ಬೆಳಗಾವಿ: ಉರಿಗೌಡ, ನಂಜೇಗೌಡ ಹೆಸರಿನಲ್ಲಿ ಒಂದಲ್ಲ, ನೂರು ಸಿನಿಮಾ ಬಂದರೂ ನಾವು ಹೆದರಲ್ಲ. ಒಕ್ಕಲಿಗರ ಹೆಸರು ಹಾಳು ಮಾಡಲು ನಾವು ಬಿಡುವುದಿಲ್ಲ ಎಂದು ಕರ್ನಾಟಕ ಕಾಂಗ್ರೆಸ್ ಅಧ್ಯಕ್ಷರಾದ ಡಿ.ಕೆ. ಶಿವಕುಮಾರ್ ಗುಡುಗಿದ್ದಾರೆ.
ಬೆಳಗಾವಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಮುನಿರತ್ನ ಅವರು ಟಿಪ್ಪುವನನ್ನು ಕೊಂದವರು ಎಂದು ಹೇಳಲಾದ ಉರಿಗೌಡ, ನಂಜೇಗೌಡ ಎಂಬ ಇಬ್ಬರು ಕಾಲ್ಪನಿಕ ಪಾತ್ರಗಳ ಬಗ್ಗೆ ಸಿನಿಮಾ ಮಾಡಲು ಹೊರಟಿದ್ದವರು. ಆದರೆ, ಟಿಪ್ಪುವನ್ನು ಕೊಂದ ಆರೋಪವನ್ನು ಒಕ್ಕಲಿಗರ ಮೇಲೆ ಹಾಕುವುದು ಸರಿಯಲ್ಲ. ಹಾಗಾಗಿ, ಮುನಿರತ್ನ ಅವರನ್ನು ಆಶ್ರಮಕ್ಕೆ ಕರೆಯಿಸಿಕೊಂಡು ಒಕ್ಕಲಿಗರ ಗುರುಗಳಾದ ನಿರ್ಮಲಾನಂದ ಶ್ರೀಗಳು ಮಾತನಾಡಿದ್ದಾರೆ. ನಾನೂ ಸಹ ಈ ಮೂಲಕ ನಿರ್ಮಲಾನಂದ ಶ್ರೀಗಳನ್ನು ಕೇಳಿಕೊಳ್ಳುವುದೇನೆಂದರೆ, ಶ್ರೀಗಳು ಸಮುದಾಯದ ಹೆಸರು ಕೆಡಿಸಲು ಬರುವವರಿಗೆ ಬುದ್ಧಿ ಹೇಳಬೇಕು. ಒಕ್ಕಲಿಗ ಸಮುದಾಯದ ಗೌರವಕ್ಕೆ ಚ್ಯುತಿ ಬರುವಂಥ ಕೆಲಸಗಳ ವಿರುದ್ಧ ಹೋರಾಡಲು ಶ್ರೀಗಳೇ ಮುಂದಾಳತ್ವ ವಹಿಸಬೇಕು ಎಂದು ಕೇಳಿಕೊಳ್ಳುತ್ತೇನೆ ಎಂದರು.
ನಂತರ, ಮಾತು ಮುಂದುವರಿಸಿದ ಅವರು, ಮುನಿರತ್ನ ಚಿತ್ರ ನಿರ್ಮಾಣ ಮಾಡಲಿ, ಅಶ್ವತ್ಥ್ ನಾರಾಯಣ್ ಅವರು ಚಿತ್ರಕತೆ ಬರೆಯಲಿ, ಯಾರಾದರೂ ಅದರಲ್ಲಿ ನಟಿಸಲಿ.. ಒಟ್ಟಾರೆಯಾಗಿ ಇಂಥ ಒಂದಲ್ಲ, ನೂರು ಸಿನಿಮಾಗಳು ಬಂದರೂ ನಾವು (ಒಕ್ಕಲಿಗರು) ಹೆದರಲ್ಲ. ನಮ್ಮ ಸಮುದಾಯಕ್ಕೆ ಕೆಟ್ಟ ಹೆಸರು ತರಲು ನಾವು ಬಿಡಲ್ಲ ಎಂದು ಹೇಳಿದರು.
