
ಸಮಂತಾ ಚೆನ್ನಾಗಿ ಆಡಿಷನ್ ನೀಡಿದ್ದರು. ಆದರೆ ಸಮಂತಾ ಕೇಳಿದ ಸಂಭಾವನೆ ಬಹಳ ಹೆಚ್ಚಾಗಿತ್ತು, ಅವರು ಕೇಳಿದಷ್ಟು ಸಂಭಾವನೆ ಕೊಟ್ಟರೆ ಸಿನಿಮಾದ ಬಜೆಟ್ ಹೆಚ್ಚಾಗುವ ಅಪಾಯ ಇತ್ತು ಹಾಗಾಗಿ ಸಮಂತಾರನ್ನು ಕೈಬಿಟ್ಟು ಬೇರೆ ನಟಿಯರನ್ನು ಆಯ್ಕೆ ಮಾಡಿಕೊಳ್ಳಬೇಕಾಯಿತು ಎಂದು ತಮ್ಮ ಸಿನಿಮಾಗೆ ಸಮಂತಾರನ್ನು ಯಾಕೆ ಆಯ್ಕೆ ಮಾಡಲಿಲ್ಲ ಎಂಬುದನ್ನು ಶಿವ ನಾಗೇಶ್ವರ ರಾವ್ ಹೇಳಿದ್ದಾರೆ.
ಇತ್ತೀಚೆಗೆ ಸಮಂತಾ ನಟನೆಯ ಶಾಕುಂತಲಂ ಸಿನಿಮಾ ಬಿಡುಗಡೆ ಆಗಿದ್ದು ಹೇಳಿಕೊಳ್ಳುವ ಮಟ್ಟಿಗೆ ಸಕ್ಸಸ್ ಕಂಡಿಲ್ಲ. ಇದೀಗ ಹಿಂದಿಯ ಸಿಟಾಡೆಲ್ ವೆಬ್ ಸರಣಿಯಲ್ಲಿ ವರುಣ್ ಧವನ್ ಜೊತೆ ನಟಿಸುತ್ತಿದ್ದಾರೆ. ಜೊತೆಗೆ ತೆಲುಗಿನಲ್ಲಿ ವಿಜಯ್ ದೇವರಕೊಂಡ ಜೊತೆ ಖುಷಿ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಅರೇಂಜ್ ಮೆಂಟ್ಸ್ ಆಫ್ ಲವ್ ಇಂಗ್ಲೀಷ್ ಸಿನಿಮಾ ಒಪ್ಪಿಕೊಂಡಿದ್ದಾರೆ. ಅದಾದ ಬಳಿಕ ಬಾಲಿವುಡ್ ಸಿನಿಮಾ ಒಂದರಲ್ಲಿಯೂ ನಟಿಸುವ ಸಾಧ್ಯತೆ ಇದೆ.
