ಇಂದು ಕನ್ನಡ ಸಿನಿ ರಸಿಕರಿಗೆ ಸಂಭ್ರಮ.70ನೇ ರಾಷ್ಟ್ರೀಯ ಸಿನಿಮಾ ಪ್ರಶಸ್ತಿ ಘೋಷಣೆಯಾಗಿದ್ದು ನಟ ರಿಷಬ್ ಶೆಟ್ಟಿಗೆ ಅತ್ಯುತ್ತಮ ನಟ ಪ್ರಶಸ್ತಿ ಸಿಕ್ಕಿದೆ. ಕಾಂತಾರ ಸಿನಿಮಾದ ನಟನೆಗೆ ರಿಷಬ್ ಶೆಟ್ಟಿಗೆ ಅತ್ಯುತ್ತಮ ನಟ ಪ್ರಶಸ್ತಿಯನ್ನು ರಿಷಬ್ ಶೆಟ್ಟಿ ಪಡೆದುಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ನಟಿಸುವುದರ ಜೊತೆಗೆ ನಿರ್ದೇಶನವನ್ನು ರಿಷಬ್ ಶೆಟ್ಟಿ ಮಾಡಿದ್ದಾರೆ.
ಬಾಕ್ಸ್ ಆಫೀಸ್ನಲ್ಲಿ ಸೂಪರ್ ಹಿಟ್ ಆದ ಸಿನಿಮಾಗೆ ಈಗ ಪ್ರತಿಷ್ಠಿತ ಪ್ರಶಸ್ತಿ ಕೂಡ ಸಿಕ್ಕಿರುವುದು ಚಿತ್ರತಂಡಕ್ಕೆ ಖುಷಿ ನೀಡಿದೆ. ಪ್ರಶಸ್ತಿ ಘೋಷಣೆ ಆದ ಬೆನ್ನಲ್ಲೇ ರಿಷಬ್ ಶೆಟ್ಟಿ ಅವರು ಸುದ್ದಿಗೋಷ್ಠಿ ನಡೆಸಿ ಸಂತಸ ಹಂಚಿಕೊಂಡಿದ್ದಾರೆ.
ನನಗೆ ಒಲಿದಿರುವ ಈ ರಾಷ್ಟ್ರೀಯ ಪ್ರಶಸ್ತಿಯ ಯಶಸ್ಸು ಅಪ್ಪು, ದೈವ ನರ್ತಕರಿಗೆ ಹಾಗೂ ಕನ್ನಡ ಜನತೆಗೂ ಸಮರ್ಪಿಸುತ್ತಿದ್ದೇನೆ.ಈ ಪ್ರಶಸ್ತಿ ಹಿಂದೆ ನನ್ನ ಇಡೀ ಕಾಂತಾರ ತಂಡದ ಶ್ರಮ ಇದೆ. ನಮ್ಮ ಹೊಂಬಾಳೆ ಫಿಲಿಮ್ಸ್ ಗೆ ಒಟ್ಟು ನಾಲ್ಕು ಪ್ರಶಸ್ತಿ ಬಂದಿದ್ದು ಇದು ಕನ್ನಡ ಚಿತ್ರರಂಗದ ಯಶಸ್ಸು ಎಂದು ರಿಷಬ್ ಶೆಟ್ಟಿ ಹೇಳಿದರು.
ಈ ಪ್ರಶಸ್ತಿ ಗೆಲ್ಲುವ ಯಾವ ವಿಶ್ವಾಸವೂ ಇರಲಿಲ್ಲ
ಈ ಮೊದಲು ಕಾಂತಾರ ಸಿನಿಮಾಗೆ ರಾಷ್ಟ್ರ ಪ್ರಶಸ್ತಿ ಸಿಕ್ಕಿದೆ ಎಂಬ ರೂಮರ್ಸ್ ಬರ್ತಿತ್ತು. ಆದರೆ ನ್ಯಾಷನಲ್ ಕಮಿಟಿಯಿಂದ ಪ್ರೆಸ್ ಮೀಟ್ ಮಾಡಿ ಹೇಳಿದಾಗ ಕನ್ಫರ್ಮ್ ಮಾಡಿದ ಖುಷಿಯಾಯ್ತು. ನಟ ಮಮ್ಮುಟಿ ರೇಸ್ ನಲ್ಲಿದ್ರು ಅನ್ನೋದು ಸಾಮಾಜಿಕ ಜಾಲತಾಣದದಲ್ಲಿ ನೋಡಿ ಗೊತ್ತಾಯ್ತು. ಅವರೂ ಜೊತೆಗೆ ಇದ್ರು ಅನ್ನೋದು ನನ್ನ ಪುಣ್ಯ ಜನರೇ ದೊಡ್ಡದು, ಜನ ಸಿನಿಮಾ ನೋಡಿ ಮೆಚ್ಚಿಕೊಂಡರೇ ಅದೇ ದೊಡ್ಡದು. ಇದರ ಜೊತೆಗೆ ಒಂದು ರಾಷ್ಟ್ರೀಯ ಪ್ರಶಸ್ತಿ ಬರೋದು ಮತ್ತಷ್ಟು ಖುಷಿ. ನನ್ನ ಹೆಂಡತಿ ಪ್ರಗತಿಗೆ ಎಷ್ಟೇ ಧನ್ಯವಾದ ಹೇಳಿದರೂ ಸಾಕಾಗಲ್ಲ. ಜೊತೆಗೆ ಮ್ಯೂಸಿಕ್ ಡೈರೆಕ್ಟರ್ ಅಜನೀಷ್, ಡಿಓಪಿ ಇಡೀ ತಂಡಕ್ಕೆ ಧನ್ಯವಾದಗಳು ಎಂದು ಹೇಳಿದರು. ಮುಂದಿನ ದಿನಗಳಲ್ಲಿ ಮತ್ತಷ್ಟು ಒಳ್ಳೆಯ ಸಿನಿಮಾ ನೀಡುವ ಪ್ರಯತ್ನ ಮಾಡುತ್ತೇನೆ ಎಂದು ಹೇಳಿದರು.
