ಕಡಿಮೆ ಶ್ರೇಣಿಯ ಕ್ಷಿಪಣಿ ಬಳಸಿ ಹಮಾಸ್ ನಾಯಕ ಇಸ್ಮಾಯಿಲ್ ಹನಿಯೆ ಅವರ ಹತ್ಯೆ ಮಾಡಲಾಗಿದ್ದು, ಇದಕ್ಕೆ ಅಮೆರಿಕ ಬೆಂಬಲ ನೀಡಿದೆ ಎಂದು ಇರಾನ್‌ನ ರೆವಲ್ಯೂಷನರಿ ಗಾರ್ಡ್‌ ಆಕ್ರೋಶ ಹೊರ ಹಾಕಿದೆ. ಜೊತೆಗೆ ಘಟನೆಗೆ ಪ್ರತೀಕಾರ ತೀರಿಸುವುದಾಗಿಯೂ ಹೇಳಿದೆ.
7 ಕೆ.ಜಿ ತೂಕದ ಸಿಡಿತಲೆ ಇರುವ ರಾಕೆಟ್‌ ಅನ್ನು ಬಳಸಿ ಹನಿಯೆ ಅವರ ನಿವಾಸದ ಮೇಲೆ ದಾಳಿ ನಡೆಸಲಾಗಿದೆ. ರಾಜಧಾನಿ ಟೆಹ್ರಾನ್‌ನಲ್ಲಿರುವ ಹನಿಯೆ ಅವರ ನಿವಾಸದ ಮೇಲೆ ಗುರಿ ಇಡಲಾಗಿದೆ ಎಂದು ಸೇನೆ ತಿಳಿಸಿದ್ದು, ಅವರ ನಿವಾಸ ಇರುವ ನಿಖರ ಸ್ಥಳವನ್ನು ಬಹಿರಂಗಗೊಳಿಸಲು ನಿರಾಕರಿಸಿದೆ.
’ಜಿಯೋನಿಸ್ಟ್ ಆಡಳಿತವು ಅಮೆರಿಕದ ಬೆಂಬಲದಿಂದ ಈ ದಾಳಿ ಮಾಡಿದೆ. ಯುದ್ಧಕೋರ, ಭಯೋತ್ಪಾದಕ ಜಿಯೋನಿಸ್ಟ್ ಆಡಳಿತವು ಸೂಕ್ತ ಸಮಯ, ಸ್ಥಳ ಮತ್ತು ಸಾಮರ್ಥ್ಯದಲ್ಲಿ ಕಠಿಣ ಶಿಕ್ಷೆಯನ್ನು ಪಡೆಯಲಿದೆ’ ಎಂದು ಸೇನೆ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
ಹನಿಯೆ ಹತ್ಯೆಯಲ್ಲಿ ತನ್ನ ಪಾತ್ರವನ್ನು ಇಸ್ರೇಲ್ ಈವರೆಗೂ ದೃಢಪಡಿಸಿಲ್ಲ. ಆದರೆ ಈ ಹಿಂದೆ ಹನಿಯೆ ಹತ್ಯೆ ಮಾಡುವುದಾಗಿ ಹೇಳಿತ್ತು. ಈ ಹತ್ಯೆಯು ಭಾರಿ ಪ್ರಾದೇಶಿಕ ಸಂಘರ್ಷದ ಭಯವನ್ನು ಹುಟ್ಟುಹಾಕಿದೆ. ಇರಾನ್ ಪ್ರತೀಕಾರ ತೀರಿಸಿಕೊಂಡರೆ ಇಸ್ರೇಲ್ ಮತ್ತು ಇರಾನ್ ನಡುವೆ ಮತ್ತೊಂದು ಕದನ ಏರ್ಪಡುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ.
