ಬೆಂಗಳೂರು:- ಇಂದಿನಿಂದ ರಾಜ್ಯದಲ್ಲಿ ಪ್ರೀಮಿಯಂ ಮದ್ಯದ ದರ ಇಳಿಕೆಯಾಗಲಿದ್ದು, ಈ ಮೂಲಕ ಕುಡುಕರಿಗೆ ಗುಡ್ ನ್ಯೂಸ್ ಸಿಕ್ಕಂತಾಗಿದೆ.
ದುಬಾರಿ ಬೆಲೆಯ ಬ್ರಾಂದಿ, ವಿಸ್ಕಿ, ಜಿನ್, ರಮ್ ಅಗ್ಗವಾಗಲಿದೆ. ಅನ್ಯರಾಜ್ಯಕ್ಕಿಂತ ರಾಜ್ಯದಲ್ಲಿ ಪ್ರೀಮಿಯಂ ಮದ್ಯಗಳ ಬ್ರ್ಯಾಂಡ್ ದರ ಹೆಚ್ಚಳವಿತ್ತು.
ಹೀಗಾಗಿ ಗಡಿ ಬಾಗದ ಜನ ಅನ್ಯ ರಾಜ್ಯಕ್ಕೆ ತೆರಳಿ ಮದ್ಯ ಖರೀದಿ ಮಾಡುತ್ತಿದ್ದರು
ಇದರಿಂದ ಸರ್ಕಾರದ ಬೊಕ್ಕಸಕ್ಕೆ ಕೋಟಿ ಕೋಟಿ ನಷ್ಟ ಆಗುತ್ತಿತ್ತು. ಈ ನಷ್ಟ ಸರಿದೂಗಿಸಲು ಮದ್ಯ ದರ ಪರಿಷ್ಕರಿಸಿ ಆದೇಶ ಹೊರಡಿಸಲಾಗಿದ್ದು, ಇಂದಿನಿಂದ ಬೆಲೆಯಲ್ಲಿ ಬದಲಾವಣೆಯಾಗಲಿದೆ.
ಪ್ರೀಮಿಯಂ ಮದ್ಯಗಳ ಬ್ರ್ಯಾಂಡ್ ದರ ಕಡಿಮೆ ಮಾಡುವುದರೊಂದಿಗೆ ಗಡಿಯಾಚೆಗಿನ ಮದ್ಯದ ಖರೀದಿಯನ್ನು ತಡೆಯಲು ಮಾತ್ರವಲ್ಲದೆ ಸ್ಥಳೀಯ ಮಾರಾಟವನ್ನು ಹೆಚ್ಚಿಸುವ ಮೂಲಕ ರಾಜ್ಯದ ಆದಾಯವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಫೆಡರೇಶನ್ ಆಫ್ ವೈನ್ ಮರ್ಚೆಂಟ್ಸ್ ಅಸೋಸಿಯೇಷನ್ ಕರ್ನಾಟಕ, ಉಪಾಧ್ಯಕ್ಷ ಕರುಣಾಕರ ಹೆಗ್ಡೆ, ಹಲವು ಡಿಸ್ಟಿಲರಿಗಳು ಈಗ ಹೆಚ್ಚಿನ ವೆಚ್ಚದಲ್ಲಿ ಉತ್ಪಾದಿಸುವುದರಿಂದ ನಷ್ಟದ ಭಯದಿಂದ ಉತ್ಪಾದನೆಯನ್ನು ನಿಲ್ಲಿಸಿವೆ ಮತ್ತು ಅಧಿಸೂಚನೆ ಪ್ರಾರಂಭವಾದ ನಂತರ ಚಿಲ್ಲರೆ ವ್ಯಾಪಾರಿಗಳು ಕಡಿಮೆ ಬೆಲೆಗೆ ಮಾರಾಟ ಮಾಡಲು ಒತ್ತಾಯಿಸಲಾಗುತ್ತದೆ. ಯಾವುದೇ ಬೆಲೆ ಬದಲಾವಣೆಗಳು ನಷ್ಟಕ್ಕೆ ಕಾರಣವಾಗುವುದರಿಂದ ಪ್ರೀಮಿಯಂ ಮದ್ಯವನ್ನು ಸಂಗ್ರಹಿಸಬೇಡಿ ಎಂದು ಸಲಹೆ ನೀಡಿದ್ದಾರೆ.
ಕಳೆದ ಎರಡು ವರ್ಷಗಳಲ್ಲಿ ಅದರಲ್ಲೂ ಕೋವಿಂಡ್ ಸಂಕಷ್ಟದ ನಂತರ ಅತ್ಯಂತ ಬಿಸಿ ಬೇಸಿಗೆಯಿಂದಾಗಿ ಬಿಯರ್ ಮಾರಾಟವು ಹೆಚ್ಚಿದೆ. ಈ ಸಮಯದಲ್ಲಿ ಬಿಯರ್ ಅತ್ಯಂತ ಜನಪ್ರಿಯ ರಿಫ್ರೆಶ್‌ಮೆಂಟ್ ಆಯ್ಕೆಯಾಗಿದೆ. ಈ ಹೊಸ ಕ್ರಮವು IML ಗಳು ಬಿಯರ್ ಮಾರುಕಟ್ಟೆಯೊಂದಿಗೆ ಹೆಚ್ಚು ಪರಿಣಾಮಕಾರಿಯಾಗಿ ಸ್ಪರ್ಧಿಸಲು ಸಹಾಯ ಮಾಡುತ್ತದೆ.
ಇನ್ನು, ಅಧಿಕಾರಕ್ಕೆ ಬರಲು ತಾವು ನೀಡಿದ ಐದು ಭರವಸೆಗಳನ್ನು ಈಡೇರಿಸಲು ವಾರ್ಷಿಕ 54,000 ಕೋಟಿ ರೂ.ಗಳನ್ನು ಸಂಗ್ರಹಿಸುವ ಗಂಭೀರ ಆರ್ಥಿಕ ಬಿಕ್ಕಟ್ಟಿನ ನಡುವೆ ಕರ್ನಾಟಕ ಸರ್ಕಾರವು ಈಗ ತನ್ನ ಆದಾಯವನ್ನು ಹೆಚ್ಚಿಸಲು ಹಲವು ಕ್ರಮಗಳನ್ನು ಕೈಗೊಳ್ಳುತ್ತಿದೆ.
