ಪುಡಿ ಹಾಗೂ ಕಚ್ಚಾ ರೂಪದಲ್ಲಿ ಮಾರಾಟವಾಗುತ್ತಿದ್ದ ಹಲವು ಬ್ರಾಂಡ್‌ಗಳ ಚಕ್ಕೆಗೆ ಅಮೆರಿಕದ ಕೆಲವು ರಾಜ್ಯಗಳು ನಿಷೇಧ ಹೇರಿವೆ. ಚಕ್ಕೆ ಹಾಗೂ ಚಕ್ಕೆ ಪುಡಿಯಲ್ಲಿ ಭಾರೀ ಪ್ರಮಾಣದಲ್ಲಿ ಸೀಸ ಪತ್ತೆಯಾದ ಹಿನ್ನೆಲೆಯಲ್ಲಿ ಅಮೆರಿಕದ ಅಹಾರ ಸುರಕ್ಷತಾ ಪ್ರಾಧಿಕಾರ ಎಫ್‌ಡಿಎ ಮಾರಾಟಕ್ಕೆ ಕಡಿವಾಣ ಹಾಕಿದೆ.
ಈ ಬಗ್ಗೆ ಜುಲೈ 29ರಂದು ಎಫ್‌ಡಿಎ ನೋಟಿಸ್ ಜಾರಿ ಮಾಡಿದೆ. ಸೀಸ ಅತಿಯಾದ ಪ್ರಮಾಣದಲ್ಲಿ ದೇಹ ಸೇರುವುದರಿಂದ ಕಿಡ್ನಿ ವೈಫಲ್ಯತೆ, ಬಿಪಿ, ನರ ರೋಗಗಳು ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಅಮೆರಿಕದ ಆಹಾರ ಹಾಗೂ ಔಷಧ ಆಡಳಿತ ಎಚ್ಚರಿಕೆ ನೀಡಿದೆ.
ಅಮೆರಿಕದಲ್ಲಿ ಹಲವು ಬ್ರಾಂಡ್‌ಗಳ ಚಕ್ಕೆ ಹಾಗೂ ಚಕ್ಕೆ ಪುಡಿ ಮಾರಾಟ ಮಾಡಲಾಗುತ್ತಿದೆ. ಅವುಗಳಲ್ಲಿ ಸೀಸದ ಪ್ರಮಾಣ ಹೆಚ್ಚಾಗಿರುವ ಚಕ್ಕೆಯನ್ನು ಪತ್ತೆ ಮಾಡಿ ಅದನ್ನು ಹಿಂಪಡೆಯಲಾಗುತ್ತಿದೆ. ಎಫ್‌ಡಿಎ ನೋಟಿಸ್ ಪ್ರಕಾರ ಶೆಹಜಾದಾ ಬ್ರಾಂಡ್ ಹಾಗೂ ಸ್ಪೈಸ್ ಕ್ಲಾಸ್ ಬ್ರಾಂಡ್ ನ ಚಕ್ಕೆ ಪುಡಿಯಲ್ಲಿ ಹೆಚ್ಚಿನ ಪ್ರಮಾಣದ ಸೀಸ ಇದ್ದು ಅವುಗಳನ್ನು ವಾಪಸ್ ಪಡೆಯಲಾಗಿದೆ. ಈ ಬ್ರಾಂಡ್‌ನ ಚಕ್ಕೆ ಪುಡಿಗಳಲ್ಲಿ ನಿಗದಿತ ಪ್ರಮಾಣಕ್ಕಿಂತಲೂ ಹೆಚ್ಚು ಸೀಸ ಇದೆ ಎಂದು ಎಫ್‌ಡಿಎ ಮಾಹಿತಿ ನೀಡಿದೆ.
ಅಮೆರಿಕದ ನ್ಯೂಯಾರ್ಕ್ ರಾಜ್ಯದ ಕೃಷಿ ಹಾಗೂ ಮಾರುಕಟ್ಟೆ ಇಲಾಖೆ ನಡೆಸಿದ ಸಂಶೋಧನೆ ವೇಳೆ ಈ ಬ್ರಾಂಡ್‌ಗಳ ಚಕ್ಕೆ ಹಾಗೂ ಚಕ್ಕೆ ಪುಡಿಯಲ್ಲಿ ಭಾರೀ ಪ್ರಮಾಣದ ಸೀಸ ಇರೋದು ಪತ್ತೆಯಾಗಿತ್ತು.
