ಈ ಲ್ಯಾಪ್‌ಟಾಪ್‌ಗಳು ಇಎಂಎಫ್ (EMF)ವಿಕಿರಣಗಳನ್ನು ಹೊರಸೂಸುತ್ತವೆ. ಈ ಇಎಂಎಫ್‌ಗಳು ನಿಮ್ಮ ಆರೋಗ್ಯಕ್ಕೆ ಹಾನಿಯನ್ನುಂಟು ಮಾಡುತ್ತವೆ. ಹೌದು, ಪ್ರಮುಖ ಅಂಗಗಳ ಮೇಲೆ ಲ್ಯಾಪ್ ಟಾಪ್ ನಲ್ಲಿರುವ ಅನಾರೋಗ್ಯಕರ ವಿದ್ಯುತ್ಕಾಂತೀ ಯ ವಿಕಿರಣಗಳು ನೇರ ಪರಿಣಾಮ ಬೀರುತ್ತವೆ. ಮತ್ತೊಂದು ಇಂಟ್ರೆಸ್ಟಿಂಗ್ ಸಂಗತಿ ಎಂದರೆ ನೀವು ತೊಡೆಯ ಮೇಲಿಟ್ಟುಕೊಂಡು ಲ್ಯಾಪ್ ಟಾಪ್ ಉಪಯೋಗಿಸುತ್ತಿದ್ದರೆ ಇಂದೇ ತೊಡೆಯ ಮೇಲಿಟ್ಟುಕೊಳ್ಳುವುದನ್ನು ಬಿಟ್ಟುಬಿಡಿ. ಯಾಕೆ ಎಂಬುದಕ್ಕೆ 7 ಕಾರಣಗಳು ಇಲ್ಲಿವೆ ನೋಡಿ..
ಸಂತಾನೋತ್ಪತ್ತಿ ಸಾಧ್ಯತೆ ಕಡಿಮೆ
ಲ್ಯಾಪ್ಟಾಪ್ ಗಳನ್ನು ಮೇಲ್ನೋಟಕ್ಕೆ ನೋಡಿದಾಗ ನಮಗೆ ಹಾನಿಯುಂಟು ಮಾಡದ ವಸ್ತುವೆಂದೇ ತೋರುತ್ತದೆ. ಆದರೆ ಇದು ಇಎಂಎಫ್‌ಗಳನ್ನು ಹೊರಸೂಸುವುದರಿಂದ ಸಂತಾನೋತ್ಪತ್ತಿ ಸಾಧ್ಯತೆಯನ್ನು ಕಡಿಮೆ ಮಾಡುತ್ತದೆ. ಪುರುಷ ಲ್ಯಾಪ್ಟಾಪ್ ಬಳಕೆದಾರರಲ್ಲಿ ವೀರ್ಯಾಣುಗಳ ಸಂಖ್ಯೆ ಕಡಿಮೆಯಾಗಲು ಇದೇ ಕಾರಣ ಎನ್ನುತ್ತಾರೆ ತಜ್ಞರು. ಅಷ್ಟೇ ಏಕೆ, ಸ್ತ್ರೀಯ ಅಂಡಾಶಯದಿಂದ ಬಿಡುಗಡೆಯಾಗುವ ಮೊಟ್ಟೆಯ ಮೇಲೆ ಅಪಾಯವನ್ನುಂಟುಮಾಡುತ್ತದೆ.
ತೊಡೆ, ಕಾಲುಗಳ ಬಳಿ ಇಡಲೇಬೇಡಿ
ವೃಷಣದ ಬಳಿ, ಕಾಲುಗಳ ಮೇಲೆ ಲ್ಯಾಪ್ಟಾಪ್ ಗಳನ್ನು ಇಟ್ಟುಕೊಳ್ಳುವುದರಿಂದ ವಿಕಿರಣಗಳು ವೀರ್ಯ ಕೋಶಗಳ ಡಿಎನ್‌ಎಗೆ ಹಾನಿಯುಂಟು ಮಾಡಿ ಇದು ಪುರುಷ ಸಂತಾನೋತ್ಪತ್ತಿ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅರ್ಜೆಂಟೀನಾದ ಸಂಶೋಧಕರು ಹೇಳಿದ್ದಾರೆ. ಅಮೇರಿಕನ್ ಸೊಸೈಟಿ ಫಾರ್ ರಿಪ್ರೊಡಕ್ಟಿವ್ ಮೆಡಿಸಿನ್ ನಡೆಸಿದ ಅಧ್ಯಯನವು ನಿಮ್ಮ ತೊಡೆಯ ಮೇಲೆ ಲ್ಯಾಪ್ಟಾಪ್ ಇಟ್ಟುಕೊಳ್ಳುವುದರಿಂದ ಫಲವತ್ತತೆ ಮೇಲೆ ಪರಿಣಾಮ ಬೀರುತ್ತದೆ ಎಂದು ಹೇಳಿದೆ. ಅಧ್ಯಯನದ ಪ್ರಕಾರ ವೈರ್ ಲೆಸ್ ಇಂಟರ್ನೆಟ್-ಸಂಪರ್ಕಿತ ಲ್ಯಾಪ್ ಟಾಪ್ ಬಳಕೆಯಿಂದ ವೀರ್ಯ ಕಣಗಳ ಸಂಖ್ಯೆ ಕಡಿಮೆಯಾಗಿದೆ.
ಚರ್ಮದ ಕ್ಯಾನ್ಸರ್ ಸಂಭವ ಹೆಚ್ಚು
ಲ್ಯಾಪ್ಟಾಪ್ ನಿಮ್ಮ ತೊಡೆಯ ಮೇಲಿಟ್ಟುಕೊಳ್ಳುವುದರಿಂದ ಅದರ ಬಿಸಿ ತಾಕಿ ಚರ್ಮದ ಕ್ಯಾನ್ಸರ್ ಬರಬಹುದು ಎಂದು ಸ್ವಿಸ್ ಸಂಶೋಧಕರಾದ ಡಾ. ಆಂಡ್ರಿಯಾಸ್ ಅರ್ನಾಲ್ಡ್ ಮತ್ತು ಯೂನಿವರ್ಸಿಟಿ ಹಾಸ್ಪಿಟಲ್ ಬಾಸೆಲ್‌ನ ಪೀಟರ್ ಇಟಿನ್ ಹೇಳಿದ್ದಾರೆ.
ಚರ್ಮರೋಗ ತಜ್ಞ ಆಂಥೋನಿ ಜೆ. ಮಾನ್ಸಿನಿ ಸಹ ಈ ಮೇಲಿನ ಅಂಶವನ್ನೇ ಪ್ರತಿಪಾದಿಸಿದ್ದು,
ದೀರ್ಘಕಾಲದ ಚರ್ಮದ ಉರಿಯೂತವು ‘ಸ್ಕ್ವಾಮಸ್ ಸೆಲ್ ಸ್ಕಿನ್ ಕ್ಯಾನ್ಸರ್’ಸಾಧ್ಯತೆಯನ್ನು ಹೆಚ್ಚಿಸುತ್ತದೆ. ಇದು ಚರ್ಮದ ಕ್ಯಾನ್ಸರ್ ಸಾಮಾನ್ಯ ಸ್ವರೂಪಕ್ಕಿಂತ ಹೆಚ್ಚು ಆಕ್ರಮಣಕಾರಿಯಾಗಿದೆ ಎಂದು ಸೂಚಿಸಿದ್ದಾರೆ. ಅಷ್ಟೇ ಅಲ್ಲ, ತಮ್ಮ ಸಂತಾನೋತ್ಪತ್ತಿ ಅಂಗಗಳ ಬಳಿ ಲ್ಯಾಪ್‌ಟಾಪ್‌ಗಳನ್ನು ಇಟ್ಟುಕೊಳ್ಳುವುದರಿಂದ ಇದು ವೃಷಣ ಮತ್ತು ಅಂಡಾಶಯದ ಕ್ಯಾನ್ಸರ್ ಗೆ ಕಾರಣವಾಗಬಹುದು.
ಕುತ್ತಿಗೆ–ಬೆನ್ನು ನೋವು
ಲ್ಯಾಪ್ ಟಾಪ್ ತೊಡೆಯ ಮೇಲಿಟ್ಟುಕೊಳ್ಳುವುದರಿಂದ ಕುತ್ತಿಗೆ ಮತ್ತು ಬೆನ್ನು ನೋವು ಬರುತ್ತದೆ ಎಂದು ಇತ್ತೀಚಿನ ಅಧ್ಯಯನ ಕಂಡುಹಿಡಿದಿದೆ. ಇದಕ್ಕೆ ಸರಳ ಪರಿಹಾರವೆಂದರೆ ಟ್ಯಾಬ್ಲೆಟ್ ಅನ್ನು ಮೇಜಿನ ಮೇಲೆ ಇರಿಸಿ, ಅದನ್ನು ನೇರವಾಗಿಡಿ. ಲ್ಯಾಪ್ಟಾಪ್ ಅಥವಾ ಡೆಸ್ಕ್‌ಟಾಪ್ ಬಳಸುವಾಗ ಸ್ಟ್ಯಾಂಡಿಂಗ್ ಡೆಸ್ಕ್ ಬಳಸಿ ಅದು ಉತ್ತಮ ಭಂಗಿಗೆ ಸಹಾಯ ಮಾಡುತ್ತದೆ.
ನಿದ್ರಾಹೀನತೆಗೆ ಕಾರಣವಾಗುತ್ತದೆ
ಕಂಪ್ಯೂಟರ್ ಅಥವಾ ಲ್ಯಾಪ್ ಟಾಪ್ ಬಳಕೆದಾರರು ಉತ್ತಮ ನಿದ್ರೆ ಮಾಡಲು ಬಯಸಿದರೆ ಮಲಗಲು ಕನಿಷ್ಠ ಎರಡು ಗಂಟೆಗಳ ಮೊದಲು ತಮ್ಮ ಲ್ಯಾಪ್ಟಾಪ್ ಅಥವಾ ಆಪಲ್ ಐಪ್ಯಾಡ್ ಅನ್ನು ಆಫ್ ಮಾಡಬೇಕು ಎಂದು ವಿಜ್ಞಾನಿಗಳು ಹೇಳುತ್ತಾರೆ. ಪ್ರಕಾಶಮಾನವಾದ ಬೆಳಕನ್ನು ಹೊರಸೂಸುವ ಸಾಧನಗಳಿಂದ ಮಾನವ ಮಿದುಳು ಮತ್ತು ನಿದ್ರೆಯ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅಮೆರಿಕಾದ ಸಂಶೋಧಕರು ಕಂಡುಹಿಡಿದಿದ್ದಾರೆ. ಮಲಗುವ ಸಮಯದಲ್ಲಿ ಲ್ಯಾಪ್ ಟಾಪ್ ಬಳಸುವುದರಿಂದ ಅದರಲ್ಲಿನ ಬೆಳಕು ಮೆದುಳಿಗೆ ಹೆಚ್ಚು ಎಚ್ಚರವಾಗಿರಲು ಮತ್ತು ನಿಮ್ಮ ನಿದ್ರೆಯ ಸಾಮರ್ಥ್ಯವನ್ನು ಕಡಿಮೆ ಮಾಡಲು ಸಾಕಷ್ಟು ಪ್ರಚೋದಿಸುತ್ತದೆ ಎನ್ನುತ್ತಾರೆ ಸಂಶೋಧಕರು.
ಗರ್ಭಿಣಿಯರಿಗೂ ಸಂಕಷ್ಟ!
ಮಹಿಳೆಯರು ದೀರ್ಘಕಾಲದಿಂದ ಲ್ಯಾಪ್ಟಾಪ್ ಬಳಸುತ್ತಿದ್ದರೆ ಅದು ಫಲವತ್ತತೆ ಮತ್ತು ಸಂತಾನೋತ್ಪತ್ತಿ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ. ಅಷ್ಟೇ ಅಲ್ಲ, ಇದು ಮೊಟ್ಟೆಯ ಉತ್ಪಾದನೆ ಕಡಿಮೆಗೊಳಿಸುವುದರಿಂದ ಗರ್ಭಧರಿಸಲು ಹೆಚ್ಚು ಕಷ್ಟವಾಗುತ್ತದೆ. ಲ್ಯಾಪ್ಟಾಪ್ ಅನ್ನು ತೊಡೆ ಅಥವಾ ಹೊಟ್ಟೆಯ ಮೇಲಿಟ್ಟುಕೊಂಡು ಬಳಸುತ್ತಿದ್ದರೆ ಇಎಂಎಫ್ ವಿಕಿರಣವು ಭ್ರೂಣದ ಮೇಲೆ ನೇರ ಪರಿಣಾಮ ಬೀರುತ್ತದೆ. ಇದರಿಂದ ಅನೇಕ ಅನಾರೋಗ್ಯ ಸಮಸ್ಯೆಗಳು ತಲೆದೋರಿ ಶಿಶುಗಳು ಜನಿಸಿದಾಗ ಅವುಗಳ ಬೆಳವಣಿಗೆ ಕುಂಠಿತವಾಗಬಹುದು. ಲ್ಯಾಪ್ಟಾಪ್ ಬಳಸುವ ಗರ್ಭಿಣಿಯರು ಈ ಕುರಿತು ಎಚ್ಚರಿಕೆಯಿಂದಿರುವುದು ಒಳ್ಳೆಯದು.
ದೀರ್ಘಕಾಲದ ಚರ್ಮದ ಕಾಯಿಲೆಗಳು
ವಿಶ್ರಾಂತಿ ಪಡೆಯಲೆಂದು ನಿಮ್ಮ ತೊಡೆಯ ಮೇಲೆ ಲ್ಯಾಪ್ಟಾಪ್ ಇಟ್ಟುಕೊಂಡು ಹೆಚ್ಚಿನ ಸಮಯ ಓದುವುದು, ಅಧ್ಯಯನ ಮಾಡುವುದು ಅಥವಾ ಗೇಮ್ ಆಡುತ್ತಿದ್ದರೆ ಅದರಿಂದ ತಾಕುವ ಬಿಸಿಯಿಂದ “ಟೋಸ್ಟೆಡ್ ಸ್ಕಿನ್ ಸಿಂಡ್ರೋಮ್” ಹೆಚ್ಚಾಗುತ್ತದೆ. ವೈದ್ಯಕೀಯ ವರದಿಯ ಪ್ರಕಾರ ಲ್ಯಾಪ್ ಟಾಪ್‌ಗಳಂತಹ ಸಾಧನಗಳನ್ನು ನಮ್ಮ ಪಕ್ಕದಲ್ಲಿ ದೀರ್ಘಕಾಲದವರೆಗೆ ಇಡಬಹುದು. ಆದರೆ ನಮ್ಮ ಮೇಲೆ ಇಟ್ಟುಕೊಂಡು ಬಳಸುವುದರಿಂದ ದೀರ್ಘಕಾಲದ ಚರ್ಮದ ಕಾಯಿಲೆಗಳಿಗೆ ತುತ್ತಾಗಬೇಕಾಗುತ್ತದೆ.
