ಹೊಸದಿಲ್ಲಿ: ಭಾರತದ ಆತಿಥ್ಯದಲ್ಲಿ ಅಕ್ಟೋಬರ್‌-ನವೆಂಬರ್‌ ಅವಧಿಯಲ್ಲಿ ನಡೆಯುವ 2023ರ ಏಕದಿನ ವಿಶ್ವಕಪ್ ಟೂರ್ನಿಯ ಬಳಿಕ ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್‌ಗೆ ವಿದಾಯ ಹೇಳುವ ಬಗ್ಗೆ ಇಂಗ್ಲೆಂಡ್‌ ಆಲ್‌ರೌಂಡರ್‌ ಮೊಯೀನ್ ಅಲಿ ಸುಳಿವು ನೀಡಿದ್ದಾರೆ.
ಕಳೆದ ಹಲವು ವರ್ಷಗಳಿಂದ ಇಂಗ್ಲೆಂಡ್‌ ತಂಡಕ್ಕೆ ಮೊಯೀನ್ ಅಲಿ ಪ್ರಮುಖ ಆಧಾರ ಸ್ಥಂಭವಾಗಿದ್ದಾರೆ. 2019ರ ಏಕದಿನ ವಿಶ್ವಕಪ್ ಟೂರ್ನಿಯ ವಿಜೇತ ಇಂಗ್ಲೆಂಡ್‌ ತಂಡದ ಭಾಗವಾಗಿದ್ದ ಅಲಿ, ಇದೀಗ ತಮ್ಮ ರಾಷ್ಟ್ರೀಯ ತಂಡಕ್ಕೆ ಸತತ ಎರಡನೇ ಬಾರಿ ವಿಶ್ವಕಪ್ ಗೆದ್ದು ಕೊಡುವ ಇಂಗಿತವನ್ನು ಹೊಂದಿದ್ದಾರೆ.
ಬಾಂಗ್ಲಾದೇಶ ವಿರುದ್ಧ ಮುಂಬರುವ ಟಿ20 ಸರಣಿಯ ನಿಮಿತ್ತ ಮಾಧ್ಯಮಗಳ ಜೊತೆ ಮಾತನಾಡಿದ ಮೊಯೀನ್ ಅಲಿ, “ನಾನು ಸಾಕಷ್ಟು ಗುರಿಗಳನ್ನು ಇಟ್ಟುಕೊಳ್ಳುವುದಿಲ್ಲ ಆದರೆ, ಮುಂಬರುವ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ನಾನು ಆಡಬೇಕು. ಆ ಮೂಲಕ ಇಂಗ್ಲೆಂಡ್‌ ತಂಡಕ್ಕೆ ಪ್ರಶಸ್ತಿ ಗೆದ್ದು ಕೊಡಬೇಕು. ತದನಂತರ ಏನು ಆಗುತ್ತೋ ನೋಡೋಣ,” ಎಂದು ಹೇಳಿದ್ದಾರೆ.
“ಏಕದಿನ ಕ್ರಿಕೆಟ್‌ಗೆ ನಿವೃತ್ತಿ ಹೇಳುತ್ತೇನೆ ಅಥವಾ ಹೇಳುವುದಿಲ್ಲ ಎಂಬ ಬಗ್ಗೆ ನಾನು ಇದೀಗ ಸ್ಪಷ್ಟತೆ ನೀಡುವುದಿಲ್ಲ. 35 ವಯಸ್ಸು ತುಂಬಿರುವ ನನಗೆ ಮುಂದಿನ 7 ರಿಂದ 8 ತಿಂಗಳು ಕಳೆದರೆ ನನಗೆ ವಯಸ್ಸು ಇನ್ನಷ್ಟು ಜಾಸ್ತಿ ಆಗಬಹುದು. ನನ್ನ ಕ್ರಿಕೆಟ್‌ ವೃತ್ತಿ ಮುಗಿಯಿತು ಎಂಬ ಬಗ್ಗೆ ಯೋಚನೆ ಮಾಡುವ ಸಮಯ ಬಂದಾಗಿದೆ. ಆ ಮೂಲಕ ಲಿಯಾಮ್‌ ಲಿವಿಂಗ್‌ಸ್ಟೋನ್‌ ಹಾಗೂ ವಿಲ್‌ ಜ್ಯಾಕ್ಸ್ ಅವರಂಥಹ ಯುವ ಆಟಗಾರರಿಗೆ ತಂಡದಲ್ಲಿ ಸ್ಥಾನ ಕಲ್ಪಿಸಬೇಕು. ಮುಂದಿನ ವಿಶ್ವಕಪ್ ಟೂರ್ನಿಗೆ ಅವರು ಸಜ್ಜಾಗಬೇಕು,” ಎಂದು ಸ್ಥಳೀಯ ಮಾಧ್ಯಮಗಳಿಗೆ ಮೊಯೀನ್ ಅಲಿ ತಿಳಿಸಿದ್ದಾರೆ.
ಇಂಗ್ಲೆಂಡ್‌ ತಂಡಕ್ಕೆ ಸಾಕಷ್ಟು ಯುವ ಆಟಗಾರರು ಆಗಮಿಸಿರುವುದರಿಂದ ನನಗೆ ತುಂಬಾ ಖುಷಿ ಇದೆ. ಆದರೆ, ಈ ಆಟಗಾರರ ಪೈಕಿ ಯಾವೆಲ್ಲಾ ಆಟಗಾರರು ತಮ್ಮ ಗುಣಮಟ್ಟದ ಆಟದ ಮೂಲಕ ತಂಡವನ್ನು ನಿರಂತರವಾಗಿ ಗೆಲ್ಲಿಸುವತ್ತಾರೆಂದು ಕಾದು ನೋಡಬೇಕಾಗಿದೆ ಎಂದು ಇದೇ ವೇಳೆ ಅವರು ಹೇಳಿದ್ದಾರೆ.
ಫ್ರಾಂಚೈಸಿ ಲೀಗ್‌ಗಳಲ್ಲಿ ಮುಂದುವರಿಯುತ್ತೇನೆ: ಮೊಯೀನ್ ಅಲಿ
ಒಂದು ವೇಳೆ ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್‌ಗೆ ವಿದಾಯ ಹೇಳಿದರೆ, ವಿಶ್ವದಾದ್ಯಂತ ನಡೆಯುವ ಟಿ20 ಕ್ರಿಕೆಟ್‌ ಫ್ರಾಂಚೈಸಿ ಲೀಗ್‌ಗಳಲ್ಲಿ ಮುಂದುವರಿಯುವುದಾಗಿ ಇಂಗ್ಲೆಂಡ್‌ ಆಲ್‌ರೌಂಡರ್‌ ತಿಳಿಸಿದ್ದಾರೆ. ಮಾರ್ಚ್‌ 31 ರಿಂದ ಆರಂಭವಾಗುವ ಇಂಡಿಯನ್ ಪ್ರೀಮಿಯರ್‌ ಲೀಗ್‌ (ಐಪಿಎಲ್‌) ಟೂರ್ನಿಯಲ್ಲಿ ಮೊಯೀನ್ ಅಲಿ ಚೆನ್ನೈ ಸೂಪರ್‌ ಕಿಂಗ್ಸ್ ತಂಡದ ಪರ ಆಡಲಿದ್ದಾರೆ.
“ಟಿ20 ಕ್ರಿಕೆಟ್‌ನಲ್ಲಿ ಉತ್ತಮ ಪ್ರದರ್ಶನ ತೋರಿದರೆ ಹಾಗೂ ಎಲ್ಲಾ ಫ್ರಾಂಚೈಸಿ ಟೂರ್ನಿಗಳಲ್ಲಿಯೂ ನನ್ನಿಂದ ಉತ್ತಮ ಪ್ರದರ್ಶನ ಮೂಡಿ ಬಂದರೆ, ಇಂಗ್ಲೆಂಡ್‌ ಚುಟುಕು ತಂಡದಲ್ಲಿ ಆಡುತ್ತೇನೆ. ಇದರಲ್ಲಿ ಯಾವುದೇ ಅನುಮಾನವಿಲ್ಲ. ಆದರೆ, 50 ಓವರ್‌ಗಳ ಸ್ವರೂಪದಲ್ಲಿ ಆಡುವುದು ಸುಲಭವಲ್ಲ,” ಎಂದು ಮೊಯೀನ್ ಅಲಿ ತಿಳಿಸಿದ್ದಾರೆ.
