ಭಾರತ ಹಾಗೂ ಪಾಕಿಸ್ತಾನ ನಡುವಣ ಪಂದ್ಯ ಸಾಕಷ್ಟು ತೀವ್ರ ಕುತೂಹಲದಿಂದ ಕೂಡಿರುತ್ತದೆ. ಇಡೀ ವಿಶ್ವವೇ ಈ ಪಂದ್ಯವನ್ನು ಕಣ್ತುಂಬಿಸಿಕೊಳ್ಳಲು ಎದುರು ನೋಡುತ್ತದೆ. ಅಂದ ಹಾಗೆ ಉಭಯ ದೇಶಗಳ ಅಭಿಮಾನಿಗಳು ಎರಡೂ ತಂಡಗಳಲ್ಲಿನ ತಮ್ಮ-ತಮ್ಮ ನೆಚ್ಚಿನ ಆಟಗಾರರನ್ನು ಬೆಂಬಲಿಸುವುದು ಸಹಜ. ಅದೇ ರೀತಿ ಕಳೆದ ಶನಿವಾರ ಪಲ್ಲೆಕೆಲೆ ಇಂಟರ್‌ನ್ಯಾಷನಲ್‌ ಕ್ರೀಡಾಂಗಣದಲ್ಲಿ ನಡೆದಿದ್ದ ಪಂದ್ಯದ ವೇಳೆ ಗ್ಯಾಲಿರಿಯಲ್ಲಿದ್ದ ಪಾಕ್‌ ಯುವತಿ ತಮ್ಮ ಎರಡೂ ಕೆನ್ನೆಯ ಭಾಗಗಳಲ್ಲಿ ಭಾರತ ಹಾಗೂ ಪಾಕಿಸ್ತಾನ ಭಾವುಟದ ಚಿತ್ರವನ್ನು ಬರೆಸಿಕೊಂಡಿದ್ದರು ಹಾಗೂ ಎರಡೂ ದೇಶಗಳಿಗೆ ಬೆಂಬಲ ಸೂಚಿಸಿದ್ದರು.
ಟಿವಿ ಕ್ಯಾಮೆರಾಗೂ ಈ ಪಾಕಿಸ್ತಾನಿ ಯುವತಿ ಆಕರ್ಷಣೆಯಾಗಿದ್ದರು. ಪಂದ್ಯದ ವೇಳೆ ಮಾತನಾಡಿದ್ದ ಆ ಯುವತಿ, ವಿರಾಟ್‌ ಕೊಹ್ಲಿ ಆಟವನ್ನು ಕಣ್ತುಂಬಿಸಿಕೊಳ್ಳಲು ಇಲ್ಲಿಗೆ ಬಂದಿದ್ದೇನೆ ಹಾಗೂ ಅವರು ಶತಕ ಸಿಡಿಸಬೇಕು ಎಂದು ಹೇಳಿದ್ದಳು.
ಈ ಯುವತಿಯ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಇದಕ್ಕೆ ನೆಟ್ಟಿಗರು ಪ್ರತಿಕ್ರಿಯೆ ನೀಡಿದ್ದಾರೆ. “ನೀವು ಕ್ರೀಡೆಯನ್ನು ಹಾಗೂ ಕ್ರೀಡಾಪಟುವನ್ನು ಇಷ್ಟಪಟ್ಟರೆ, ರಾಜಕೀಯ ಗಡಿಗಳು ಅರ್ಥಹೀನ,” ಎಂದು ಅಭಿಮಾನಿಯೊಬ್ಬರು ಈ ವಿಡಿಯೋಗೆ ಕಾಮೆಂಟ್‌ ಹಾಕಿದ್ದಾರೆ.
