ರಾಮನಗರ: ರಾಜ್ಯದ ಸುಸಜ್ಜಿತ ಹೆದ್ದಾರಿ ಎಂದು ಹೇಳುವ ಬೆಂಗಳೂರು-ಮ್ಯಸೂರು ಎಕ್ಸ್‌ಪ್ರೆಸ್‌ ಹೈವೇಯಲ್ಲಿ ಕನಿಷ್ಠ ಸುರಕ್ಷತಾ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿಲ್ಲ. ಪರಿಣಾಮ ರಸ್ತೆಯಲ್ಲಿ ಸಂಚರಿಸುವ ಪ್ರಯಾಣಿಕರ ಜೀವಕ್ಕೆ ಗ್ಯಾರಂಟಿಯೇ ಇಲ್ಲದಂತಾಗಿದೆ.
ನೂತನ ಬೆಂಗಳೂರು-ಮೈಸೂರು ಹೆದ್ದಾರಿ ಪ್ರಯಾಣಕ್ಕೆ ಮುಕ್ತವಾದ ಬಳಿಕ ಅಪಘಾತಗಳು ಹೆಚ್ಚಾಗಿವೆ. ಮೊದಲ ಹಂತದ ಹೆದ್ದಾರಿ ಉದ್ಘಾಟನೆಗೊಂಡು ಟೋಲ್‌ ಶುಲ್ಕ ಸಂಗ್ರಹಿಸಲು ಆರಂಭಿಸಿದೆಯಾದರೂ, ಎಕ್ಸ್‌ಪ್ರೆಸ್‌ ಹೈವೇಯಲ್ಲಿ ಪ್ರಯಾಣಿಕರಿಗೆ ದೊರೆಯ ಬೇಕಾದ ಕನಿಷ್ಠ ಸುರಕ್ಷತಾ ಸೌಲಭ್ಯಗಳು ಇಲ್ಲ ಎಂಬ ಸಂಗತಿ ಏಪ್ರಿಲ್‌ 22 ರಂದು ಸಂಜೆ ಸಂಭವಿಸಿದ ಭೀಕರ ರಸ್ತೆ ಅಪಘಾತ ಸಮಯದಲ್ಲಿ ನಡೆದ ಪ್ರಸಂಗಗಳಿಂದ ಅನಾವರಣ ಗೊಂಡಿದೆ.
ಆಂಬ್ಯುಲೆನ್ಸ್‌ ವ್ಯವಸ್ಥೆ ಇಲ್ಲ
ಹೆದ್ದಾರಿಯಲ್ಲಿ ಅಪಘಾತಗಳು ಸಂಭವಿಸಿದ ಸಮಯದಲ್ಲಿ ಗಾಯಾಳುಗಳಿಗೆ ತ್ವರಿತವಾಗಿ ವೈದ್ಯಕೀಯ ಚಿಕಿತ್ಸೆ ದೊರೆಯಬೇಕಿದ್ದು ಅವರನ್ನು ತಕ್ಷಣ ಆಸ್ಪತ್ರೆಗೆ ಸಾಗಿಸಲು ತುರ್ತು ಆಂಬ್ಯುಲೆನ್ಸ್‌ ಸೇವೆ ಅತ್ಯಗತ್ಯ. ಆದರೆ, ಮೊದಲ ಹಂತದ 60 ಕಿಮೀ ನಷ್ಟು ರಸ್ತೆಯಲ್ಲಿ ಬಿಡದಿ ಟೋಲ್‌ ಬಳಿ ಮಾತ್ರ ಒಂದು ಆಂಬ್ಯುಲೆನ್ಸ್‌ ಇದ್ದು, ಹೈವೇನಲ್ಲಿ ಎಲ್ಲೇ ಅಪಘಾತ ಸಂಭವಿಸಿದರೂ ಅಲ್ಲಿಂದಲೇ ವಾಹನ ಬರಬೇಕಿದೆ. ಹೆದ್ದಾರಿ ಮಧ್ಯದಲ್ಲಿ ಅಪಘಾತ ಸಂಭವಿಸಿದರೆ ಆಂಬ್ಯುಲೆನ್ಸ್‌ ಸ್ಥಳಕ್ಕೆ ಬರಲು ಕನಿಷ್ಠ 30 ರಿಂದ 40 ನಿಮಿಷ ಸಮಯ ತೆಗೆದುಕೊಳ್ಳುತ್ತದೆ. ಹೆದ್ದಾರಿಯಲ್ಲಿಅಪಘಾತಕ್ಕೀಡಾದವರು ಸಾವು ಬದುಕಿನ ನಡುವೆ ಹೋರಾಡುವಾಗ ಕ್ಷಣಕ್ಷಣವೂ ಅಮೂಲ್ಯ. ಆಂಬ್ಯುಲೆನ್ಸ್‌ಗಾಗಿ ಇಷ್ಟೊಂದು ಸಮಯದ ಕಾಯ್ದರೆ ಅಪಾಯ ಕಟ್ಟಿಟ್ಟ ಬುತ್ತಿ ಎಂಬಂತಾಗಿದೆ.
ಸ್ಥಳೀಯ ಆಂಬ್ಯುಲೆನ್ಸ್‌ ಬರಲು ಸಮಸ್ಯೆ
ಹೈವೇ ಆಂಬ್ಯುಲೆನ್ಸ್‌ ಸ್ಥಳಕ್ಕೆ ಬರಲು ಸಮಯವಾಗುವ ಕಾರಣ 108 ಅಥವಾ ಸ್ಥಳೀಯ ತಾಲೂಕು, ಜಿಲ್ಲಾಸರಕಾರಿ ಆಸ್ಪತ್ರೆಯ ಆಂಬ್ಯುಲೆನ್ಸ್‌ ಆಗಲಿ ಅಥವಾ ಖಾಸಗಿ ಆಂಬ್ಯುಲೆನ್ಸ್‌ ಆಗಲಿ ಸ್ಥಳಕ್ಕೆ ಬರಲು ಡಿವೈಡರ್‌ ಸಮಸ್ಯೆ ಇದೆ. ಚನ್ನಪಟ್ಟಣ ಅಥವಾ ರಾಮನಗರದಿಂದ ಬೈಪಾಸ್‌ ರಸ್ತೆಗೆ ಹೋಗಲು ಎಂಟ್ರಿ ಮತ್ತು ಎಕ್ಸಿಟ್‌ ಗಾಗಿ ಸುಮಾರು 8ರಿಂದ 10 ಕಿಮೀ ದೂರು ಸುತ್ತಾಡಿಕೊಂಡು ಹೋಗಬೇಕು. ಇನ್ನು ಅಪಘಾತ ನಡೆದ ಸ್ಥಳದಿಂದ ಆಸ್ಪತ್ರೆಗೆ ಹಿಂದಿರುಗಲು ಇಷ್ಟೇ ಸಮಯ ಬೇಕಾಗುತ್ತದೆ. ಇದು ಜೀವ ಉಳಿಸಿಕೊಳ್ಳಲು ಹೋರಾಡುತ್ತಿರುವ ಗಾಯಾಳುಗಳಿಗೆ ಅಪಾಯವಾಗಿ ಪರಿಣಮಿಸಿದೆ.
ಆಗಬೇಕಾದ್ದೇನು
- ಪ್ರತಿ 20 ಕಿಮೀ ಒಂದು ಆಂಬ್ಯುಲೆನ್ಸ್‌ ಸೇವೆ ದೊರೆಯುವಂತಾಗಬೇಕು. ಈ ಆಂಬ್ಯುಲೆನ್ಸ್‌ ತುರ್ತು ಸಂದರ್ಭದಲ್ಲಿ ಪ್ರಥಮ ಚಿಕಿತ್ಸೆ ನೀಡುವ ನುರಿತ ಸಿಬ್ಬಂದಿಯನ್ನು ಒಳಗೊಂಡಿರಬೇಕು
2. ಎಕ್ಸ್‌ಪ್ರೆಸ್‌ ಹೈವೇನಲ್ಲಿಅಪಘಾತದಲ್ಲಿ ಗಾಯಗೊಂಡ ಗಾಯಾಳುಗಳ ನೆರವಿಗೆ ತುರ್ತು ಚಿಕಿತ್ಸಾ ಘಟಕವನ್ನು ತೆರೆಯಬೇಕು.
3. ಅಪಘಾತ ವಲಯದಲ್ಲಿಪದೇ ಪದೆ ಅಪಘಾತ ಸಂಭವಿಸುತ್ತಿದ್ದು ಈ ಸ್ಥಳಗಳಲ್ಲಿಪ್ರಯಾಣಿಕರ ಸುರಕ್ಷತೆಗೆ ಸೂಕ್ತ ಕ್ರಮ ಕೈಗೊಳ್ಳಬೇಕು.
4. ಪ್ರಯಾಣಿಕರ ಸುರಕ್ಷತೆಯ ಉದ್ದೇಶದಿಂದ ಹೈವೇ ಪೆಟ್ರೋಲಿಂಗ್‌ ವ್ಯವಸ್ಥೆಯನ್ನು ಹೆಚ್ಚಿಸ ಬೇಕು.
5. ಎಕ್ಸ್‌ಪ್ರೆಸ್‌ ಹೈವೇನಲ್ಲಿ ಅಪಘಾತ ಸಂಭವಿಸಿದಾಗ ವಾಹನಗಳು ಡಿವೈಡರ್‌ ದಾಟದಂತೆ ತಡೆ ವ್ಯವಸ್ಥೆ ನಿರ್ಮಿಸಬೇಕು
