ಈಗ ವಾತಾವರಣ ಬದಲಾವಣೆಯ ಸಮಯ ಆಗಿರುವುದರಿಂದ ಬಿಸಿಲು ಮತ್ತು ಆಗಾಗ ಮಳೆಯ ಸಿಂಚನ ಇದ್ದೇ ಇರುತ್ತದೆ. ಇಂತಹ ಸಮಯದಲ್ಲಿ ಬಹಳಷ್ಟು ಜನರು ಹುಷಾರು ತಪ್ಪುತ್ತಾರೆ. ಸೂಕ್ಷ್ಮ ಆರೋಗ್ಯ ಹೊಂದಿರುವವರು ಬಹಳ ಬೇಗನೆ ಶೀತ, ನೆಗಡಿ, ಕೆಮ್ಮು ಇತ್ಯಾದಿ ಸಮಸ್ಯೆಗಳಿಗೆ ಗುರಿಯಾಗುತ್ತಾರೆ. ಕೆಲವರಿಗೆ ಎದೆಯಲ್ಲಿ ಮತ್ತು ಮೂಗಿನಲ್ಲಿ ಕಪ ಕಟ್ಟಿದ ಅನುಭವ ಉಂಟಾಗುತ್ತದೆ. ದೀರ್ಘಕಾಲದಲ್ಲಿ ಇದು ಅಸ್ತಮಾ ಸಮಸ್ಯೆಗೆ ಕಾರಣವಾಗುತ್ತದೆ. ಇಂತಹ ಸಂದರ್ಭದಲ್ಲಿ ವ್ಯಕ್ತಿಗೆ ಉಸಿರಾಡಲು ಮತ್ತಷ್ಟು ಕಷ್ಟವಾಗುತ್ತದೆ.
ಆದರೆ ಕಷ್ಟಕರವಾದ ಉಸಿರಾಟದ ಅವಸ್ಥೆಯನ್ನು ಸರಿ ಪಡಿಸಿಕೊಳ್ಳಲು ಮನೆ ಮದ್ದಿನ ರೂಪದಲ್ಲಿ ಬಹಳ ಸುಲಭದ ಮಾರ್ಗಗಳು ಇವೆ. ಪುದೀನಾಎಲೆಗಳು ಇದರಲ್ಲಿ ನಿಮಗೆ ಸಹಾಯಕ ಎಂದು ಹೇಳಬಹುದು. ಏಕೆಂದರೆ ಪುದೀನಾ ಎಲೆಗಳಲ್ಲಿ ನಿಮಗೆಲ್ಲಾ ಗೊತ್ತಿರುವ ಹಾಗೆ ಒಳ್ಳೆಯ ಔಷಧೀಯ ಗುಣಲಕ್ಷಣಗಳು ಲಭ್ಯ ಇವೆ. ಎಲ್ಲ ವಯಸ್ಸಿನವರಿಗೂ ಸೂಕ್ತವೆನಿಸುವ ಮತ್ತು ಉಸಿರಾಟಕ್ಕೆ ಸಂಬಂಧಪಟ್ಟ ಯಾವುದೇ ಸಮಸ್ಯೆಯನ್ನು ಬಹಳ ಬೇಗನೆ ಸರಿಮಾಡುವ ಸ್ವಭಾವವನ್ನು ಪುದಿನ ಎಲೆಗಳು ಹೊಂದಿರುತ್ತದೆ. ಬನ್ನಿ ಹಾಗಾದರೆ ಈ ಲೇಖನದಲ್ಲಿ ಈ ವಿಚಾರದ ಬಗ್ಗೆ ಮತ್ತಷ್ಟು ಮಾಹಿತಿಯನ್ನು ಕಲೆ ಹಾಕೋಣ
ಪುದೀನಾ ಎಲೆಗಳ ಪ್ರಯೋಜನಗಳು
- ಬೇರೆ ಯಾವುದೇ ಎಲೆಗಳಿಗೆ ಹೋಲಿಸಿದರೆ ಪುದೀನಾ ಎಲೆಗಳು ತುಂಬಾ ಘಾಡವಾದ ವಾಸನೆಯನ್ನು ಹೊಂದಿದ್ದು, ನಿಮ್ಮ ಉಸಿರಾಟ ವ್ಯವಸ್ಥೆಯನ್ನು ಸರಾಗಗೊಳಿಸುವ ಮೂಲಕ ಯಾವುದೇ ತೊಂದರೆ ಇಲ್ಲದಂತೆ ನಿಮಗೆ ಉಸಿರಾಡಲು ಅನುಕೂಲ ಮಾಡಿಕೊಡುತ್ತದೆ.
- ವಿಶೇಷವಾಗಿ ಗಂಟಲಿನ ಭಾಗದಲ್ಲಿ ಕಂಡುಬರುವ ಕಫ ದೂರವಾಗಿ ಬಹಳ ಬೇಗನೆ ವ್ಯಕ್ತಿ ಚೇತರಿಕೆ ಕಾಣುತ್ತಾನೆ.
- ಇದರ ಆಂಟಿ ಬ್ಯಾಕ್ಟೀರಿಯಲ್ ಮತ್ತು ಆಂಟಿ ಇನ್ಫಾಮೇಟರಿ ಗುಣಲಕ್ಷಣಗಳಿಂದ ಈ ಮೊದಲಿನಿಂದ ಉಸಿರಾಟ ವ್ಯವಸ್ಥೆಯಲ್ಲಿ ತೊಂದರೆಯನ್ನು ಅನುಭವಿಸುತ್ತಿರುವವರು ಅತ್ಯಂತ ಸರಳವಾಗಿ ಉಸಿರಾಡಲು ನೆರವಾಗುತ್ತದೆ. ಹಾಗಾಗಿ ಪುದಿನ ಎಲೆಗಳ ಮೇಲೆ ಈ ವಿಚಾರದಲ್ಲಿ ನಂಬಿಕೆ ಇಡಬಹುದು.
ಕೆಮ್ಮು ಮತ್ತು ಅಸ್ತಮಾ ಸಮಸ್ಯೆಗೆ ರಾಮಬಾಣ
- ಒಂದು ವೇಳೆ ನೀವು ಈಗಾಗಲೇ ವಿಪರೀತ ಕೆಮ್ಮು ಮತ್ತು ಉಸಿರಾಡಲು ಕಷ್ಟ ಪಡುತ್ತಿದ್ದರೆ, ಸ್ವಲ್ಪ ಉಗುರುಬೆಚ್ಚಗಿನ ನೀರಿನಲ್ಲಿ ಕೆಲವು ಹನಿಗಳಷ್ಟು ಪುದೀನಾ ರಸವನ್ನು ಹಾಕಿ ಬಾಯಿಯ ಮೂಲಕ ನೀರಿನಿಂದ ಬರುವ ಆವಿಯನ್ನು ಒಳಗೆ ತೆಗೆದುಕೊಳ್ಳಿ ಮತ್ತು ಮೂಗಿನಿಂದ ಜೋರಾಗಿ ಉಸಿರು ಬಿಡಿ.
- ಇದರಿಂದ ನಿಮ್ಮ ಗಂಟಲಿನ ಭಾಗದಲ್ಲಿ ಮತ್ತು ಮೂಗಿನ ನಾಳಗಳಲ್ಲಿ ಕಂಡುಬರುವ ಸಿಂಬಳದ ಸಮಸ್ಯೆ ದೂರವಾಗುತ್ತದೆ. ವ್ಯಕ್ತಿ ಮತ್ತೆ ಮೊದಲಿನಂತೆ ಆಗಿ ಅತ್ಯುತ್ತಮ ಉಸಿರಾಟ ವ್ಯವಸ್ಥೆಯನ್ನು ಹೊಂದಿರುತ್ತಾನೆ.
ಪುದೀನಾ ಚಹಾ ಸೇವನೆ ಮಾಡಬಹುದು
- ನಿಮ್ಮ ದೇಹದ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಜೊತೆಗೆ ನಿಮ್ಮ ಉಸಿರಾಟ ತೊಂದರೆಯನ್ನು ಬಹಳ ಬೇಗನೆ ದೂರ ಮಾಡುವ ಇನ್ನೊಂದು ಸುಲಭವಾದ ಮನೆಮದ್ದು ಎಂದರೆ ಅದು ಪುದೀನಾ ಎಲೆಗಳ ಚಹಾ.
- ಇಲ್ಲಿ ನೀವು ಪುದೀನಾ ಎಲೆಗಳ ಜೊತೆಗೆ ಸ್ವಲ್ಪ ತುಳಸಿ ಎಲೆಗಳನ್ನು ಸಹ ಬಳಕೆ ಮಾಡಬೇಕಾಗಿ ಬರುತ್ತದೆ.
- ಕುದಿಯುವ ನೀರಿನಲ್ಲಿ ಪುದೀನಾ ಮತ್ತು ತುಳಸಿ ಎಲೆಗಳನ್ನು ಚೆನ್ನಾಗಿ ಜಜ್ಜಿ ಹಾಕಿ ಇದಕ್ಕೆ ಸ್ವಲ್ಪ ಶುಂಠಿ, ಕಪ್ಪು ಕಾಳುಮೆಣಸು ಜಜ್ಜಿ ಹಾಕಿ ಸ್ವಲ್ಪ ಹೊತ್ತು ಚೆನ್ನಾಗಿ ಕುದಿಸಿ.
- ನಂತರ ಇದನ್ನು ಶೋಧಿಸಿಕೊಂಡು ಸ್ವಲ್ಪ ಹೊತ್ತು ಆರಿದ ಮೇಲೆ ಜೇನು ತುಪ್ಪವನ್ನು ಹಾಕಿ ಮಿಶ್ರಣ ಮಾಡಿ ದಿನದಲ್ಲಿ ಮೂರು ಬಾರಿ ಕುಡಿಯುವ ಅಭ್ಯಾಸ ಮಾಡಿಕೊಂಡರೆ ಆದಷ್ಟು ಬೇಗನೆ ನಿಮ್ಮ ಸಮಸ್ಯೆಗೆ ಪರಿಹಾರ ಸಿಗಲಿದೆ.
- ಯಾವುದೇ ಕಾರಣಕ್ಕೂ ಹೆಚ್ಚು ಜೇನುತುಪ್ಪ ಬಳಕೆ ಮಾಡಲು ಹೋಗಬೇಡಿ, ಏಕೆಂದರೆ ಇದು ನಿಮಗೆ ಮಲಬದ್ಧತೆ ಸಮಸ್ಯೆಯನ್ನು ತಂದುಕೊಡಬಹುದು.
ಮನೆಯ ಹೊರಗಡೆ ಪುದೀನಾ ಬಳ್ಳಿ ಬೆಳೆಸಿ
- ಒಂದು ವೇಳೆ ನಿಮಗೆ ಅತಿಯಾದ ಕೆಮ್ಮು, ಶೀತ ಮತ್ತು ಅಸ್ತಮ ಆಗಾಗ ಕಂಡುಬರುತ್ತಿದ್ದರೆ, ಅಥವಾ ನಿಮ್ಮ ಕುಟುಂಬದಲ್ಲಿ ಯಾರಿಗಾದರೂ ಈ ಸಮಸ್ಯೆ ಇದ್ದರೆ ನಿಮ್ಮ ಮನೆಯ ಕಿಟಕಿಯ ಬಳಿ ಒಂದು ಕುಂಡದಲ್ಲಿ ಪುದಿನ ಬಳ್ಳಿಯನ್ನು ಬೆಳೆಸಿ.
- ಗಾಳಿ ಬೀಸುವುದರಿಂದ ಪುದೀನಾ ಎಲೆಗಳ ಸುವಾಸನೆ ಇಡಿ ನಿಮ್ಮ ಮನೆಯ ಎಲ್ಲಾ ಕಡೆ ಹರಡುವುದರಿಂದ ಮನೆಮಂದಿ ಕಾಯಿಲೆ ಬೀಳುವುದು ತಪ್ಪುತ್ತದೆ ಎಂದು ಹೇಳುತ್ತಾರೆ. ಬಹಳ ಹಿಂದೆಯೂ ಕೂಡ ನಮ್ಮ ಹಿರಿಯರು ಈ ತಂತ್ರವನ್ನು ಅನುಸರಿಸುತ್ತಿದ್ದರು ಎಂದರೆ ನಿಜಕ್ಕೂ ಆಶ್ಚರ್ಯವಾಗುತ್ತದೆ.
ಅಸ್ತಮಾ ರೋಗಿಗಳು ಹೀಗೂ ಕೂಡ ಮಾಡಬಹುದು
- ಒಂದು ವೇಳೆ ನೀವು ದೀರ್ಘಕಾಲದಿಂದ ಅಸ್ತಮಾ ಸಮಸ್ಯೆಯಿಂದ ಬಳಲುತ್ತಿದ್ದರೆ, ಪುದೀನಾಎಲೆಗಳ ಆವಿಯನ್ನು ಆಗಾಗ ತೆಗೆದುಕೊಳ್ಳುವ ಪ್ರಯತ್ನ ಮಾಡಬೇಕು.
- ಆಂಟಿ ಇನ್ಫಾಮೇಟರಿ ಗುಣ ಲಕ್ಷಣಗಳನ್ನು ಒಳಗೊಂಡಿರುವ ಇದರಿಂದ ನಿಮ್ಮ ಗಂಟಲಿನ ನೋವು ಮತ್ತು ಊತ ಕಡಿಮೆಯಾಗುವುದರ ಜೊತೆಗೆ ಎದೆಯ ಭಾಗದಲ್ಲಿ ಕಫ ಕರಗಿಸಿ ಚೆನ್ನಾಗಿ ಉಸಿರಾಡಲು ಅನುಕೂಲ ಮಾಡಿಕೊಡುತ್ತದೆ.
ಇದನ್ನೂ ಓದಿ : ಬಿಜೆಪಿಯವರು ಸುಮ್ಮನ್ನೇ ಗಾಳಿಗೆ ಗುದ್ದಿ ಕೈ ನೋವು ಮಾಡಿಕೊಳ್ಳುತ್ತಿದ್ದಾರೆ: ಆರ್ ಬಿ ತಿಮ್ಮಾಪೂರ..!
