ಬೆಂಗಳೂರು: ಕುಮಾರಸ್ವಾಮಿ ಅವರನ್ನ ಈ ಬಾರಿ ಜನ ಬೆಂಬಲಿಸುತ್ತಾರೆ ಎಂದು ಮಾಜಿ ಪ್ರಧಾನಿ ಹೆಚ್ ಡಿ ದೇವೇಗೌಡರು (HD Devegowda) ಹೇಳಿದ್ದಾರೆ. ಈ ಸಂಬಂಧ ಪದ್ಮನಾಭ ನಗರದ (Padmanabha Nagar) ನಿವಾಸದ ಬಳಿ ಮಾತನಾಡಿದ ಅವರು, ಪಂಚರತ್ನ ಕಾರ್ಯಕ್ರಮ ಅತ್ಯುತ್ತಮ ಅಂಶವನ್ನು ಜನರ ಮುಂದಿಟ್ಟಿದೆ. ಇದರೊಂದಿಗೆ ಗ್ರಾಮ ವಾಸ್ತವ್ಯ, ಸುವರ್ಣ ಗ್ರಾಮ ಯೋಜನೆಗಳೆಲ್ಲವು ಇದೆ ಎಂದರು. ಕುಮಾರಸ್ವಾಮಿ ಸಿಎಂ ಆಗಿದ್ದಾಗ ಎರಡು ಬಾರಿಯೂ ಮಾತು ಉಳಿಸಿಕೊಂಡಿದ್ದಾರೆ. ಕುಮಾರಸ್ವಾಮಿ ಅವರನ್ನ ಈ ಬಾರಿ ಜನ ಬೆಂಬಲಿಸುತ್ತಾರೆ. ಯಾರೇ ಏನೇ ಮಾತಾಡಿದ್ರೂ ತಲೆ ಕೆಡಿಸಿಕೊಳ್ಳಲ್ಲ ಎಂದು ಹೇಳಿದರು.
ಜೆಡಿಎಸ್, ಕಾಂಗ್ರೆಸ್ ಬಿ ಟೀಮ್ ಎಂಬ ಟೀಕೆ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿದ ಗೌಡರು, ಹೇಳಿಕೊಳ್ಳುವ ಅಧಿಕಾರ ಇದೆ, ನಾನು ಅದನ್ನು ಹೇಗೆ ಖಂಡಿಸಲಿ. ಎಲ್ಲದಕ್ಕೂ ಮಾತನಾಡುವುದಕ್ಕೆ ಹೋಗಲ್ಲ. ಚುನಾವಣೆ ವೇಳೆ ಫಲಿತಾಂಶ ಕೊಡೋರು ರಾಜ್ಯದ ಜನ ಎಂದರು. ಮೇ 8 ರವರೆಗೆ ಒಂದು ದಿನಕ್ಕೆ ಮೂರು ಕ್ಷೇತ್ರದಲ್ಲಿ ಪ್ರಚಾರ ಮಾಡಲು ತೀರ್ಮಾನ ಮಾಡಿದ್ದೇನೆ. ಕುಮಾರಸ್ವಾಮಿ ನಿನ್ನೆ ಡಿಶ್ಚಾರ್ಜ್ ಆಗಿದ್ದು ಪ್ರಚಾರ ಮಾಡ್ತಿದ್ದಾರೆ. 40-50 ಕಡೆ ಅವರು ಪ್ರಚಾರ ಮಾಡ್ತಾರೆ. ನಾನು ಹಲವು ಕಡೆ ಪ್ರಚಾರ ಮಾಡುತ್ತೇನೆ ಎಂದು ಹೇಳಿದರು.
